1․ Եւ ել Յովհան ի Գազարայ, եւ եկն պատմեաց Շմաւոնի հաւր իւրում. որպէս եւ գնայր Կենդէբոս:
2․ Եւ կոչեաց Շմաւոն զերկոսին որդիսն զՅուդայ եւ զՅովհան, եւ ասէ ցնոսա. Ես եւ եղբարք իմ եւ տուն հաւր իմոյ` մարտ պատերազմի տուաք ընդ թշնամիսն իսրայէլացւոց, ի մանկութենէ մերմէ մինչչեւ ցայսաւր ժամանակի, եւ աջողեցան գործքն ամենայն ի ձեռս մեր, փրկել զբազումս զազգսդ իսրայէլացւոց:
3․ Բայց արդ ծերացայ, եւ դուք հերիք էք յամս իմ, փոխանակ իմ եւ եղբաւր իմոյ. արդ ելէք մարտերուք ի վերայ ազգիդ մերոյ. եւ զաւրութիւն աւգնութեանց յերկնից եղիցի ընդ ձեզ:
4․ Եւ ընտրեաց նա յաշխարհէ անտի իբրեւ քսան հազար հեծեալ սպառազէն, եւ խաղաց ի վերայ Կենդեբեայ:
5․ Եւ եկին ագան այն աւր ի Մովդիիմ. ընդ առաւաւտն կանխեալ` լինէին դաշտամուխ: Անդ տեսանէին զաւրս բազումս հեծեալս եւ հետեւակս, որ գային ընդդէմ նորա. եւ հեղեղատ մի էր ի մէջ երկոցուն:
6․ Եւ ճակատեցաւ յանդիման նոցա ինքն եւ զաւրքն: Իբրեւ հայեցաւ ետես զզաւրսն թէ դանդաղեցան անցանել ընդ հեղեղատն, յառաջ` ինքն նահատակեցաւ, հապա` զաւրքն միագունդ զկնի փողեցան:
7․ Եւ բաժանեաց յերկուս գունդս զհեծելազաւրն ի մէջ հետեւակացն. եւ էր հեծելազաւրն կարի յոյժ:
8․ Փող հարին` խրախոյս բարձին, ի վերայ յարձակեցան. ի պարտութիւն մատնեցաւ Կենդէբոս. եւ անկաւ ի նոցանէ յաւուր յայնմիկ վիրաւորք բազումք: Եւ որ մնացեալ էին փախստեայ անկանէին յամուրսն:
9․ Յաւուր յայնմիկ խոց մնայր Յուդա. բայց Յովհան զհետ լինէր փախստեայցն, մինչ ածէր արկանէր զնոսա ի կողմանս Կեդրոնայ զոր շինեաց:
10․ Եւ մեկնեցին նոքա ընդ բրգունսն ի կողմանսն Ազովտայ: Եւ հրձիգ արար զնոսա. յայնմ ամրի այրեցան արք ի հրոյ իբրեւ երկու հազար: Եւ ինքն դարձաւ ի կողմանս Հրէաստանի խաղաղութեամբ:
11․ Եւ Պտղոմէոս Աբբուբեանց` էր կացուցեալ ի կողմանցն դաշտին յԵրեքով. եւ ունէր նա արծաթ եւ ոսկի յոյժ.
12․ զի էր նա փեսայ քահանայապետին:
13․ Եւ հպարտացաւ ի սիրտ իւր, մեծամտեաց ի խորհուրդս իւր, եւ կամէր տիրել ի վերայ կողմանցն գաւառին. եւ խորհուրդ խորհէր նենգութեամբ ի վերայ Շմաւոնի եւ որդւոց նորա, ջնջել զնոսա ի միջոյ:
14․ Եւ Շմաւոն շրջէր ի կողմանս գաւառացն. խնամէր եւ տեսանէր զպէտս նոցա. եւ եկն էջ յԵրեքով, ինքն եւ Մատաթի եւ Յուդա` եւ որդիք նորա. յամին հարիւրորդի եւթանասներորդի եւթներորդի, յամսեանն մետասաներորդի` այս ամիս շաբաթ է:
15․ Եւ ընկալաւ զնոսա Պտղոմէոս ի մեծարանս նենգութեամբ ի քաղաքի անդ Դովրայ զոր շինեաց, եւ արար ուրախութիւն կոչնոցն: Անդ` ի դարանի առնէր արս:
16․ Եւ իբրեւ կերան եւ արբին Շմաւոն եւ որդիք իւր, արբեցան. յարեաւ Պտղոմէոս թաքուցելովքն հանդերձ, առին զէնս իւրեանց, եւ մտին ի վերայ Շմաւոնի. եւ սպանին անդէն ի տաճարի անդ զնա եւ զորդիս իւր` եւ զծառայսն որ ընդ նմա էին:
17․ Եւ արարին անաւրէնութիւն մեծ. եւ հատուցին չար փոխանակ ընդ բարւոյ:
18․ Եւ գրեաց Պտղոմէոս առ արքայն զի զաւր ի թիկունս արձակեսցէ նմա, զի ի ձեռս տացէ նոցա զքաղաքսն իւրեանց` եւ զհարկն:
19․ Զկէսն արձակեաց ի կողմն Գազարայ` բառնալ անտի զՅովհաննէս: Եւ գրեաց նա առ զաւրագլուխսն զի եկեսցեն` եւ առցեն ի նմանէ ոսկի եւ արծաթ եւ պարգեւս բազումս:
20․ Եւ այլս արձակեաց յԵրուսաղէմ, զի աճապարեսցեն` հասցեն առցեն զլեառն տաճարին:
21․ Այր մի պնդեցաւ յառաջագոյն ի Գազարա, գոյժ ետ Յովհաննու` թէ կորեաւ հայր նորա եւ եղբարք իւր, եւ զքէն եւս յղեալ է նենգութեամբ զի սպանցէ զքեզ:
22․ Իբրեւ լուաւ` զարմացաւ յոյժ եւ հիմարեցաւ, եւ ըմբռնեաց զարսն զայնս եւ անդէն սպան զնոսա, իբրեւ գիտաց թէ նենգութեամբ եկեալ են կորուսանել զնա:
23․ Եւ այլ ինչ բանք որ իցեն զՅովհաննէ` վասն մարտի պատերազմաց` կամ այլոց քաջութեանց, կամ շինուածոց պարսպաց, կամ գործոցն բարութեան:
24․ Այն ամենայն գրեալ է ի մատեանս քահանայից, յորմէհետէ եկաց նա քահանայապետ զկնի հաւր իւրոյ: Կատարեցաւ Առաջին Մակաբայեցիքն:
Հաղորդում կայքում սխալի վերաբերյալ
Տվյալ հատվածում առկա է սխալ: