Գլուխ 23

   
1․ Եւ եղեւ յետ աւուրց բազմաց, յետ հանգուցանելոյ Տեառն զԻսրայէլ յամենայն թշնամեաց նոցա շուրջանակի. եւ Յեսու ծերացեալ եւ անցեալ զաւուրբք:

2․ Կոչեաց Յեսու միանգամայն զամենայն որդիսն Իսրայէղի, եւ զծերակոյտն նոցա, եւ զիշխանս նոցա, եւ զդատաւորս նոցա, եւ զդպիրս նոցա, եւ ասէ ցնոսա. Ես ծերացայ եւ անցի զաւուրբք:

3․ եւ դուք ձեզէն տեսէք զամենայն զոր արար Տէր Աստուած մեր ընդ ամենայն ազգսն` այնոսիկ յերեսաց ձերոց. զի Տէր Աստուած ձեր ինքնին տայր պատերազմ ընդ ձեր:

4․ Եւ արդ տեսէք` զի թողի ի ձեզ զաանդս մնացեալսն զայնոսիկ ի ժառանգութիւն ըստ ցեղից ձերոց, ի Յորդանանէ զամենայն ազգսն` զոր սատակեցի ի ծովէն մեծէ` որ զատուցանէ ի մտիցն արեւու:

5․ Արդ` Տէր Աստուած մեր նա սատակեսցէ զնոսա յերեսաց ձերոց մինչչեւ կորիցեն. եւ արձակեսցէ ի վերայ նոցա գազանս վայրենիս` մինչչեւ սատակեսցէ զնոսա, եւ զթագաւորս նոցա յերեսաց ձերոց. եւ ժառանգեսջիք զերկիր նոցա` որպէս խաւսեցաւ Տէր Աստուած մեր ընդ մեզ:

6․ Արդ, զաւրացարուք յոյժ զգուշանալ եւ առնել զամենայն գրեալս ի գիրս աւրինացն Մովսէսի. զի մի խոտորիցէք ի նմանէ յաջ կամ յահեակ:

7․ գուցէ մտանիցէք յազգսն մնացեալս յայնկոյս. եւ անուանք դից նոցա մի անուանեսցի ի միջի ձերում. եւ մի երդնուցուք ի նոսա, եւ մի պաշտիցէք զնոսա, եւ մի երկիր պագանիցէք նոցա:

8․ այլ զհետ Տեառն Աստուծոյ մերոյ երթիջիք` որպէս արարէք մինչչեւ ցայսաւր.

9․ եւ սատակեաց զնոսա Տէր յերեսաց ձերոց, զազգս մեծամեծս եւ հզաւրս. եւ ոչ ոք եկաց ընդդէմ ձեր մինչչեւ ցայսաւր:

10․ Մի այր ի ձէնջ հալածէր հազարս. զի Տէր Աստուած ձեր ինքնին տայր պատերազմ ընդ ձեր, որպէս եւ խաւսեցաւ ընդ ձեզ:

11․ Եւ զգոյշ լինիջիք յոյժ անձանց ձերոց, սիրել զՏէր Աստուած ձեր:

12․ Ապա թէ դառնալով դառնայցէք, եւ յաւելուցուք յազգսն մնացեալս ի ձէնջ, եւ խնամութիւնս առնիցէք ընդ նոսա, եւ խառնակիցէք դուք ընդ նոսա, եւ նոքա ընդ ձեզ:

13․ Գիտելով գիտասջիք, զի ոչ եւս յաւելուցու Տէր սատակել զազգսն զայնոսիկ յերեսաց ձերոց. եւ լինիցին ձեզ յորոգայթս եւ ի գայթագղութիւնս. խոչ ի գարշապարս ձեր, եւ նետք յաչս ձեր, մինչչեւ կորնչիջիք յերկրէս բարութեան զոր ետ ձեզ Տէր Աստուած ձեր:

14․ Եւ ես` ահա երթամ այսաւր զճանապարհ որպէս ամենեքին որ են յերկրի: եւ ծանիջիք յամենայն սրտէ ձերմէ եւ յամենայն անձնէ ձերմէ. զի ոչ վրիպեաց բան մի յամենայն բանից զոր խաւսեցաւ ձեզ Տէր Աստուած ձեր. այլ ամենայն եկն եհաս ձեզ, եւ ոչ սխալեցաւ ի նոցանէ բան մի:

15․ Եւ եղիցի` զոր աւրինակ եկին ի վերայ ձեր ամենայն բանք բարիք զոր խաւսեցաւ Տէր վասն ձեր. նոյնպէս ածցէ Տէր ի վերայ ձեր զամենայն բանս չարս, մինչչեւ սատակեսցէ զձեզ յերկրէս բարութեան` զոր ետ ձեզ Տէր Աստուած ձեր,

16․ ի յանցանել ձեզ զուխտիւ Տեառն Աստուծոյ մերոյ` զոր պատուիրեաց մեզ, եւ յերթալ պաշտել զաստուածս աւտարս` եւ երկիր պագանել նոցա: եւ բարկանայցէ ձեզ Տէր, եւ կորնչիջիք վաղվաղակի յերկրէս բարութեան` զոր ետ ձեզ Տէր: