Գլուխ 3

   
1․ Եւ թագաւորն Դարեհ արար խրախութիւն մեծ. եւ ժողովեաց զամենայն իշխանս իւր, եւ զընտոծինս իւր, եւ զամենայն մեծամեծս մարաց, պարսից, քաղդեացւոց:

2․ եւ զամենայն նախարարս եւ զզաւրագլուխս, եւ զետեղակալս ընդ նոսա ի կողմանցն հնդկաց, մինչչեւ ի կողմանս եթւովպացւոց. եւ էին նախարարք հարիւր քսանեւեւթն:

3․ եւ կերան եւ արբին, եւ յագեցան, եւ ուրախ եղեն: Եւ յորժամ վախճան եղեւ` Դարեհ թագաւոր եմուտ ի սենեակ իւր. եւ ելեալ ի գահոյս իւր ի քուն եղեւ:

4․ Յայնժամ երեք պատանիք որ էին սենեկապանք նորա. եւ մինչդեռ ի քուն կայր թագաւորն, նոքա ի ներքս ի սենեկի սպաս կալեալ եւ պահ ունէին նմա: Խաւսել սկսան ընդ միմեանս եւ ասեն.

5․ Եկայք` իւրաքանչիւր ասասցուք բան մի, եւ որ ասասցէ իմաստուն եւ առաւել զաւրաւոր քան զընկերս իւր` տացէ նմա Դարեհ թագաւոր պարգեւս մեծամեծս. եւ մեծ եւ անուանի երեւեսցի քան զամենեսեան.

6․ եւ ծիրանիս զգեցուսցէ նմա, եւ ոսկի սպասուք արբցէ եւ կերիցէ, եւ ի վերայ ոսկեղինաց նստցի, եւ ննջեսցէ. եւ վարեսցէ երիվարս ոսկեսանձս. եւ խոյր բեհեզեայ թագ կապեսցէ նմա, եւ մանեակ ոսկի ի պարանոցի նորա:

7․ եւ երկրորդ յաթոռն Դարեհի նստցի վասն իմաստութեան իւրոյ, եւ ազգական Դարեհի անուանեսցի:

8․ Եւ յայնժամ իւրաքանչիւր գրեալ զիւր բան, կնքեցին եւ եդին ընդ սնարս Դարեհի արքայի:

9․ եւ ասեն. Յորժամ յարիցէ` տացուք ցնա զգիրդ. եւ ընտրեսցէ թագաւորն, եւ երեք մեծամեծք իշխանք պարսից. եւ որոյ գտցի բան իմաստնագոյն` նմա տացէ զյաղթողական պարգեւն:

10․ Եւ գրեաց առաջինն, ասէ. Յաղթաւղ եւ զաւրաւոր է քան զամենայն գինի:

11․ Եւ գրեաց երկրորդն, եւ ասէ. Յաղթաւղ եւ զաւրաւոր քան զամենայն թագաւոր:

12․ Եւ երրորդն գրեաց, եւ ասէ. Յաղթաւղ եւ զաւրաւոր են քան զամենայն կանայք, եւ քան զամենայն յաղթէ ճշմարտութիւն:

13․ Եւ յորժամ զարթեաւ թագաւորն, առեալ զգիրն զոր ետուն ցնա, կարդաց:

14․ եւ առաքեալ կոչեաց զամենայն մեծամեծս պարսից եւ մարաց, եւ զնախարարս, եւ զսպարապետս, եւ զտեղակալս, եւ զիշխանս:

15․ Եւ նստեալ ի տեղւոջ յայգորիլի. եւ կարդացին զգիրն առաջի ամենեցուն:

16․ Եւ ասէ թագաւորն. Կոչեցէք այսր զպատանիսն, եւ նոքա մեկնեսցեն զբանս իւրեանց: եւ կոչեալ մտին առաջի.

17․ եւ ասեն ցնոսա ամենեքեան. Պատմեցէք մեզ զգրեալսդ: Եւ սկսաւ ասել առաջինն, որ ասաց վասն զաւրութեան գինւոյ:

18․ եւ ասէ այսպէս. Ո արք. զիա՞րդ ոչ է զաւրաւորգինի. զի ամենայն մարդիկ որ ըմպեն զնա` յիմարեցուցանէ զմիտսն.

19․ եւ զթագաւորաց եւ զտառապելոց` մի միտս առնէ. նոյնպէս զտեառն եւ զծառայի, զմեծատանց եւ զաղքատաց:

20․ եւ զամենեցուն միտս դարձուցանէ, եւ շրջէ յուրախութիւն. եւ ոչ երբէք յիշեն զտրտմութիւն եւ զախտս ինչ:

21․ Քանզի զամենեցուն սիրտ` լնու զուարթութեամբ եւ մեծութեամբ:

22․ եւ ոչ յիշէ զթագաւորս կամ զիշխանս. եւ տայ խաւսել զմեծամեծս: եւ յորժամ ըմպէ, ոչ յիշէ զսիրելիս եւ զեղբարս, եւ զթշնամիս. եւ բազում անգամ հանեալ սուր:

23․ եւ յորժամ թափի գինին` ոչ յիշէ զինչ գործեաց:

24․ Ով արք` զիա՞րդ ոչ է զաւրաւոր գինի, որ զայս ամենայն բռնադատէ գործել: Եւ ասացեալ զայս ամենայն լռեաց: