Գլուխ 1

   

1. Պաւղոս եւ Սիղուանո՛ս եւ Տիմոթէոս՝ եկեղեցւոյդ Թեսաղոնիկեցւոց՝ յԱստուած հա՛յր մեր, եւ ի Տէր Յիսուս Քրիստոս:

2. Շնո՛րհք ընդ ձեզ եւ խաղաղութի՛ւն յԱստուծոյ հաւրէ մերմէ, եւ ի Տեառնէ Յիսուսէ Քրիստոսէ:

2. Գոհանա՛լ պարտիմք զԱստուծոյ յամենայն ժամ վասն ձեր ե՛ղբարք՝ որպէս եւ արժան իսկ զի ե՛ւս քան զեւս աճեն հաւատքդ ձեր,

3. եւ յաճախէ՛ սէր իւրաքանչի՛ւր ձեր ամենեցուն առ միմեանս:

4. Որպէս եւ մեզ ձեւք պարծել յեկեղեցի՛սն Աստուծոյ՝ վասն համբերութեան ձերոյ եւ հաւատոց՝ յամենայն հալածանս ձեր եւ ի նեղութիւնս, որում դո՛ւքն համբերէք.

5. յաւրինա՛կ արդա՛ր դատաստանին Աստուծոյ. արժանի՛ լինել ձեզ արքայութեանն Աստուծոյ, վասն որոյ եւ զճգնութիւնդ կրէք.

6. եթէ պա՛րտ է առաջի Աստուծոյ՝ հատուցանել նեղչա՛ցն ձերոց նեղութիւն.

7. եւ ձեզ նեղելոցդ հանգի՛ստ ընդ մեզ՝ ի յայտնութեանն Տեառն մերոյ Յիսուսի, յերկնից հրեշտակաւք զաւրութեան իւրոյ.

8. ի բո՛ց հրոյ առնուլ զվրէժս յայնցանէ ոյք ո՛չ ճանաչեն զԱստուած, եւ որ ո՛չ հնազանդին աւետարանին Տեառն մերոյ Յիսուսի:

9. Որք տայցեն վրէ՛ժս ի սատակումն յաւիտենից՝ յերեսաց Տեառն՝ եւ ի փառաց զաւրութեան նորա.

10. յորժամ գայցէ փառաւո՛ր լինել ի մէջ սրբոց իւրոց, եւ սքանչելի ի մէջ ամենայն հաւատացելոց: Զի հաւատարի՛մ եղեւ վկայութիւնն մեր ի վերայ ձեր յաւուր յայնմիկ:

11. Յոր եւ աղաւթս առնեմք վասն ձեր յամենայն ժամ. զի զձեզ արժանի՛ս արասցէ կոչմանն ձերում Աստուած, մինչեւ լցցէ՛ զամենայն հաճութիւն բարութեան, եւ զգո՛րծս հաւատոցն զաւրութեամբ:

12. Զի փառաւո՛ր լիցի անուն Տեառն մերոյ Յիսուսի Քրիստոսի ի ձեզ, եւ դուք ի նմա, ըստ շնորհացն Աստուծոյ մերոյ, եւ Տեառն Յիսուսի Քրիստոսի: