1. Պաւղոս առաքեա՛լ Յիսուսի Քրիստոսի, կամաւքն Աստուծոյ, եւ Տիմոթէոս եղբայր.
2. առ Կողոսացիս սուրբս եւ հաւատացեալս եղբարս ի Քրիստոս:
3. Շնո՛րհք ընդ ձեզ եւ խաղաղութիւն յԱստուծոյ հաւրէ մերմէ: Գոհանա՛մ զԱստուծոյ եւ զհաւրէ Տեառն մերոյ Յիսուսի Քրիստոսի, յամենայն ժամ վասն ձեր աղա՛ւթս առնեմ:
4. Իբրեւ լուաք զհաւատսն ձեր՝ որ ի Քրիստոս Յիսուս Տէր մեր, եւ զսէ՛րն որ ընդ ամենայն սուրբս ունիք:
5. Վասն յուսոյն որ պահի ձեզ յերկինս. զորմէ լուարո՛ւք բանիւն ճշմարտութեան՝ աւետարանին,
6. որ եհաս առ որպէս ընդ ամենայն աշխարհ աճէ՛ եւ պտղաբերէ՛,
7. որպէս եւ ի ձերում միջի. յաւրէ յորմէ լուարուք եւ ծանեա՛յք զշնորհսն Աստուծոյ ճշմարտութեամբ.
8. որպէս եւ ուսարուք յԵպափրեայ սիրելւոյ, ծառայակցէ մերմէ, որ է հաւատարի՛մ վասն ձեր՝ պաշտաւնեայ Յիսուսի.
8. որ եւ պատմեա՛ց մեզ զձեր սէրն հոգւով:
9. Վասն այնորիկ եւ մեք յաւրէ յորմէ լուաք, ո՛չ դադարեմք վասն ձեր աղաւթս առնել, եւ խնդրուա՛ծս մատուցանել. զի լնուցուք զգիտութիւն կամաց նորա, ամենայն իմաստութեամբ եւ հոգեւոր հանճարով.
10. գնա՛լ ձեզ արժանի Տեառն յամենայն հաճութեան, յամենայն գործս բարութեան, պտղաբերք եւ աճեցո՛ւնք գիտութեամբն Աստուծոյ.
11. ամենայն զաւրութեամբ զաւրացեալք, ըստ զաւրութեան փառաց նորա. յամենայն համբերութիւն եւ երկայնմտութիւն. ուրախութեա՛մբ
12. գոհանալ զհաւրէ, որ կոչեացն զմեզ ի մասն վիճակի սրբոցն ի լոյս.
13. որ փրկեացն զմեզ յիշխանութենէ խաւարի, եւ փոխեաց զմեզ յարքայութիւն որդւո՛յն իւրոյ սիրելւոյ
14. որով ունիմք զփրկութիւն արեա՛մբն նորա, եւ զթողութիւն մեղաց մարմնո՛վն նորա:
15. Որ է պատկեր աներեւութին Աստուծոյ, անդրանի՛կ ամենայն արարածոց:
16. Զի նովա՛ւ հաստատեցաւ ամենայն, որ ինչ յերկինս՝ եւ որ ինչ յերկրի, որ երեւին՝ եւ որ ո՛չն երեւին. եթէ աթոռք, եթէ տէրութիւնք, եթէ պետութիւնք, եթէ իշխանութիւնք. ամենայն ինչ նովաւ՝ եւ ի նո՛յն հաստատեցաւ:
17. Եւ նա՛ է յառա՛ջ քան զամենայն, եւ ամենայն ինչ նովա՛ւ եկաց բովանդակ:
18. Եւ նա է գլո՛ւխ մարմնոյ եկեղեցւոյ. որ է սկիզբն, անդրանի՛կ ի մեռելոց. զի եղիցի ինքն յամենայնի յառաջացեա՛լ:
19. Զի ի նմա՛ հաճեցաւ ամենայն լրումն աստուածութեանն բնակել.
20. եւ նովա՛ւ հաշտեցուցանել զամենայն ի նոյն: Արար խաղաղութի՛ւն արեամբ խաչին իւրոյ, որ ինչ յերկրի՝ եւ որ ինչ յերկինս:
21. Եւ զձեզ՝ որ երբեմն աւտարացեալքն էիք, եւ թշնամի՛ք խորհրդովք ի գործսն չարութեան.
22. այժմ աւադիկ հաշտեցո՛յց անդամովք մարմնոյ իւրոյ, ի ձեռն մահուան իւրոյ յանդիման կացուցանել զձեզ սուրբս՝ եւ անբիծս՝ եւ անարա՛տս առաջի նորա.
23. եթէ կայցէք ի հաւատսն արմատացեալք, եւ հաստատեալք, եւ անշարժք ի յուսոյ աւետարանին, զոր լուարուք քարոզելոյ ընդ ամենայն արարածս ի ներքոյ երկնից. որոյ եղէ ես Պաւղոս պաշտաւնեայ:
24. Եւ արդ՝ ուրա՛խ եմ ի չարչարա՛նս իմ վասն ձեր. եւ լնո՛ւմ զպակասութիւն նեղութեանցն Քրիստոսի ի մարմնի իմում, վասն մարմնո՛յ նորա, որ է եկեղեցի.
25. որոյ եղէ ես Պաւղոս պաշտաւնեայ, ըստ տնտեսութեանն Աստուծոյ որ տուեա՛լ է ինձ ի ձեզ կատարել զբանն Աստուծոյ.
26. զխորհուրդն որ ծածկեա՛լ էր ի յաւիտեա՛նցն եւ յազգաց, որ ա՛յժմ յայտնեցաւ սրբոց իւրոց:
27. Որոց կամեցաւ Աստուած ցուցանե՛լ, թէ զի՞նչ է մեծութիւն փառաց խորհրդո՛յն նորա ի հեթանոսս. որ է Քրիստոս ի ձեզ, յո՛յսն փառաց.
28. զոր մե՛քն քարոզեմք, եւ խրատեմք զամենայն մարդ, եւ ուսուցանեմք զամենայն մարդ, ամենայն հոգեւո՛ր իմաստութեամբ. զի կացուսցուք զամենայն մարդ կատարեա՛լ ի Քրիստոս Յիսուս.
29. յոր եւ աշխատի՛մ պատերազմեալ ըստ աջողութեան նորա, որ աջողեա՛լ է յիս զաւրութեամբ:
Հաղորդում կայքում սխալի վերաբերյալ
Տվյալ հատվածում առկա է սխալ: