Գլուխ 5

 

1. Եւ եղեւ իբրեւ լուան թագաւորք ամենայն Ամուրհացւոց, որ էին յայնկոյս ¡ Յորդանանու առ ծովեզերբն եւ թագաւորք Փիւնիկեցւոց որ առ ծովեզերբն. թէ ցամաքեցոյց Տէր Աստուած զՅորդանան գետ առաջի որդւոցն Իսրայէղի յանցանել նոցա, խաշեցան միտք նոցա եւ զարհուրեցան, եւ ոչ գոյր ի նոսա իմաստութիւն եւ ոչ մի` յերեսաց որդւոցն Իսրայէղի:

2. Ընդ այնու ժամանակաւ ասէ Տէր ցՅեսու. արա դու սուրս ի գայլահազ վիմէ` եւ նստեալ թլփատեսցես զորդիսն Իսրայէղի կրկնակի:

3. Եւ արար իւր Յեսու զսուրս քարեղէնս գայլահազեայս, եւ թլփատեաց զորդիսն Իսրայէղի ի տեղւոջ` ուր կոչէր բլուր Անթլփատից:

4. Եւ զորաւրինակ յապաղեաց Յեսու զորդիսն Իսրայէղի որ էին ի ճանապարհի անդ, որք բնաւ իսկ ոչ էին թլփատեալք յելանելոցն յԵգիպտոսէ, զամենեսին թլփատեաց Յեսու: Եւ այս ժողովուրդք էր զոր թլփատեաց Յեսու. ամենայն ժողովրդեանն ելելոց յԵգիպտոսէ զարու մանուկ: քանզի ամենայն արք պատերազմողք մեռան յանապատին անդէնի ի ճանապարհի, յելանելն իւրեանց յերկրէն եգիպտացւոց:

5. զի անթլփատեալք էին ամենայն ժողովուրդն որ ծնան յանապատին ի ճանապարհի ելանելոյ նոցա յերկրէն եգիպտացւոց թլփատեցան:

6. Քան զքառասուն եւ զերկու ամս շրջեցաւ Իսրայէղի յանապատին Ապդարեա. վասն որոյ անթլփատք էին բազումք ի պատերազմողացն ելելոց յերկրէն Եգիպտացւոց` որք անհնազանդեցան պատուիրանացն Աստուծոյ: Որոց սահմանեաց Տէր չտեսանել նոցա զերկիրն զոր երդու Տէր հարցն նոցա տալ մեզ. զերկիր` որ բղխէ զկաթն եւ զմեղր:

7. եւ փոխանակ նոցա կացոյց զորդիս նոցա` զորս թլփատեաց Յեսու. քանզի անթլփատք էին. վասն լինելոյ նոցա անթլփատս ի ճանապարհին:

8. Եւ իբրեւ թլփատեցաւ ամենայն ազգն, հանդարտութիւն կալեալ նստան անդէն ի բանակին մինչչեւ ողջացան:

9. Եւ ասէ Տէր ցՅեսու. յաւուր յայնմիկ բարձ զնախատինս Եգիպտացւոց ի ձէնջ: եւ կոչեաց զանուն տեղւոյն այնորիկ Գաղգաղա մինչչեւ ցայսաւր:

10. եւ անդ բանակեցան որդիքն Իսրայէղի:  Եւ արարին որդիքն Իսրայէղի զատիկն ի չորեքտասաներորդում աւուր ամսոյն յերեկորեայ, յարեւմտից Երեքովի ի դաշտի անդ,

11. եւ կերան ի ցորենւոյ երկրին զայգոյ զատկին բաղարջ եւ նորի:

12. Յաւուր յայնմիկ պակասեաց մանանայն, յետ ուտելոյն նոցա ի ցորենւոյ երկրին. եւ ոչ եւս գտանէր որդւոցն Իսրայէղի մանանայ: եւ ժողովեցին զպտուղ երկրին Փիւնիկեցւոց ի տարւոջ յայնմիկ:

13. Եւ եղեւ մինչ էր Յեսու յԵրիքով, ամբարձեալ զաչս իւր ետես, զի կայր առաջի նորա այր, եւ սուսեր մերկ ի ձեռին իւրում: եւ մատուցեալ Յեսու` ասէ ցնա. մե՞ր ես` թէ ի թշնամեաց մերոց:

14. Եւ նա ասէ ցնա. ես զաւրավար եմ զաւրու Տեառն, եւ այժմ եկի:

15. եւ անկաւ Յեսու ի վերայ երեսաց իւրոց յերկիր երկիր եպագ, եւ ասէ ցնա` Տէր զի՞նչ հրաման տացես ծառայի քում:

16. Եւ ասէ զաւրավարն Տէր ցՅեսու. լոյծ զկաւշիկս յաւտից քոց, զի տեղիդ յորում կաս` սուրբ է: եւ արար այնպէս Յեսու: