Գլուխ 23

1․ Եւ դարձուցին արքայի զպատգամն զոր յղեաց արքայ: եւ ժողովեաց առ ինքն զամենայն ծերս Յուդայ` եւ զԵրուսաղէմի:

2․ եւ ել արքայ ի տուն Տեառն. եւ ամենայն այր Յուդայ` եւ ամենայն բնակիչք Երուսաղէմի ընդ նմա, եւ քահանայք եւ մարգարէք` եւ ամենայն ժողովուրդն ընդ նմա ի փոքուէ մինչչեւ ցմեծ: եւ ընթերցաւ յականջս նոցա զամենայն բանս մատենի ուխտին գտելոյ ի տան Տեառն:

3․ Եւ եկաց արքայ ի վերայ սեանն, եւ ուխտեաց ուխտ առաջի Տեառն` երթալոյ զհետ Տեառն, եւ պահելոյ զպատուիրանս նորա, եւ զվկայութիւնս նորա, եւ զիրաւունս նորա յամենայն սրտէ` եւ յամենայն անձնէ. կանգնել զբանս ուխտին գրելոյ ի մատենին յայնմիկ: եւ եկաց ամենայն ժողովուրդն յուխտի:

4․ Եւ պատուէր ետ արքայ Քեղկիայ քահանայի մեծի, եւ քահանայիցն երկրորդաց, եւ պահապանաց կշռոյն` հանել ի տաճարէն Տեառն զամենայն անաւթ գործեալ Բահաղու, եւ անտառացն, եւ զաւրութեան երկնից, եւ այրեաց զնոսա արտաքոյ Երուսաղէմի ի Սադեմովթ Կեդրոնի, եւ արկ զմոխիր նոցա ի Բեթէլ:

5․ Եւ այրեաց զքովմարիմսն զոր տուեալ էր արքային Յուդայ, եւ արկանէին խունկս ի բարձունսն, եւ յամենայն քաղաքս Յուդայ, եւ շուրջ զԵրուսաղէմաւ. եւ զխնկարկուսն զարեգական եւ զլուսնի` եւ զաստեղաց` եւ զամենայն զաւրութեան երկնից.

6․ եւ զանտառն ի տանէ Տեառն արտաքոյ Երուսաղէմի ի հեղեղատն Կեդրոնի. եւ այրեաց զայն ի հեղեղատին Կեդրոնի, եւ մանրեաց իբրեւ զփոշի. ցանեաց զմոխիրն նորա ի գերեզմանս որդւոց ժողովրդեանն:

7․ Եւ քակեաց զտուն կադէսիմացն որ ի տան Տեառն. եւ յորում կանայքն արկանէին զպատմուճանս անտառացն:

8․ եւ եհան զամենայն քուրմսն ի քաղաքէն Յուդայ: Եւ պղծեաց զբարձունսն. որ արկանէին խունկս քուրմքն, ի Գաբաայ մինչչեւ ցԲերսաբէէ. եւ քակեաց զտուն դրանցն որ առ դրանդոջ դրանն Յեսովայ իշխանի դրանն ի ձախմէ առ դրան քաղաքին:

9․ բայց ոչ ելանէին քուրմք բարձանցն ի սեղան Տեառն որ յԵրուսաղէմ, եթէ ոչ ուտէին բաղարջ ի մէջ եղբարց իւրեանց:

10․ Եւ պղծեաց զԹոփոթ, որ ի ձոր որդւոցն Ենոմայ, առ ի չածելոյ առն զուստր իւր կամ զդուստր զբոցով Մեղքոմայ:

11․ Եւ այրեցին զձիսն զորս ետ արքայ Յուդայ արեգական` ի մուտս տան Տեառն ի գանձանակի Նաթանայ ներքինւոյ արքայի, որ ի Փարուիմ. եւ զկառսն արեգական այրեաց հրով:

12․ եւ զսեղանս որ ի վերայ տանեաց վերնատանն, զոր արարին թագաւորք Յուդայ. եւ զսեղանն` զոր արար Մանասէ յերկուս սրահս տանն Տեառն. եւ քակեաց զայն արքայ, եւ կործանեաց անտի, եւ ընկէց զհողն նոցա ի հեղեղատն Կեդրոնի:

13․ Նա եւ զտունն որ ի դիմաց Երուսաղէմի ընդ աջմէ լերինն Մոսաթայ, զոր շինեաց Սողոմոն արքայ Իսրայէլի Աստարտայ գարշելւոյ սիդոնացւոյ, եւ Քամովսայ զազրոտւոյ Մովաբայ, եւ Մելքոմայ գարշելւոյ որդւոցն Ամոնայ` պղծեաց արքայ:

14․ եւ խորտակեաց զարձանսն, եւ կոտորեաց զանտառսն. եւ ելից զտեղիս նոցա ոսկերաւք մարդկան:

15․ Եւ զսեղանն որ ի Բեթէլ զբարձր, զոր արար Յերոբովամ որդի Նաբատայ որ մեղոյցն զԻսրայէլ. եւ զայն եւս սեղան զբարձր կործանեաց եւ խորտակեաց զքարինս նորա, եւ մանրեաց իբրեւ զփոշի, եւ այրեաց զանտառն:

16․ Եւ հայեցաւ Յովսիա, եւ ետես զգերեզմանս որ ի քաղաքին. եւ առաքեաց եւ առ զոսկերս ի գերեզմանացն` եւ այրեաց ի վերայ սեղանոյն, եւ պղծեաց զնա ըստ բանին Տեառն, զոր խաւսեցաւ այրն Աստուծոյ, մինչչեւ կայր Յերոբովամ ի տաւնին ի վերայ սեղանոյն: Եւ դարձոյց զաչս իւր ի գերեզման առնն Աստուծոյ որ խաւսեցաւ զբանս զայսոսիկ:

17․ եւ ասէ. Զի՞նչ է կոթողն այն զոր ես տեսանեմ: եւ ասեն ցնա արք քաղաքին. Այրն Աստուծոյ է` որ եկն ի Յուդայ, եւ բարբառեցաւ զբանս զայսոսիկ ի վերայ սեղանոյն Բեթելայ:

18․ եւ ասէ. Թոյլ տուք զայն` մի ոք շարժեսցէ զոսկերս նորա. եւ գտան ոսկերք նորա ընդ ոսկերս մարգարէին եկելոյ ի Սամարիայ:

19․ Նա եւ զամենայն տունս բարձանց զոր ի քաղաքս Սամարիայ արարին թագաւորք Իսրայէլի առ ի բարկացուցանելոյ զՏէր, մերժեաց Յովսիա արքայ Իսրայէլի. եւ արար ըստ ամենայն գործոցն զոր արար ի Բեթէլ:

20․ եւ ճենճերեաց զամենայն քուրմս բարձանց որ էին անդ ի վերայ սեղանոյն. եւ այրեաց զոսկերս մարդկան ի վերայ նոցա. եւ դարձաւ յԵրուսաղէմ:

21․ Եւ պատուէր ետ արքայ ամենայն ժողովրդեանն` եւ ասէ. Արարէք զզատիկ տեառն Աստուծոյ մերոյ, որպէս եւ գրեալ է ի մատենի ուխտիս այսորիկ:

22․ Զի ոչ եղեւ զատիկն այն յաւուրս դատաւորացն որ դատէին զԻսրայէլ, եւ յաւուրս թագաւորացն Իսրայէլի, եւ թագաւորացն Յուդայ:

23․ Բայց զի յութուտասներորդի ամի Յովսիայ արքայի եղեւ զատիկն այն Տեառն յԵրուսաղէմ:

24․ Եւ զվհուկս, եւ զգէտս, եւ զթերափիմս, եւ զկուռս, եւ զամենայն գարշելիսն եղեալս ի Յուդայ եւ յԵրուսաղէմ, եբարձ Յովսիա. զի հաստատեսցէ զբանս աւրինացն գրելոց ի մատենին, զոր եգիտ Քեղկիա քահանայ ի տան Տեառն:

25․ Նման նմա` ոչ եղեւ յառաջ քան զնա թագաւոր, որ դարձաւ առ Տէր յամենայն սրտէ իւրմէ, եւ յամենայն անձնէ իւրմէ, եւ յամենայն զաւրութենէ իւրմէ, ըստ ամենայն աւրինացն Մովսիսի. եւ յետ նորա ոչ եկաց նման նմա:

26․ Սակայն ոչ դարձաւ Տէր ի սրտմտութենէ բարկութեան իւրոյ մեծէ` զոր սրտմտեցաւ բարկութեամբ իւրով ի վերայ Յուդայ վասն զայրացութեանցն որովք զայրացոյց զնա Մանասէ:

27․ Եւ ասէ Տէր. Նա եւ զՅուդայ մերժեցից յերեսաց իմոց, որպէս մերժեցի զԻսրայէլ: եւ մերժեցից զքաղաքդ զայդ զոր ընտրեցի զԵրուսաղէմ, եւ զտունդ զորմէ ասացի թէ եղիցի անուն իմ անդ:

28․ Եւ մնացորդք բանիցն Յովսիայ` եւ ամենայն ինչ զոր արար ոչ աւանիկ գրեալ է ի գիրս բանից աւուրց թագաւորացն Յուդայ:

29․ Յաւուրսն յայնոսիկ ել փարաւոն Նեքաւով արքայ եգիպտացւոց ի վերայ թագաւորին Ասորեստանեաց առ Եփրատ գետով: եւ գնաց Յովսիա արքայ ընդ առաջ նորա. եւ սպան զնա ի Մակեդով ի տեսանելն նորա զնա:

30․ եւ բարձին զնա ծառայք նորա ի Մակեդովայ, եւ բերին զնա յԵրուսաղէմ. եւ թաղեցին զնա ի գերեզմանի հաւր իւրում: Եւ առ ժողովուրդ երկրին զՅովաքազ որդի Յովսիայ, եւ աւծին զնա` եւ թագաւորեցուցին զնա փոխանակ հաւր իւրոյ:

31․ Որդի քսան եւ երից ամաց էր Յովաքազ ի թագաւորել իւրում, եւ երիս ամիսս թագաւորեաց յԵրուսաղէմ: եւ անուն մաւր նորա Ամիտալ դուստր Երեմիայի ի Ղոբնայ:

32․ եւ արար չար առաջի Տեառն ըստ ամենայնի զոր արարին հարք նորա:

33․ Եւ փոխեաց զնա փարաւոն Նեքաւով ի Դեբղաթա յերկիրն Եմաթայ չթագաւորել նմա յԵրուսաղէմ. եւ արկ հարկ երկրին հարիւր տաղանտ արծաթոյ եւ տասն տաղանտ ոսկւոյ:

34․ Եւ թագաւորեցոյց փարաւոն Նեքաւով ի վերայ նոցա զԵղիակիմ որդի Յովսիայ արքայի Յուդայ փոխանակ Յովսեայ հաւր իւրոյ. եւ փոխեաց զանուն նորա Յովակիմ. եւ զՅովաքազ առ տարաւ յԵգիպտոս, եւ մեռաւ անդ:

35․ Եւ զարծաթն եւ զոսկին ետ Յովակիմ փարաւոնի. սակայն ճշդով գրեցին զերկիրն տալ զարծաթն բանիւ փարաւոնի` այր ըստ կարի իւրում ետուն զարծաթ եւ զոսկի հանդերձ ժողովրդեամբ երկրին տալ փարաւոնի Նեքաւովայ:

36․ Որդի քսան եւ հինգ ամաց էր Յովակիմ ի թագաւորել իւրում. եւ մետասան ամ թագաւորեաց յԵրուսաղէմ. եւ անուն մաւր նորա Ելդափ` դուստր Յեդդելայ յՌովմայ.

37․ եւ արար չար առաջի Տեառն ըստ ամենայնի զոր արարին հարք նորա: