Գլուխ 5

1. Եւ Նեեման իշխան զաւրուն ասորւոց, էր այր մեծ առաջի տեառն իւրոյ, եւ սքանչելի երեսաւք. զի նովաւ
ետ Տէր փրկութիւն ասորւոց: եւ այրն հզաւր զաւրութեամբ էր, եւ բորոտեալ:

2. Եւ ասորիքն մեկնակազէնք` ելին
եւ գերեցին յերկրէն Իսրայէլի աղջիկ մի փոքրիկ, եւ էր առ կնոջն Նեեմանայ.

3. եւ ասէ ցտիկին իւր. Յանկարծ
երթայր տէրդ իմ առաջի մարգարէին Աստուծոյ որ ի Սամարիա. եւ անդէն աւաքէր զդա ի բորոտութենէ իւրմէ:

4. Եւ եմուտ` եւ պատմեաց տեառն իւրում եւ ասէ. Այսպէս եւ այսպէս խաւսեցաւ աղջիկն որ յերկրէն Իսրայէլի:

5. Եւ ասէ արքայն ասորւոց ցՆեեման. Երթ եւ ես առաքեցից հրովարտակս առ արքայն Իսրայէլի: եւ գնաց. եւ առ ի ձեռին իւրում տասն տաղանտ արծաթոյ, եւ վեց հազար դահեկան, եւ տասն պատմուճան հանդերձեալ:

6. եւ տարաւ հրովարտակս առ արքայն Իսրայէլի: Եւ էր գրեալ այսպէս, արդ` իբրեւ հասցէ առ քեզ հրովարտակդ այդ.
ահա առաքեցի առ քեզ զՆեեման ծառայ իմ, եւ աւաքեսցես զդա ի բորոտութենէ իւրմէ:

7. Եւ եղեւ իբրեւ ընթերցաւ արքայն Իսրայէլի զհրովարտակն, պատառեաց զհանդերձս իւր` եւ ասէ. Միթէ Աստուած իցեմ ես` սպանանել կամ կեցուցանել, զի առաքեաց առ իս աւաքել զայրդ ի բորոտութենէ իւրմէ. բայց գիտասջիք եւ
տեսջիք զի պատճառի իմն նա առ իս:

8. Եւ եղեւ իբրեւ լուաւ Եղիսեէ այրն Աստուծոյ` եթէ պատառեաց արքայն Իսրայէլի զհանդերձս իւր, առաքեաց առ արքայն Իսրայէլի եւ ասէ. Ընդէ՞ր պատառեցեր զհանդերձս քո, եկեսցէ առ իս Նեեման, եւ գիտասցէ թէ գոյ մարգարէ յԻսրայէլի:
9. Եւ եկն Նեեման երիվարաւք եւ կառաւք, եւ եկաց առ դուրս տանն Եղիսէի:

10. եւ առաքեաց Եղիսեէ առ նա հրեշտակ` եւ ասէ. Երթ լուա եւթն անգամ ի Յորդանան, եւ դարձցի մարմին քո եւ սրբեսցիս:

11. Եւ բարկացաւ Նեեման, գնաց եւ ասէ. Ես ասէի թերեւս ելցէ առ իս, եւ կացցէ յաղաւթս եւ կարդասցէ զանուն տեառն Աստուծոյ իւրոյ, եւ դիցէ զձեռն իւր ի վերայ տեղւոյս, եւ աւաքեսցէ զբորոտութիւնս:

12. ո՞չ լաւ իցեն Նաբանա եւ Փարփարա գետք Դամասկոսի քան զամենայն ջուրս Իսրայէլի. եւ ընդէ՞ր ոչ երթայց եւ լուացայց ի նոսա, եւ սրբեցայց: եւ դարձաւ եւ գնաց սրտմտութեամբ:

13. Եւ մատեան ծառայք նորա եւ խաւսեցան ընդ նմա, եւ ասեն ցնա. Հայր, եթէ մեծ ինչ բան խաւսեցեալ էր ընդ քեզ մարգարէին, ո՞չ ապաքէն պարտ էր առնել. թող թէ զի ասաց` լուացիր եւ սրբեսցիս:

14. Եւ էջ Նեեման` եւ մկրտեցաւ ի Յորդանան եւթն անգամ ըստ բանին Եղիսէի. եւ դարձաւ մարմին նորա իբրեւ զմարմին մանկան մատաղոյ` եւ սրբեցաւ:

15. Եւ դարձաւ առ Եղիսեէ, ինքն եւ ամենայն բանակն իւր, եւ եկն եկաց առաջի նորա` եւ ասէ. Ահա գիտացի թէ ոչ գոյ Աստուած յամենայն երկրի` բայց միայն ի մէջ Իսրայէլի. եւ արդ` առ աւրհնութիւն ի ծառայէ քումմէ:

16. Եւ ասէ Եղիսեէ. Կենդանի է Տէր որոյ կացի առաջի նորա, եթէ առից ինչ: եւ ստիպեաց զնա առնուլ. եւ ոչ հաւանեցաւ:

17. Եւ ասէ Նեեման. Իսկ որովհետեւ ոչ` տացին ծառայի քում բեռինք զուգից ջորւոց ի հողոյ երկրիս. զի ոչ եւս արասցէ ծառայ քո ողջակէզս եւ զոհս աստուածոց աւտարաց, բայց միայն Տեառն

18. վասն բանիս այսորիկ. եւ քաւեսցէ Տէր զծառայ քո` ի մտանել տեառն իմոյ ի տուն Ռեմանայ երկիր պագանել նմա. յորժամ յենուցու ի ձեռս իմ, եւ երկիր պագանիցեմ ի տան Ռեմանայ` ի պագանելն նորա երկիր ի տան Ռեմանայ: եւ քաւեսցէ Տէր զծառայ քո վասն բանին այնորիկ:

19. Եւ ասէ Եղիսեէ ցՆեեման. Երթ խաղաղութեամբ: եւ գնաց ի նմանէ յերկրէն Իսրայէլի:
20. Եւ ասէ Գեեզի պատանեակն Եղիսէի. Ահա խնայեաց Տէր իմ ի Նեեման ասորի, չառնուլ ի ձեռանէ նորա յորոց մատոյցն. կենդանի է Տէր` եթէ ոչ ընթացայց զհետ նորա, եւ առից ինչ անտի:

21. եւ պնդեցաւ Գեեզի զհետ Նեեմանայ: Եւ ետես զնա Նեեման` ընթացեալ զհետ նորա. եւ դարձաւ ի կառացն ընդառաջ նորա եւ ասէ. Ողջո՞յն է:

22. Եւ ասէ Գեեզի. Ողջոյն է. տէր իմ առաքեաց զիս առ քեզ եւ ասէ, ահա եկին առ իս երկու պատանեակք ի լեռնէն Եփրեմի յորդւոցն մարգարէից, տուր նոցա տաղանտ մի արծաթոյ, եւ երկուս պատմուճանս հանդերձեալս:

23. Եւ ասէ Նեեման. թէ Այդպէս իցէ, առ երիս տաղանտս արծաթոյ. եւ բռնադատեաց զնա, եւ ծրարեաց երիս տաղանտս արծաթոյ յերկուս պարկս, եւ երկուս պատմուճանս հանդերձեալս. եւ ետ ցերկուս ծառայս իւր` եւ բարձին առաջի նորա.

24. եւ եկին ի մթինն, եւ առ ի ձեռաց նոցա, եւ եդ ի տան. եւ արձակեաց զարսն` եւ գնացին:

25. եւ ինքն եմուտ եւ կայր առաջի տեառն իւրոյ: Եւ ասէ ցնա Եղիսեէ. Ուստի՞ գաս Գեեզի: եւ ասէ Գեեզի. Չիք երթալ ծառայի քոյ` ոչ յայսկոյս եւ ոչ յայնկոյս:

26. Եւ ասէ ցնա Եղիսեէ. Ո՞չ սիրտ իմ գնաց յորժամ դարձաւ այրն ի կառաց անտի ընդ առաջ քո. եւ արդ` առեր զարծաթն եւ զհանդերձսն ի ձիթենիս եւ յայգիս, եւ յարջառս եւ յոչխարս, եւ ի ծառայս եւ յաղախնայս:

27. Եւ բորոտութիւնն Նեեմանայ յարեսցի ի քեզ` եւ ի զաւակ քո յաւիտեան: եւ ել յերեսաց նորա բորոտեալ իբրեւ զձիւն: