1. Եւ կացոյց Տէր զբանս իւր զոր խաւսեցաւ ի վերայ մեր, եւ ի վերայ դատաւորաց մերոց որ դատէին զԻսրայէլ, եւ ի վերայ թագաւորաց մերոց, եւ ի վերայ իշխանաց մերոց, եւ ի վերայ առն Իսրայէլի եւ Յուդայ։
2. ածել ի վերայ մեր չարիս մեծամեծս, որ ոչ երբէք գործեցան ի ներքոյ ամենայն երկնից, որպէս արարաւ Իսրայէլի՝ ըստ գրելոցն յաւրէնսն Մովսիսի։
3. ուտել մեզ զմարմին որդւոց մերոց, եւ առն զմարմին դստեր իւրոյ։
4. Եւ մատնեաց զմեզ ի ստրկութիւն ամենայն թագաւորաց որ շուրջ զմեւք էին, ի նախատինս եւ յանապատ ի մէջ ամենայն ժողովրդոց շուրջանակի՝ ուր ցրուեաց զմեզ Տէր անդր։
5. եւ եղաք ի վայր՝ եւ ոչ ի վեր. զի մեղաք Տեառն Աստուծոյ մերոյ առ ի չլսելոյ ձայնի նորա։
6․ Տեառն Աստուծոյ մերոյ արդարութիւն. եւ մեր՝ եւ հարցն մերոց ամաւթ երեսաց, որպէս եւ յաւուրս յայսմիկ։
7. զոր խաւսեցաւ Տէր ի վերայ մեր զամենայն չարիսս զայսոսիկ որ եկին ի վերայ մեր։
8. Եւ ոչ աղաչեցաք զերեսս Տեառն, դառնալ իւրաքանչիւր ի խորհրդոց սրտի իւրոյ չարի։
9․ եւ զարթեաւ Տէր ի վերայ չարեացն, զորս զարթոյց Տէր ի վերայ մեր. զի արդար է Տէր յամենայն ի գործս իւր՝ զոր պատուիրեաց մեզ։
10. եւ ոչ լուաք ձայնի նորա երթալ զհետ հրամանաց Տեառն զոր ետ առաջի մեր։
11. Եւ արդ Տէր Աստուած Իսրայէլի, որ հաներ զժողովուրդ քո յերկրէն Եգիպտացւոց, հզաւր ձեռամբ՝ նշանաւք եւ արուեստիւք՝ եւ մեծամեծ զաւրութեամբք՝ եւ բարձր բազկաւ, եւ արարեր քեզ անուն որպէս յաւուր յայսմիկ։
12. Մեղաք ամպարշտեցաք՝ անիրաւեցաք Տէր Աստուած մեր յամենայն իրաւունս քո։
13. դարձցի սրտմտութիւն քո ի մէնջ. զի մնացաք նուազք ի մէջ հեթանոսաց՝ ուր ցրուեցեր զմեզ անդր։
14. Լուր Տէր աղաւթից մերոց, եւ խնդրուածոց մերոց, եւ փրկեա զմեզ վասն անուան. քոյ եւ տուր մեզ շնորհս առաջի գերչաց մերոց։
15. զի ծանիցէ ամենայն երկիր՝ թէ դու ես Տէր Աստուած մեր. զի անուն քո կոչեցաւ ի վերայ Իսրայէլի, եւ ի վերայ ազգի նորա։
16․ Տէր՝ նայեաց ի տաճարէ սրբոյ քումմէ, եւ խորհեաց զմեզ.
17. խոնարհեցո Տէր զունկն քո՝ եւ լուր. բաց զաչս քո՝ եւ տես. զի ոչ եթէ մեռեալք ի դժոխս որոց առան ոգիք ի միջոյ նոցա, տացեն փառաւորութիւն եւ իրաւունս Տեառն։
18. այլ անձինք տրտմեալք յանհնարին տրտմութիւնս, որ գնան կորացեալք՝ եւ հիւանդացեալք, եւ աչք առկայծեալք՝ եւ անձինք քաղցեալք՝ տացեն քեզ փառս եւ արդարութիւն։
19. Տէր՝ ոչ եթէ առ իրաւանց հարցն մերոց եւ թագաւորաց մերոց արկանեմք գութս առաջի քո Տէր Աստուած մեր։
20. զի ածեր զսրտմտութիւն քո եւ զբարկութիւն քո ի վերայ մեր, որպէս եւ խաւսեցար ի ձեռն ծառայից քոց մարգարէից. եթէ
21. այսպէս ասէ Տէր. Խոնարհեցուցէք զպարանոցս ձեր, եւ հարկեցարուք արքային բաբելացւոց. եւ նստարուք յերկրին զոր ետու հարցն ձերոց։
22. եւ եթէ ոչ լուիցէք ձայնի Տեառն հարկել արքային բաբելացւոց, պակաս արարից ի քաղաքացդ Յուդայ, եւ արտաքոյ Երուսաղէմի՝
23. զձայն ուրախութեան, եւ զձայն ցնծութեան, զձայն փեսայի եւ զձայն հարսին. եւ եղիցի ամենայն երկիրդ յանապատ ի բնակչաց։
24. Եւ ոչ լուաք ձայնի քում հարկել արքային բաբելացւոց։ եւ կացուցեր զբանս քո զոր խաւսեցար ի ձեռն ծառայիցն քոց մարգարէից, հանել զոսկերս թագաւորացն մերոց, եւ զոսկերս հարց մերոց ի տեղւոջէ իւրեանց։
25․ Եւ ահա անկեալ կան ի տաւթի տունջեան, եւ ի ցուրտ գիշերոյ, եւ մեռան ի ցաւս չարաչարս՝ ի սով եւ ի սուր եւ ի գերութիւն։
26. եւ արարեր զտաճարն քո յորոյ վերայ կոչեցաւ անուն քո, որպէս յաւուրս յայսմիկ՝ վասն չարութեան տանն Իսրայէլի եւ տանն Յուդայ։
27. եւ արարեր ընդ մեզ Տէր Աստուած մեր ըստ ամենայն հեզութեան քում, եւ ըստ ամենայնի մեծի գթութեան քո։
28. որպէս խաւսեցար ի ձեռն ծառայի քոյ Մովսիսի, յաւուր պատուիրելոյ քոյ նմա գրել զաւրէնս քո առաջի որդւոցն Իսրայէլի։
29. եւ ասել. Եթէ ոչ լուիցէք ձայնի իմում. եթէ ոչ շըռինդդ մեծ եւ յոյժ դարձցի ի փոքրկութիւն ի մէջ ազգաց ուր ցրուեցից զձեզ անդր։
30. զի գիտեմ եթէ ոչ լսիցեն ինձ, զի ժողովուրդ խստապարանոց է. եւ դարձուցանեն զսիրտս իւրեանց յերկրին պանդխտութեան իւրեանց։
31․ Եւ ծանիցեն՝ թէ ես եմ Տէր Աստուած նոցա. եւ տաց նոցա սիրտ՝ եւ ականջս լսելոյ։
32. եւ աւրհնեսցեն զիս յերկրին գերութեան իւրեանց. եւ յիշեսցեն զանուն իմ։
33. եւ դարձցին ի խստութենէ պարանոցի իւրեանց, եւ յիրաց չարեաց իւրեանց. զի յիշեսցեն զճանապարհս հարց իւրեանց մեղուցելոց առաջի իմ։
34․ Եւ դարձուցից զնոսա յերկիրն զոր երդուայ տալ հարցն նոցա Աբրահամու եւ Սահակայ եւ Յակոբայ, եւ տիրեսցեն նմա. եւ բազմացուցից զնոսա, եւ ոչ նուազեսցին։
35. եւ հաստատեցից նոցա ուխտ յաւիտենական լինել ինձ նոցա յԱստուած, եւ նոքա եղիցին ինձ ի ժողովուրդ։ եւ ոչ եւս խախտեցից զժողովուրդ իմ զԻսրայէլ յերկրէն զոր ետու նոցա։
Հաղորդում կայքում սխալի վերաբերյալ
Տվյալ հատվածում առկա է սխալ: