1․ Եւ յետ հարուածոցն Աղէքսանդրի կայսեր մակեդոնացւոց որդւոյ Փիլիպպեայ. որ խաղաց գնաց նա յերկրէն Քետիմացւոց, ի ժամանակի զի հարկանէր զԴարեհ արքայ զպարսից եւ զպարթեւաց, եւ որ թագաւորեաց իսկ յետ նորա, ի վերայ Յունաց աշխարհին եւ Հռոմոց:
2․ Եւ զաւրաժողով լինէր մեծաւ պատերազմաւ, զամուրս հարկանէր, զբազում թագաւորս ի սուր սուսերի իւրոյ սատակէր.
3․ առնոյր զաւր բազում ազգաց ազգաց հեթանոսաց. եւ սարսէր երկիրս ամենայն առաջի նորա:
4․ Զաւրաժողով լինէր զաւրաւք բազմաւք, եւ հասանէր ի վերայ երկրի, յամենայն պետութեանցն զաւրութեանց,
5․ եւ զաշխարհս ամենայն ի հարկի կացուցանէր:
6․ Եւ յետ այսր անկանէր ի մահիճս իւր եւ զախտս մահու ջերանէր: Եւ իբրեւ ետես թէ մեռանիմ,
7․ կոչեաց նա զծառայսն դայեկորդիսն իւր, զչորեսին փառաւորեալս ի նմանէ, որ ընդ նմա իսկ սնեալ էին ի մանկութենէ. եւ բաժանեաց եւ ետ նոցա զարքայութիւնն իւր, մինչդեռ ինքն կենդանի էր:
8․ Եւ թագաւորեաց Աղէքսանդրոս ամս երկոտասան` եւ մեռաւ:
9․ Յետ նորա զատեալ հաստատեցան կացին յիւրաքանչիւր տէրութեան դայեկորդիքն իւր,
10․ թագ կապեցին իւրաքանչիւր յետ մահուան նորա. եւ որդիք նոցա յետ նոցա` ամս բազումս. բազմացուցին զանաւրէնութիւնս, եւ լցին զերկիր չարեաւք իւրեանց:
11․ Ի նոցանէ բղխէր արմատ չարի, շառաւիղ դառնութեան անաւրէնն Անտիոք, որդի Անտիոքայ արքայի, որ էր մնացեալ ի պատանդս ի Հռոմ քաղաքի: Եւ թագաւորեաց նա յամին հարիւրորդի երեսներորդի եւթներորդի թագաւորութեանն Յունաց:
12․ Յաւուրս ժամանակացն այնոցիկ, ելին զատան յորդւոցն Իսրայէլի արք անաւրէնք, ի բանս պատիրս` ի բանս հրապուրանաց արկին զբազումս` եւ ասեն. Եկայք` երթիցուք, ուխտ դիցուք եւ դաշինս կռեսցուք` ընդ ամենայն ազգս հեթանոսաց` որ շուրջ զմեւքդ բնակեալ են. զի յաւուրցն ժամանակաց հետէ` յորմէ անջատաք մեկնեցաք մեք ի նոցանէ, չարիք բազումք կարեւորք եկին հասին ի վերայ մեր:
13․ Հաճոյ թուեցաւ բանն ի միտս բազմաց,
14․ յաւժարեցին ոմանք ի ժողովրդենէ անտի երթալ յանդիման լինել թագաւորին: Եւ ետ նոցա իշխանութիւն թագաւորն` գործել զամենայն իրաւունս ըստ աւրինացն հեթանոսաց:
15․ Եւ շինեցին հրապարակս մեհենիցն յԵրուսաղէմ ըստ աւրինացն հեթանոսաց.
16․ եւ հաստատեցին իւրեանց աւրէնս անթլփատութեան, եւ ապստամբ եղեն յուխտէ կտակարանացն սրբութեան. զուգեցան ընդ հեթանոսս, յաւժարեցին կանխեցին առնել զչարիս:
17․ Եւ իբրեւ աջողեցաւ թագաւորութիւնն առաջի Անտիոքայ, եդ ի մտի իւրում նա` թագաւորել եւ ի վերայ երկրին Եգիպտացւոց` միաբանել զերկոսին թագաւորութիւնսն:
18․ Դիմեաց խաղաց գնաց նա ի վերայ երկրին Եգիպտացւոց զաւրաւք բազմաւք` կառաւք եւ փղաւք, եւ նաւուք բազմաւք,
19․ տալ պատերազմ ընդ Պտղոմեայ թագաւորին եգիպտացւոց: Ի պարտութիւն մատնեցաւ Պտղոմէոս յերեսաց նորա, եւ փախստական լինէր առաջի նորա: Յայնմ մարտի բազում վիրաւորք անկանէին:
20․ Ասպատակ սփռէր ընդ աշխարհն ամենայն Անտիոքոս. վաղ հասանէին, արագ արագ զաւարն ժողովէին, եւ առնուին զամուրս ամենայն երկրին Եգիպտացւոց:
21․ Եւ յետ հարուածոց եգիպտացւոցն դարձաւ Անտիոքոս: Յամին հարիւրորդի քառասներորդի երրորդի
22․ եկն եհաս ի վերայ քաղաքին Երուսաղէմացւոց մեծաւ պատերազմաւ:
23․ եւ եկն եմուտ ի սրբութիւն անդր մեծաւ հպարտութեամբ. եւ առ նա զսեղանն ոսկի եւ զաշտանակն լուսոյ, եւ զամենայն կահ գանձին. զսեղանն պատարագաց, զսկիհսն, եւ զտաշտսն, եւ զխնկաղացսն, եւ զվարագոյրսն ամենայն. զպսակսն, եւ զզարդն ոսկի:
24․ Եւ զառաջինն դիմեաց յանդիման տաճարին. կեղեւեաց ձուլեաց զամենայն. եւ առ նա զարծաթն եւ զոսկին, զզէնն եւ զզարդն, եւ զամենայն զկահն պատերազմին. եւ առ նա զգանձս ծածկեալս զոր եգիտ, եւ զամենայն անաւթ ցանկալի. եւ գնաց նա յերկիր իւր:
25․ Եհեղ արիւն բազում, եւ գործեաց մահունս անհամարս. խաւսեցաւ զամբարտաւանութիւն մեծաւ հպարտութեամբ:
26․ Եւ եղեւ սուգ մեծ ի վերայ Իսրայէլի. ընդ ամենայն տեղիս իւրեանց
27․ հեծեցին իշխանք եւ ծերք. կուսանք եւ երիտասարդք տկարացան. եղծաւ գեղ կանանց.
28․ եւ ամենայն փեսայից լի եղեն բերանք ողբոց լալութեան. եւ ամենայն հարսանց եղեն արգելանք սգոյ սրսկապանք իւրեանց.
29․ եւ շարժեցաւ երկիր ի վերայ բնակչաց իւրոց. եւ ամենայն տունն Յակոբայ զգեցաւ զամաւթ զանարգանաց:
30․ Զհետ երկուց ամաց ժամանակացն այնոցիկ, արձակեաց արքայ Անտիոքոս իշխան հարկահան ի քաղաքսն Հրէաստանի, եւ եկն յԵրուսաղէմ զաւրաւք բազմաւք,
31․ խաւսել սկսաւ բանիւք խաղաղութեան նենգութեամբ. եւ նոքա հաւատացին նմա:
32․ Եւ անկաւ նա ի վերայ քաղաքին յանկարծակի, եւ հար զնոսա հարուածս մեծամեծս. եւ սատակեաց ժողովս բազումս յԻսրայէլէ:
33․ Եւ առ նա զաւար քաղաքին, եւ հրձիգ արար զամենայն փայտակերտ զապարանից նորա. քակեաց եւ աւերեաց շուրջ զպարիսպս քաղաքին, եւ զամենայն զորմս շինուածոց զապարանից նորա:
34․ Ի գերութիւն վարեցին զկանայս եւ զմանկունս, եւ զամենայն անասունս նոցա ի ժառանգութիւն իւրեանց:
35․ Եւ շինեցին զամրակողմնն զգլուխ քաղաքին ի պարիսպս ամուր, յաշտարակս հզաւրաց. եւ եղեւ նոցա այն իբրեւ բերդ ի բերդի ամրացեալ քաղաքին:
36․ եւ անդր մուծին ազգ մեղաւոր զարս անաւրէնս, ամրացուցին լցին զինու. հանդերձեցին լցին համբարաւք, եւ զամենայն զաւրն Երուսաղէմի
37․ ի ներքս կուտեցին. եւ եղեն յորոգայթ մեծ,
38․ եւ ի խափան սրբութեանն եւ ի սատանայ չար տանն Իսրայէլի հանապազորդ:
39․ եւ հեղին զարիւն զարդար շուրջ զսրբութեամբն, եւ պղծեցին զսրբութիւնսն:
40․ Փախստեայ գնացին այնուհետեւ բնակիչքն Երուսաղէմի վասն նոցա. եւ եղեւ նա բնակութիւն աւտարաց, եւ ինքն աւտարացաւ ի զաւակէ յիւրոց ծննդոց. զի որդիք նորա թողին զնա.
41․ եւ սրբութիւն նորա աւերեցաւ եւ եղեւ յանապատ: Դարձան տաւնք տարեկանաց նորա ի սուգ, եւ շաբաթք նորա յամաւթ նախատանաց. պատիւ նորա անարգեցաւ,
42․ եւ փառք նորա լցան անարգանաւք. եւ բարձրութիւն նորա ի սուգ կործանեցաւ:
43․ Ընդ ամենայն աշխարհս հրովարտակք արձակեցան, զի թողցեն ամենայն բնակիչք երկրի զաւրէնս իւրաքանչիւր, եւ ի մի աւրէնս նորա կացցեն:
44․ Յանձն առին ազգք ամենայն, ըստ հրամանին արքունի:
45․ եւ բազումք եւս յիսրայէլացւոց անտի դարձան ի պաշտաւնն անաւրէնութեան, եւ զոհեցին կռոց նոցա եւ պղծեցին զշաբաթս իւրեանց:
46․ Հրեշտակս արձակեաց թագաւորն հրովարտակաւք հանդերձ յԵրուսաղէմ, ի քաղաքսն Հրէաստանի` դարձուցանել զնոսա յաւրէնս աւտարոտիս.
47․ եւ խափան առնել ողջակիզացն պատարագաց, եւ զոհիցն սրբութեան.
48․ պղծել զշաբաթս` եւ զտաւնս տարեկանաց.
49․ եւ ապականել զսրբութիւնն. եւ նուիրեալ
50․ սեղանս կանգնել. երեւեցուցանել անդս մեհենից, յազել զխոզս, եւ խառնակ զանասունս.
51․ եւ թողուլ զորդիս նոցա անթլփատս. պղծել զանձինս նոցա յամենայն պղծութիւն անաւրէնութեան. զի մոռասցին ամենեւին զաւրէնս, եւ փոխեսցեն զիրաւունս:
52․ Եւ որ ոչ կացցէ ի հրամանի թագաւորին, մահու մեռցի:
53․ Ըստ ամենայն բանի զոր գրեաց թագաւորն` արար ոստիկանս ըստ ամենայն տեղիս:
54․ եւ պատուէր ետ քաղաքացն Հրէաստանի մատուցանել զոհս քաղաքի քաղաքի:
55․ Եւ ժողովեցան առ նոսա այր ամենայն, որ ապստամբ լեալ էր յաւրինաց անտի, եւ լցին չարեաւք զերկիրն.
56․ եւ արարին ամրախիտ զԻսրայէլ յամենայն տեղիս ամրութեան ապաստանաց նոցա:
57․ Յամին հարիւրորդի քառասներորդի հինգերորդի, ամսեանն որ աւր քսան եւ հինգ էր ամսոյն. շինեաց նա պատկեր պղծութեան անապատի ի վերայ սեղանոյն.
58․ ընդ ամենայն Հրէաստան շուրջ զքաղաքաւք շինեցին մեհեանս, եւ ի վերայ ամենայն դրանց ապարանիցն, եւ ընդ ամենայն գնացս քաղաքացն` խունկս արկանէին:
59․ Եւ զգիրս ամենայն կտակարանացն զոր գտանէին, պատառէին եւ հուրբ կիզուին:
60․ եւ ուր առ ումեք գտանէին գիրք կտակարանաց, կամ թէ ոք ուրեք ընդ աւրէնս հաւասար էր, հրաման թագաւորին զնա մահու սպանանէր:
61․ Եւ այդպէս սաստկացեալ էր հրամանն ի վերայ իսրայէլացւոց, առնել նոցա զոր գտանէին ամսոյ ամսոյ ի մէջ քաղաքացն:
62․ Եւ ըստ քսան եւ հինգ եւ քսան եւ հինգ ամսոյ զոհս ի բագինս բագինս մատուցանէին, որ է ի վերայ սեղանոյն:
63․ Եւ զկանայսն որոց զմանկունսն իւրեանց թլփատեալ էր` սպանանէին ըստ հրամանին.
64․ եւ զմանկունսն զպարանոցէ մարցն կախէին ըստ հրամանին արքունի, եւ զթլփատիչսն եւ զորդիս նոցա ըստ նմին աւրինակի:
65․ Եւ բազումք յերուսաղէմացւոցն հաստատեցան պնդեցին զանձինս իւրեանց` զի մի կերիցեն ի պղծութենէ անտի. յանձն առին յաւժարութեամբ մեռանել, եւ ոչ պղծել զանձինս իւրեանց ի խառնակ կերակրոյ անտի.
66․ զի մի սուրբ կտակարանքն պղծիցին: Եւ մեռան բազումք ի նոցանէ:
67․ եւ եղեւ տաւն ուրախութեան ի վերայ Իսրայէլի մեծ յոյժ:
Հաղորդում կայքում սխալի վերաբերյալ
Տվյալ հատվածում առկա է սխալ: