Գլուխ 14

   
1․ Եւ իբրեւ դադարեաց Տուբիթ յաւրհնութենէս յայսմանէ:

2․ եւ էր ինքն ամաց յիսուն եւ ութ` յորժամ կացին աչք նորա, եւ յետ ամաց ութից` բացան միւսանգամ աչք նորա:

3․ եւ առնէր նա ողորմութիւնս. եւ յաւել եւս երկնչել ի տեառնէ Աստուծոյ, եւ խոստովան լինել նմա:

4․ Եւ ծերացաւ նա յոյժ:

5․ Կոչեաց նա զորդին իւր, եւ զորդի որդւոյն իւրոյ` եւ ասէ ցնա. Որդեակ` առ դու զորդիս քո, զի ահաւասիկ ես ծերացեալ եմ եւ մերձ եմ ի մեռանել: արդ երթ դու յերկիրն Մարաց որդեակ իմ.

6․ զի հաւատամ ես, որպէս եւ խաւսեցաւ Յունան մարգարէ վասն Նինուէի եթէ կործանեսցի, եւ յերկիրն Մարաց եղիցի խաղաղութիւն մինչչեւ ի ժամանակ մի: Զի եղբարք մեր ցրուեսցին ի բարի երկրէս, եւ Երուսաղէմ եղիցի աւերակ եւ անապատ, եւ տունն Աստուծոյ ի նմին հրձիգ լիցի, եւ յաւեր լիցի մինչչեւ ի ժամանակս:

7․ Եւ դարձեալ ողորմեսցի նոցա Աստուած. եւ դարձուսցէ զնոսա անդրէն յերկիրն, եւ շինեսցեն նոքա զտունն. ոչ եթէ ըստ աւրինակի առաջնոյն` մինչչեւ լցցին ժամանակք յաւիտենից: եւ յետ այսորիկ դարձցին ի գերութենէ աստի, եւ շինեսցեն զԵրուսաղէմ փառաւք` եւ մեծաւ պատուով եւ տաճարն Աստուծոյ ի նմին շինեսցի յամենայն ազգս յաւիտենից, շինուածս փառաւորս որպէս եւ խաւսեցան զնմանէ մարգարէքն:

8․ Եւ ամենայն հեթանոսք դարձցին ճշմարտութեամբ երկնչել ի տեառնէ Աստուծոյ. եւ կործանեսցեն եւ ի բաց մերժեսցեն զկուռս իւրեանց.

9․ եւ աւրհնեսցեն ամենայն հեթանոսք զՏէր, եւ ժողովուրդն խոստովան լիցի առ Աստուած իւր: Եւ բարձրացուսցէ Տէր զժողովուրդն իւր. եւ ցնծասցեն ամենեքեան ոյք սիրեն զտէր Աստուած ճշմարտութեամբ եւ արդարութեամբ. եւ արասջիք դուք ողորմութիւն հարց ձերոց:

10․ Եւ արդ` որդեակ իմ, գնա դու աստի. զի լինելով լինի զոր ասաց մարգարէն Յունան:

11․ Այլ դու պահեսցես զաւրէնս եւ զհրամանս. եւ լեր դու ողորմած եւ արդար, զի բարի լինիցի քեզ:

12․ եւ թաղեսցես զիս` եւ զմայր քո ընդ իս, եւ մի եւս հանգիցես դու ի Նինուէ: Որդեակ իմ, տես դու որպէս արար Ադամ Աքիաքարայ որ սնոյց զնա, որպէս ի լուսոյ տարաւ զնա ի խաւար, որչափ չար անցոյց ընդ նա: այլ Աքիաքարոս ապրեցաւ, եւ նմա հատուցումն անդրէն հատուցաւ, եւ էջ նա փոխանակ նորա ի խաւարն: եւ Մանասէ արար զողորմութիւնս, եւ ապրեցաւ յաւուր մահու` զոր թաքոյցն նմա. եւ Ադամ անկաւ յորոգայթ` եւ կորեաւ:

13․ Եւ արդ դու որդեակ իմ, տես որպիսի առնէ ողորմութիւն, կամ որպէս փրկէ արդարութիւն: Եւ իբրեւ զայս ասաց, կատարեաց զհոգին ի վերայ մահճացն. զի էր նա ամաց հարիւր եւ յիսուն: եւ թաղեաց զնա որդին իւր լի փառաւք` եւ բարի վախճանաւ:

14․ եւ յորժամ մեռաւ Աննա` թաղեաց եւ զնա առ հաւրն իւրում: Եւ գնաց Տուբիա կնաւ իւրով` եւ որդւովք իւրովք հանդերձ յԵկբատանս Մարաց` առ Հռագուէլ աներ իւր:

15․ Եւ ծերացաւ նա պատուով մեծաւ. եւ թաղեաց նա զաներն իւր` եւ զզոքանչն, փառաւք եւ պատուով. եւ ժառանգեաց զտունն նոցա, եւ զտունն Տուբիթայ հաւրն իւրոյ:

16․ Եւ մեռաւ նա ամաց հարիւր եւ քսան եւ եւթն, յԵկբատանս Մարաց:

17․ եւ մինչչեւ մեռեալ էր նա, լուաւ ինքն զկործանմանէն Նինուէի` զոր գերեաց Նաբուքոդոնոսոր Ասուերոսն: եւ ուրախ եղեւ Տուբիա` մինչչեւ մեռեալ էր նա, ի վերայ Նինուէի. փառս ետ գոհանալով զԱստուծոյ. որում փառք յաւիտեանս յաւիտենից: ամէն: Կատարեցաւ Տովբիթ: