Գլուխ 1

   

1. Առած բանի Տեառն ի վերայ Իսրայէլի ի ձեռն հրեշտակի իւրոյ.

2. Դիք ի սիրտս ձեր. սիրեցի զձեզ, ասէ Տէր։ Եւ ասացէք. Ի՞ւ սիրեցեր զմեզ։ Ո՞չ եղբայր էր Եսաւ Յակոբու, ասէ Տէր, եւ սիրեցի զՅակոբ. եւ զԵսաւ՝ ատեցի,

3. եւ կարգեցի զսահմանս նորա յապականութիւն, եւ զժառանգութիւն նորա ի դաշտ անապատի։

4. Զի թէ ասիցէ Եդոմ թէ ահա կործանեցաւ՝ դարձցուք եւ շինեսցուք զքաղաքս աւերեալս։ Այսպէս ասէ Տէր ամենակալ. Նոքա շինեսցեն, եւ ես կործանեցից, եւ կոչեսցին նոքա սահմանք անաւրէնութեան. եւ ժողովուրդ ընդ որում տացէ պատերազմ Տէր մինչեւ ցյաւիտեան.

5. եւ աչք ձեր տեսցեն, եւ դուք իսկ ասասջիք եթէ. Բարձրացաւ Տէր ի վերայ սահմանաց Իսրայէլի։

6. Որդի փառաւոր առնէ զհայր, եւ ծառայ երկնչի ի Տեառնէ իւրմէ. իսկ արդ՝ եթէ հայր եմ ես, ու՞ր է փառքն իմ. եւ եթէ Տէր եմ, ո՞ւր է պատիւն իմ, ասէ Տէր ամենակալ։ Դուք, քահանայք՝ որ բամբասէք զանուն իմ, եւ ասէք՝ Ի՞ւ բամբասեցաք զանուն քո.

7. զի մատուցանէք ի սեղան իմ հաց պղծութեան եւ ասացէք. Ի՞ւ պղծեցաք զնոսա. յասելն ձեր թէ սեղան Տեառն արհամարհեալ է, եւ զոր ինչ դնի ի վերայ՝ նորա։

8. Զի թէ մատուցանիցէք զկոյրն ի պատարագ՝ չիցէ՞ չար, եւ եթէ մատուցանիցէք զկաղն կամ զհիւանդոտն՝ չիցէ՞ չար։ Աղէ՝ մատո զնա իշխանին քում, թէ ընդունիցի՞ զքեզ, կամ թէ առնուցո՞ւ քեզ ակն, ասէ Տէր ամենակալ։

9. Եւ այժմ աղաչեցէք զերեսս Աստուծոյ ձերոյ եւ հաշտեցուցէք զնա. ի ձեռաց ձերոց եղեւ այդ։ Եթէ առի՞ց ինչ ի ձէնջ ակնառութեամբ, ասէ Տէր ամենակալ։

10. Զի եւ ձեզ դրունք փակեսցին, եւ մի մերձենայք ի սեղան իմ վայրապար, զի ոչ են կամք իմ ի ձեզ՝ ասէ Տէր ամենակալ. եւ զպատարագս ոչ ընկալայց ի ձեռաց ձերոց։

11. Զի յարեւելից մինչեւ ի մուտս արեւու փառաւորեալ է անուն իմ ի մէջ ազգաց. եւ յամենայն տեղիս մատչին խունկք անուան իմոյ, եւ պատարագ սուրբ, զի մեծ է անուն իմ ի հեթանոսս, ասէ Տէր ամենակալ։

12. Եւ դուք պղծեցէք զնա՝ յասելն ձեր՝ թէ սեղան Տեառն պիղծ է, եւ կերակուրն որ դնի ի վերայ նորա՝ արհամարհեալ է.

13. եւ ասէիք՝ թէ այն յաշխատութենէ է։ Եւ փչեցից զայն արտաքս՝ ասէ Տէր ամենակալ։ Եւ եթէ մատուցանիցէք ինձ յափշտակեալն եւ զկաղն եւ զվտիտս պատարագ, եթէ ընկալա՞յց զնոսա ի ձեռաց ձերոց, ասէ Տէր ամենակալ։

14. Անիծեալ լիցի մարդն որ կարաւղ իցէ, եւ կայցէ ի խաշին նորա որձ. եւ ուխտ իւր յանձին իւրում, եւ մատուցանիցէ Տեառն զարատաւորն, զի թագաւոր յաղթաւղ եմ ես, ասէ Տէր ամենակալ, եւ անուն իմ երեւելի ի մէջ ազգաց։