1․ Եւ յարուցեալ Եզր ի սրահէ տաճարին Տեառն, չոգաւ ի տունն Յովհաննայ Եղիսաբեանց.
2․ եւ անդ ագաւ. հաց ոչ ճաշակեաց, եւ ջուր ոչ արբ, եւ ողբացեալ ի վերայ անաւրէնութեանցն, եւ մեծամեծ մեղաց բազմութեանն:
3․ Եւ քարոզ կարդաց յամենայն Հրէաստան` եւ յԵրուսաղէմ, թէ ամենեքեան. որ ելեալ էին ի գերութենէն, եկեսցեն եւ ժողովեսցին յԵրուսաղէմ:
4․ եւ զհետ երկուց եւ երից աւուրց որք ոչ ժամանեսցեն անդր` դատեալք յառաջնորդացն եւ ի ծերոցն, յափշտակեսցեն զստացուածս նոցա, եւ նոքա աւտարացեալ արտաքս ելցեն քան զբազմութիւն ժողովրդոց գերութեանն:
5․ Եւ ժողովեցան ամենեքեան որ էին յազգէն Յուդայ եւ Բենիամինի մինչչեւ ցերիս աւուրս յԵրուսաղէմ, յամսեանն իններորդի` ի քսաներորդ աւուր ամսոյն:
6․ եւ նստան ընդ նմա ամենայն բազմութիւնն` յընդարձակութեան սրահի տանն Տեառն. եւ սարսռացեալք դողային վասն ցրտութեան ձմերանոյն:
7․ Եւ յարուցեալ Եզր` ասէ ցնոսա. Դուք էք որ մեղայք` եւ արարէք կանայս ի դստերաց այլազգեաց, եւ յաւելէք զանաւրէնութիւն ի վերայ Իսրայէլի:
8․ եւ արդ` տուք զխոստովանութիւն եւ զփառս տեառն Աստուծոյ հարցն մերոց.
9․ եւ արարէք զկամս նորա, եւ զատեալ որոշեցայք յամենայն հեթանոսաց երկրի, եւ ի կանանց այլազգեաց զորս արարէք:
10․ Եւ միաբանեալ ամենայն բազմութիւնն` աղաղակեցին մեծաձայն` եւ ասեն.
Այդպէս արասցուք որպէս ասացերդ:
11․ այլ վասն զի ժամանակս ձմեռն է, եւ մեք բազմութիւն յոյժ, եւ ոչ կարեմք այսպէս ժուժեալ վշտաց նեղութեանս. եւ գործս ոչ թէ զմի աւր է` կամ զերկուս, վասն զի յոյժ սաստիկ մեղաք յիրսս յայս:
12․ Արդ` կացցեն իշխանք եւ առաջնորդք ի վերայ բազմութեանս, եւ ամենայն ուրուք որոյ իցէ ի տուն իւր կին այլազգի,
13․ երթեալ պահանջեսցեն ի նմանէ ժամանակս. եւ իւրաքանչիւր տեղեացն կացցեն ծերք եւ դատաւորք, եւ լուծեալ քաւեսցեն ի մէնջ զբարկութիւն Տեառն. զմեծամեծ չարեացս այսոցիկ զոր գործեցաք:
14․ Յովնաթան Ազայելեանց, եւ Եզեկիա Թովկեանց` ընկալան յանձին առնել զայս. եւ Մոսողամոս` եւ Ղեւի` եւ Սաբատէոս, որք միաբանեցին ընդ նոսա.
15․ եւ արարին ըստ ամենայնի որպէս հրամայեցին որք ելեալ էին ի գերութենէն:
16․ Եւ ընտրեաց Եզր արս քահանայս իշխանս եւ հայրապետս ըստ անուանց իւրեանց. եւ նստան յամսամտին` յամսեանն տասներորդի, զի վճարեսցին իրքն:
17․ եւ ժողովեալ ածին զարսն եւ զկանայս, որք ունէին զայլազգիսն` մինչչեւ յամիսն առաջներորդ:
18․ Եւ գտան ի քահանայիցն որ ժողովեալ էին, որք ունէին զկանայս այլազգեացն, եւ էին խառնակեալ ընդ ամպարշտութիւնսն:
19․ Յորդւոցն Յեսովայ Յովսեդեկեանց եւ եղբաւրն նորա` Մաթեղա, եւ Եղիազարոս, եւ Յորիբոս, եւ Յովադան.
20․ եւ սկսան հանել զկանայս իւրեանց զայլազգիս. եւ մատուցին իւրաքանչիւր խոյս` վասն թողութեան մեղացն անգիտութեան:
21․ Եւ յորդւոցն Էմմովրայ` Անանիա, եւ Բադդէոս, եւ Մանաս, եւ Սամաէաս, եւ Յերիէլ, եւ Ազարիաս:
22․ Եւ յորդւոցն Փասուր` Եղիանաս, եւ Մասսիաս, Իսմայէլ, եւ Նաթանայէլ, եւ Սկէթղեդոս, եւ Սաղթոս:
23․ Եւ յորդւոցն ղեւտացւոց Յոզապտոս, եւ Սեմիս, եւ Կոնոս, այս ինքն է Սաղիտաս, եւ Փաթէաս, որ եւ Յուդաս, եւ Յովնաս:
24․ Ի սաղմոսասաց պաշտաւնէիցն, Եղիասիբոս, Բաքուրոս:
25․ ի դռնապանացն, Սաղոիմոս, եւ Տողբանէս:
26․ Եւ յԻսրայէլէ. յորդւոցն Փորոսայ` Յերամաս, եւ Յեդդիաս, եւ Մեղքիաս, եւ Միաղէս, եւ Եղիազարոս, եւ Ասաբիաս, եւ Բանեաս:
27․ Եւ յորդւոցն Եղիակիմ` Մատթանիաս, Զաքարիաս, Յեզորիէլ, Յովադիոս, Յերիմովթ, եւ Այէդիաս:
28․ Եւ յորդւոցն Զաթոմ, Եղիադաս, Եղիասիմոս, Ոթոնիաս, Արիմովթ, եւ Սաբաթոս, եւ Զարդէաս:
29․ Եւ յորդւոցն Բեբեա` Յովաննէս, եւ Անանիաս, եւ Յովզաբդոս, եւ Եմաթոս:
30․ Եւ յորդւոցն Մանի` եւ Ղամոս, Սամումոս, Յեդէոս, Յասուբոս, Յասաելոս, եւ Յերեմովթ:
31․ Եւ յորդւոցն Ադդի` Նաթոս, եւ Մոոսիաս, Ղակունոս, Նաիդաս, Մատաթիաս, եւ Եսթէլ, եւ Բաղունոս, եւ Մանասէ: 32 Եւ յորդւոցն Աննաս` Եղիովնաս, եւ Ասսէաս, եւ Մեղքիաս, եւ Սաբէոս, եւ Սիմոն, եւ Քոսամէոս:
33․ Եւ յորդւոցն Ասոմատ` Աննէոս, եւ Մատաթիաս, եւ Բանէուս, եւ Եղիփաղատ, եւ Մանասէ, եւ Սեմէի:
34․ Եւ յորդւոցն Բաանի` Երեմիաս, եւ Մոմդիոս, Իսմաերոս, եւ Յուէլ, Մամբդէ, եւ Պէդիաս, եւ Անոս, Րաբասիոն, եւ Անասիբոս, եւ Մամնիտանեմոս, Եղիասիս, Բանուս, Եղիաղի, Սոմէիա, Սեղեմիաս, Նաթանիաս: Եւ յորդւոցն Եզովրայ` Այէմ, Եզրիէլ, Ազայէլ, Սամատոս, Զամբրի, Յովսէփ:
35․ Եւ յորդւոցն Նաումայ` Զազիկեաս, Զաբադիաս, Եդեսիուէլ, Բենեսիաս:
36․ Այսք ամենեքեան էին որոց առեալ էր զկանայս այլազգեացն. եւ արձակեցին ի բաց զկանայս իւրեանց եւ զորդիս իւրեանց:
37․ Եւ բնակեցին քահանայքն եւ ղեւտացիք, եւ յԻսրայէլէ` յԵրուսաղէմ, եւ ի գաւառին. յամսամտին յամսեանն հինգերորդի: եւ որդիքն Իսրայէլի բնակեցին ի բնակութիւնս իւրեանց:
38․ Եւ ժողովեցան ամենայն բազմութիւնն միաբան, յընդարձակ տեղի կողմանն արեւելից, առաջի դրան տաճարին:
39․ եւ ասացին ցԵզր քահանայապետ եւ պատմիչ աւրինացն, զի բերցէ զաւրէնսն Մովսիսի, զտուեալսն ի տեառնէ Աստուծոյ Իսրայէլի:
40․ եւ եբեր ի մէջ Եզր զաւրէնսն առաջի ամենայն արանց եւ կանանց, եւ առաջի ամենայն քահանայիցն: Եւ լուան զաւրէնսն Տեառն յամսամտին եւթներորդ ամսեանն:
41․ Եւ կարդայրյառաջնում դրան տաճարին յընդարձակին, յառաւաւտէ մինչչեւ ցաւր հասարակ առաջի ամենայն արանց եւ կանանց, եւ լսէին եւ ի միտ առնուին ամենայն բազմութիւնն զաւրէնսն տեառն Աստուծոյ:
42․ Եւ կայր Եզր քահանայ եւ պատմիչ աւրինացն Տեառն ի վերայ փայտեղէն բեմի, զոր կազմեալ էր:
43․ եւ կային մաւտ առ նմա յաջմէ կողմանէ` Մատաթի, Սամուս, Անանիաս, Ազարիաս, Ուրիաս, Եզէկիաս, Բաաղսամոս:
44․ եւ յահեկէ կողմանէ` Փաղթէոս, Միսայէլ, Մեղքիաս, Ղովթաս, Ուբոս, Նաբարիաս, Զաքարիաս:
45․ Եւ առեալ ի ձեռն Եզրի զգիրս աւրինացն. քանզի նստէր մեծաւ փառաւք առաջի ամենեցուն. եւ ամենայն բազմութիւնն նստէին առաջի նորա:
46․ Եւ յորժամ եբաց զգիրս աւրինացն` յոտն կացին ամենայն բազմութիւնն. եւ աւրհնեաց Եզր զտէր Աստուած բարձրեալ` զԱստուած զՍաբաւովթ եւ զամենակալ:
47․ եւ միաբան ամենայն բազմութիւնն ասէր. Ամէն: եւ ամբարձեալ զձեռս իւրեանց ի վեր` անկանէին յերկիր ի վերայ երեսաց իւրեանց, եւ երկիր պագանէին տեառն Աստուծոյ:
48․ Եւ Յեսուս, եւ Աննուս, եւ Ասրաբիաս, եւ Յադինոս, եւ Յակուբաս, Սաբատէոս, Աւգեաս, Մաննէաս, եւ Կաղիտաս, Ազարիաս, եւ Յոզաբդոս, եւ Անանիաս Փիղաթոս:
49․ Այս էին ղեւտացիքն, որ ուսուցանէին ժողովրդեանն զաւրէնս Տեառն, եւ տային նոցա ի միտ առնուլ. եւ լնուին աւրինաւքն տեառն Աստուծոյ:
50․ Եւ ասէ Ատտարատէս` ցԵզր քահանայ եւ պատմիչ աւրինացն Տեառն եւ ցղեւտացիսն, որք ուսուցանէին զբազմութիւնն:
51․ ասէ ցնոսա առաջի ամենեցուն. Աւրս այս է աւր սրբութեան Տեառն. եւ ամենեքեան են լուծեալք ի լսել աւրինացն Տեառն.
52․ գնացէք եւ երթայք կերայք զպարարտութիւն, եւ արբէք զքաղցրութիւն. եւ առաքեցէք զգիր այնոցիկ որք ոչն ունիցին ինչ.
53․ վասն զի սուրբ է աւրս այս Տեառն, եւ մի տրտմեցուցանէք զսա. քանզի տէր Աստուած է որ փառաւորեաց զմեզ:
54․ Եւ ղեւտացիքն ամենայն հրամայեցին բազմութեանն` եւ ասեն. Աւրս այս սուրբ է` եւ մի տրտմեցուցանէք զսա:
55․ Եւ ասեն ցբազմութիւնն. Որոյ կայցէ` կերիցէ եւ արբցէ` եւ ուրախ լիցի. եւ տացէ այնմիկ որոյ ոչն կայցէ, եւ եղիցին ամենեքեան ուրախ այսաւր յոյժ. վասն զի լցայք եւ ի միտ առէք զբանս աւրինաց Տեառն, յորս դուք ժողովեցայք, եւ մեք ուսուցաք ձեզ: Կատարեցաւ Եզր Առաջին:
Հաղորդում կայքում սխալի վերաբերյալ
Տվյալ հատվածում առկա է սխալ: