Գլուխ 1

   
1. Պաւղոս Առաքեալ ոչ ի մարդկանէ եւ ո՛չ ի ձեռն մարդոյ, այլ ի ձեռն Յիսուսի Քրիստոսի, եւ Աստուծոյ հաւր՝ որ յարոյց զնա ի մեռելոց.

2. եւ որ ընդ իս են եղբարք ամենեքին, եկեղեցեացդ գաղատացւոց:

3. Շնո՛րհք ընդ ձեզ եւ խաղաղութիւն յԱստուծոյ ի հաւրէ, եւ ի Տեառնէ մերմէ Յիսուսէ Քրիստոսէ.

4. որ ետ զանձն իւր վասն մեղաց մերոց, զի զմեզ փրկեսցէ՛ յաշխարհէ աստի չարէ, ըստ կամացն Աստուծոյ եւ հաւր մերոյ.

5. որում փա՛ռք յաւիտեանս. ամէն:

6. Զարմանամ՝ զի այդպէս վաղվաղակի փոփոխիք յայնմանէ որ կոչեացն զձեզ ի շնորհսն Քրիստոսի՝ յայլ աւետարան.

7. որ ո՛չ գոյ այլ. բայց եթէ իցեն ոմանք որ խռովեցուցանիցեն զձեզ, եւ կամիցին շրջել զաւետարանն Քրիստոսի:

8. Այլ թէ մեք, կամ հրեշտա՛կ յերկնից աւետարանեսցէ ձեզ աւելի՛ քան զոր աւետարանեցաքն ձեզ, նզովեա՛լ լիցի:

9. Որպէս յառաջագոյնն ասացաք՝ եւ արդ դարձեա՛լ ասեմ, եթէ ոք աւետարանեսցէ ձեզ աւելի՛ քան զոր առէքն նզովեա՛լ լիցի:

10. Արդ՝ մարդկա՞ն հաճոյ լինիցիմ, թէ Աստուծոյ. կամ խնդրիցեմ մարդկա՞ն հաճոյ լինել: Եթէ տակաւին մարդկան հաճոյ լինէի, ապա Քրիստոսի ծառայ ո՛չ էի:

11. Ցուցանե՛մ ձեզ ե՛ղբարք զաւետարանն, որ աւետարանեցաւ յինէն. զի ո՛չ է ըստ մարդոյ.

12. քանզի եւ ո՛չ ես ի մարդոյ առի, եւ ո՛չ ուսայ յումեքէ, այլ ի յայտնութենէ՛ն Յիսուսի Քրիստոսի:

13. Քանզի լուեա՛լ իսկ է ձեր զիմ գնացսն որ երբեմն ի հրէութեան անդ, զի անչա՛փ հալածէի զեկեղեցին Աստուծոյ, եւ աւա՛ր հարկանէի զնա:

14. Եւ յառաջադէ՛մ էի ի հրէութեանն՝ քան զբազում հասակակիցս իմ որ յազգին իմում էին. առաւե՛լ նախանձախնդիր էի իմոյ հայրենի աւանդութեանցն:

15. Այլ յորժամ կամեցաւ Աստուած, որոշեաց զիս յորովայնէ մաւր իմոյ, եւ կոչեաց ի ձեռն շնորհաց իւրոց,

16. յայտնել զորդին իւր ինեւ, զի աւետարանեցի՛ց զնա ի հեթանոսս: Անդէն վաղվաղակի ոչի՛նչ զգացուցի մարմնոյ եւ արեան.

17. եւ ո՛չ ելի յԵրուսաղէմ առ որ յառաջագոյն քան զիս առաքեալքն էին. այլ չոգա՛յ յԱրաբիա, եւ դարձեա՛լ դարձայ ի Դամասկոս:

18. Ապա յետ երից ամաց ելի՛ յԵրուսաղէմ տեսանել զՊե՛տրոս. եւ եղէ՛ առ նմա աւուրս հինգետասան:

19. Զայլ ոք յառաքելոց անտի ո՛չ տեսի, բայց միայն զՅա՛կովբոս. զեղբայրն Տեառն:

20. Այլ զոր գրեմս առ ձեզ, ահաւասիկ առաջի Աստուծոյ, զի ո՛չ ստեմ:

21. Ապա եկի ի կողմանս ասորւոց եւ կիւլիկեցւոց:

22. Եւ յանծանաւթս էի երեսաւք եկեղեցեացն՝ որ ի թլփատութենէ անտի էին ի Քրիստոս:

23. Բայց զի լսելով լուեալ էր, թէ որ հալածէրն զմեզ յայնժամ, արդ աւետարանէ՛ զհաւատսն՝ զոր երբեմն խախտէր:

24. Եւ փառաւո՛ր առնէին ինեւ զԱստուած: