1. Եթէ յարերուք ընդ Քրիստոսի, ապա զվերի՛նն խնդրեցէ՛ք, ուր Քրիստոսն նստի ընդ աջմէ Աստուծոյ.
2. զվերի՛նն խորհեցարո՛ւք, մի՛ զայս որ յերկրի աստ է: 3 Քանզի մեռարուք, եւ կեանքն ձեր ծածկեալ են ընդ Քրիստոսի յԱստուած:
4. Իսկ յորժամ Քրիստոս յայտնեսցի կեանքն ձեր, յայնժամ եւ դո՛ւք ընդ նմա յայտնեսջիք փառաւք:
5. Սպանէ՛ք այսուհետեւ զանդամս ձեր զերկրաւորս. ի բա՛ց ընկեցէք զպոռնկութիւն, զպղծութիւն, զբիծ, զցանկութիւն չարեաց, եւ զագահութիւն՝ որ է կռապաշտութիւն.
6. վասն որոյ գա՛յ բարկութիւն Աստուծոյ ի վերայ որդւոցն անհաւանութեան,
7. որովք եւ դուք երբեմն գնայիք՝ մինչ կենդանիքն էիք ի նոսա:
8. Արդ՝ ի բա՛ց թաւթափեցէք եւ դուք զայն ամենայն, զբարկութիւն, զսրտմտութիւն, զչարութիւն, զհայհոյութիւն, զխեղկատակութիւն ի բերանոց ձերոց:
9. Մի՛ ստէք միմեանց. մերկացարո՛ւք զհին մարդն գործովքն իւրովք.
10. եւ զգեցարո՛ւք զնո՛րն նորոգեալ ի գիտութիւն, ըստ պատկերի արարչին իւրոյ.
11. ուր ո՛չ է հրեայ, եւ ո՛չ հեթանոս, թլփատութիւն, եւ անթլփատութիւն. խուժ, դուժ, սկիւթացի, ծառայ, ազատ. այլ ամենայն եւ յամենայնի Քրիստոս:
12. Զգեցարո՛ւք այսուհետեւ իբրեւ ընտրեալք Աստուծոյ՝ սուրբք եւ սիրեցեալք, զգո՛ւթ, զողորմութիւն, զքաղցրութիւն, զխոնարհութիւն, զհեզութիւն, զերկայնմտութիւն,
13. ներե՛լ միմեանց, շնորհե՛լ իրերաց, եթէ ուրուք զումեքէ տրտունջ ինչ իցէ. որպէս Աստուած Քրիստոսի՛ւ շնորհեաց ձեզ, նոյնպէս եւ դուք:
14. Եւ ի վերայ ամենայնի զսէ՛րն, որ է զաւդ կատարմանն.
15. եւ խաղաղութիւնն Քրիստոսի հաստատեսցի ի սիրտս ձեր, յոր եւ կոչեցարուքն միով մարմնով: Եւ գոհացա՛ւղք լինիջիք.
16. զի բանն Քրիստոսի բնակեսցէ՛ ի ձեզ առատապէս. ամենայն իմաստութեամբ ուսուցանել եւ խրատե՛լ զմիմեանս. սաղմոսիւք եւ աւրհնութեամբք, եւ երգովք հոգեւորաւք՝ եւ շնորհաւք աւրհնե՛լ ի սիրտս ձեր զԱստուած:
17. Եւ զամենայն զոր եւ առնիցէք բանի՛ւք եւ արդեամբք, զամենայն յանո՛ւն Տեառն Յիսուսի արասջի՛ք: Գոհացա՛ւղք լինիջի՛ք զԱստուծոյ եւ զհաւրէ նովաւ:
18. Կա՛նայք՝ հնազա՛նդ լերուք արանց ձերոց. որպէս եւ վայել է ի Տէր:
19. Ա՛րք՝ սիրեցէ՛ք զկանայս ձեր, եւ մի՛ դառնացուցանէք զնոսա:
20. Ո՛րդիք հնազա՛նդ լերուք ծնողաց ձերոց յամենայնի, զի ա՛յն է հաճոյ առաջի Տեառն:
21. Հա՛րք՝ մի՛ զայրացուցանէք զորդիս ձեր, զի մի՛ տրտմեսցին:
22. Ծա՛ռայք՝ հնազա՛նդ լերուք տերանց ձերոց յամենայնի. մի՛ առականէ՛ ծառայութեամբ իբրեւ մարդահաճոյք. այլ միամտութեամբ սրտի երկնչե՛լ ի Տեառնէ:
23. Զոր ինչ առնիցէք՝ սրտի մտա՛ւք գործեսջի՛ք իբրեւ Տեառն, եւ ո՛չ իբրեւ մարդկան:
24. Գիտասջի՛ք զի ի Տեառնէ՛ առնուցուք զհատուցումն ժառանգութեան ձերոյ. քանզի Տեառն Քրիստոսի ծառայէք:
25. Իսկ ապիրատն ընկալցի՛ ըստ իւրում ապիրատութեանն. զի չի՛ք ակնառութիւն առաջի Աստուծոյ:
Հաղորդում կայքում սխալի վերաբերյալ
Տվյալ հատվածում առկա է սխալ: