Գլուխ 6

   
1. Եւ Երիքով փակեալ եւ ամրացեալ էր յերեսաց որդւոցն Իսրայէղի, եւ ոչ ոք ելանէր ի նմանէ, եւ ոչ մտանէր:

2. Եւ ասէ Տէր ցՅեսու. ահա ես տամ ի ձեռս քո զԵրիքով` եւ զթագաւորն նորա որ ի նմա, եւ զաւրաւորս զաւրութեամբ:

3. Բայց դու` ած պատեա զնովաւ զամենայն մարտիկս շուրջանակի յովբելաւն, ի լսել ձեզ զձայն եղջեւր փողոյ: եւ եղիցի իբրեւ հարկանիցէք զփողն` պատեսջիք զքաղաքն ամենայն արք պատերազմի շուրջ զքաղաքաւն մի անգամ: այսպէս առնիցէք զվեց աւր:

4. եւ եւթն քահանայ առցեն զեւթ փողսն եղջեւրեաց յոբելեան առաջի տապանակին: Եւ յաւուրն եւթներրորդի պատեսջիք զքաղաքն եւթն անգամ. եւ քահանայքն հարցեն զփողսն եղջեւրեայս.

5. եւ աղաղակեսցեն առհասարակ ամենայն ժողովուրդն. եւ յաղաղակելն նոցա կործանեսցի ինքնին պարիսպ քաղաքին ի ներքոյ նոցա. եւ մտցէ ամենայն ժողովուրդն դիմեա իւրաքանչիւր հանդէպ երեսաց իւրոց ի քաղաքն:

6. Եւ եմուտ որդի Նաւեա Յեսու առ քահանայսն` եւ ասէ ցնոսա. Առէք զտապանակ ուխտին, եւթն քահանայ` առցեն եւթն փող եղջեւրեաց յոբելեան առաջի տապանակին Տեառն:

7. եւ խաւսեցաւ ընդ նոսա եւ ասէ. պատուէր տուք ժողովրդեանդ անցանել պատել զքաղաքն. եւ մարտիկք երթիցեն վառեալք առաջի տապանակին Տեառն:

8. Եւ եղեւ իբրեւ պատուիրեաց ժողովրդեանն ¡. եւ եւթանեքին քահանայքն որ ունիցին եւթն փողս նուիրականս, անցանեն նոյնպէս առաջի Տեառն` եւ ազդեսցեն ուժգին. եւ տապանակ ուխտին Տեառն երթիցէ զհետ նոցա.

9. եւ մարտիկք երթիցեն առաջի, եւ քահանայքն` եւ որ հանիցեն զփողսն եղջեւրեայս, վերջապահք զկնի տապանակի ուխտին Տեառն, հարկանելով զփողսն եղջեւրայս երթիցեն:

10. Եւ ժողովրդեանն պատուէր ետ Յեսու եւ ասէ. մի աղաղակիցէք, եւ մի ոք լուիցէ զբարբառն ձեր, եւ մի ելցէ բան ի բերանոյ ձերմէ, մինչչեւ յաւրն յորում ինքն ազդ արասցէ աղաղակելոյ, եւ ապա աղաղակեսջիք:

11. Եւ շուրջ եկեալ տապանակի ուխտին Տեառն զքաղաքաւն, գնաց անդրէն ի բանակն` եւ անդ ագաւ:

12. Եւ յաւուրն երկրորդի յարեաւ Յեսու ընդ առաւաւտն. եւ բարձին քահանայքն զտապանակն Տեառն:

13. Եւ եւթն քահանայքն առին զեւթն փողս նուիրականս, եւ երթային առաջի Տեառն. եւ քահանայքն հարին զփողսն. եւ այլ եւս ամբոխն ամենայն: եւ գնացին դարձեալ ի բանակն: եւ ապա մտանէին մարտիքն, եւ այլ եւս ամբոխն զկնի տապանակի ուխտին Տեառն: Երթային եւ հարկանէին զփողսն եղջեւրեայս:

14. եւ պատեցին զքաղաքն յաւուրն երկրորդի միանգամ ի մաւտոյ: եւ գնացին դարձեալ անդրէն ի բանակն: Այնպէս արարին զվեց աւր:

15. Եւ եղեւ յաւուրն եւթներորդի, յարեան ընդ ելս առաւաւտուն եւ պատեցին զքաղաքն ըստ նմին աւրինակի եւթն անգամ:

16. եւ եղեւ յեւթներորդ նուագի պատելոյն, հարին քահանայքն զփողսն. եւ ասէ Յեսու ցորդիսն Իսրայէղի. Արդ աղաղակեցէք, քանզի մատնեաց մեզ Տէր զքաղաքն:

17. Եւ եղիցի քաղաքն նզովեալ, ինքն եւ ամենայն ինչ որ ի նմա իցէ Տէր զաւրութեանց: բայց զՌաաբ պոռնիկ ապրեցուսջիք, զնա եւ զամենայն ինչ որ իցէ ի տան նմա, զի թագոյց զհրեշտակսն զոր արձակեցաք:

18. Այլ դուք զգուշ լինիջիք ի նզովիցն. գուցէ ցանկացեալք առնուցուք ինչ դուք ի նզովից անդի. եւ առնիցէ զբանակ որդւոցն Իսրայէղի ի նզովս, եւ ջնջիցէք զմեզ:

19. Ամենայն արծաթ եւ ոսկի եւ պղինձ եւ երկաթ եղիցի սուրբ Տեառն, ի գանձ Տեառն մտցէ:

20. Եւ աղաղակեաց ժողովուրդն, եւ հարին քահանայքն զփողսն. իբրեւ լուաւ ժողովուրդն զձայն փողոյն` աղաղակեաց ամենայն ժողովուրդն առ հասարակ մեծ եւ յուժգին աղաղակաւ: եւ անկաւ պարիսպն շուրջանակի. եւ ել իւրաքանչիւր հանդէպ իւր. եւ առին զքաղաքն.

21. եւ նզովեցին զնա, եւ որ ինչ էր ի քաղաքին յառնէ մինչչեւ ցկին, եւ յերիտասարդէ մինչչեւ ցծեր, եւ յարջառոյ մինչչեւ ցոչխար, եւ յէշ, արկին ի բերան սրոյ:

22. Եւ ցերկուս երիտասարդսն որ լրտեսեցին զերկիրն` ասէ Յեսու. մտէք ի տուն կնոջն պոռնկի, եւ հանէք զնա անտի, եւ զամենայն ինչ որ նորա իցէ` որպէս եւ երդուայք նմա:

23. Եւ մտին երկոքին երիտասարդքն որոց լրտեսեալ էր զքաղաքն` ի տուն կնոջն, եւ հանին զՌաաբ պոռնիկ, եւ զհայր նորա եւ զմայր նորա. եւ զեղբարս նորա, եւ զամենայն ինչ որ նորա էր, եւ զամենայն ազգատոհմ նորա. եւ կացուցին զնա արտաքոյ բանակին Իսրայէղի:

24. Եւ քաղաքն այրեցաւ հրով ամենայնիւ որ ինչ ի նմա էր. բայց ոսկւոյ եւ արծաթւոյ եւ պղնձւոյ եւ յերկաթւոյ, զոր ետուն ի գանձ Տեառն մուծանել:

25. Եւ զՌաաբ պոռնիկ, եւ զտուն նորա զհայրենի, եւ զամենայն ինչ որ նորա էր ապրեցոյց Յեսու. եւ բնակեցաւ ի մէջ Իսրայէղի մինչչեւ ցայսաւր ժամանակի. վասն զի թագոյց զլրտեսն զոր առաքեաց Յեսու լրտեսել զԵրիքով:

26. Եւ նզուեաց Յեսու յաւուր յայնմիկ առաջի Տեառն` եւ ասէ. անիծեալ լիցի մարդն, որ կանկնեսցէ եւ շինեսցէ զքաղաքն զԵրեքով. անդրանկաւ իւրով դնել զհիմն նորա, եւ կրտսերով իւրով կանկնեսցէ զդրունս նորա: Եւ այնպէս արար զան Բեթէլացի, Աբիւրովնաւ անդրանկաւ իւրով եդ զհիմունս նորա, եւ զերծելով կրտսերովն կանկնեաց զդրունս նորա:

27. Եւ էր Տէր ընդ Յեսուայ, եւ էր անուն նորա ընդ ամենայն երկիր: