1. Եւ այս են բանք թղթոյն զոր գրեաց Բարուք որդի Ներեայ որդւոյ Մաասա, որդւոյ Սեդեկիայ որդւոյ Ասադայ, որդւոյ Քեղկեայ ի Բաբելովն։
2. Յամին հինգերորդի՝ որ աւր եւթն էր ամսոյն, ի ժամանակի յորում առին քաղդէացիքն զԵրուսաղէմ, եւ այրեցին զնա հրով։
3․ Եւ ընթերցաւ Բարուք զμանս թղթոյս այսորիկ յականջս Յեքոնիա որդւոյ Յովակիմայ արքայի Յուդայ, եւ յականջս ամենայն ժողովրդեանն որ գային ի մատեանն։
4․ եւ յականջս զաւրացն, եւ որդւոց թագաւորացն. եւ յականջս ծերոցն. եւ յականջս ամենայն ժողովրդեանն, ի փոքուէ մինչեւ ցմեծամեծս ամենեցուն որ բնակեալն էին ի Բաբելովն, առ Սուգ գետով։
5. եւ լային եւ պահէին, եւ կային յաղաւթս առաջի Տեառն։
6. Եւ ժողովեցին արծաթ ըստ իւրաքանչիւր կարի։
7․ եւ առաքեցին յԵրուսաղէմ, առ Յովակիմ որդի Քեղկեայ՝ որդւոյ Սաղովմայ առ քահանայ. եւ առ այլ քահանայս գտեալս ընդ նմա յԵրուսաղէմ։
8. Յառնուլ նորա զսպաս տանն Տեառն որ ել ի տաճարէն՝ դարձուցանել յերկիրն Յուդայ, ի տասներորդում սիւան ամսոյ զսպասն արծաթեղէնս՝ զոր արար Սեդեկիայ որդի Յովսիայ արքայի Յուդայ.
9. յետ գերելոյ Նաբուքոդոնոսորայ արքայի բաբելացւոց՝ զՅեքոնիա եւ զիշխանսն՝ եւ զկալանաւորակապսն՝ եւ զզաւրաւորսն՝ եւ զժողովուրդ երկրին՝ յԵրուսաղէմ. եւ տարաւ զնոսա ի Բաբելոն։
10. Եւ ասեն. Ահաւասիկ առաքեցաք առ ձեզ արծաթ. եւ գնեցէք արծաթոյդ ողջակէզս՝ եւ զվասն մեղացն եւ կնդրուկ՝ եւ արարէք մաննա. եւ հանէք ի սեղանն Տեառն Աստուծոյ մերոյ։
11․ Եւ աղաւթս արարէք ի վերայ կենաց Նաբուքոդոնոսորայ արքայի բաբելացւոց, եւ ի վերայ կենաց Բաղտասարայ որդւոյնորա. զի եղիցին աւուրք նոցա իբրեւ զաւուրս երկնից ի վերայ երկրի։
12. Եւ տացէ մեզ Տէր զաւրութիւն, եւ լուսաւոր արասցէ զաչս մեր. եւ կեցցուք ընդ հովանեաւ Նաբուքոդոնոսորայ արքային բաբելացւոց, եւ ընդ հովանեաւ Բաղտասարայ որդւոյ նորա. եւ ծառայեսցուք նոցա աւուրս բազումս, եւ գտցուք շնորհս առաջի նոցա։
13․ Աղաւթս արարէք եւ ի վերայ մեր առ Տէր Աստուած մեր. զի մեղաք Տեառն Աստուծոյ մերում, եւ ոչ դարձաւ սրտմտութիւն Տեառն եւ բարկութիւն նորա ի մէնջ մինչեւ ցայսաւր։
14. Եւ ընթերցջիք զթուղթդ զայդ զոր առաքեցաք առ ձեզ, դնել ի տունդ Տեառն՝ յաւուրս տաւնի, եւ յաւուրս ժամանակի։
15․ Եւ ասասջիք, Տեառն Աստուծոյ մերոյ արդարութիւն է, եւ մեր՝ ամաւթ երեսաց, որպէս յաւուրս յայսմիկ առն Յուդայ՝ եւ բնակչաց Երուսաղէմի։
16․ Եւ թագաւորաց մերոց, եւ իշխանաց մերոց, եւ քահանայից մերոց, եւ մարգարէից մերոց, եւ հարց մերոց առաջի Տեառն։
17․ զի անհնազանդ եղաք նմա,
18. եւ ոչ լուաք ձայնի Տեառն Աստուծոյ մերոյ, գնալ ըստ հրամանաց Տեառն՝ զոր եդ առաջի մեր։
19. յաւրէ յորմէ եհան Տէր զհարսն մեր յերկրէն Եգիպտացւոց մինչեւ ցայսաւր էաք անհնազանդք Տեառն Աստուծոյ մերոյ, եւ խուսափեալք չլսել ձայնի նորա։
20․ Եւ պատեցան զմեւք չարիքն, եւ նզովք զոր կարգեաց Տէր ի ձեռն Մովսիսի ծառայի իւրոյ, յաւուր յորում եհան զհարսն մեր յերկրէն Եգիպտացւոց՝ տալ մեզ զերկիրդ որ բղխէ զկաթն եւ զմեղր՝ որպէս եւ այսաւր։
21․ Եւ ոչ լուաք ձայնի Տեառն Աստուծոյ մերոյ ըստ ամենայն բանից մարգարէիցն զոր առաքեաց առ մեզ։
22. եւ գնացաք իւրաքանչիւր ըստ մտաց սրտի իւրոյ չարի, հարկել աստուածոց աւտարաց, առնել չար առաջի Տեառն Աստուծոյ մերոյ։
Հաղորդում կայքում սխալի վերաբերյալ
Տվյալ հատվածում առկա է սխալ: