Գլուխ 2

   

1. Աղաչեմ զձեզ ե՛ղբարք՝ վասն գալստեան Տեառն մերոյ Յիսուսի Քրիստոսի, եւ մերոյ ժողովելոյն առ նա.

2. մի՛ վաղվաղակի խռովել ձեզ ի մտաց՝ եւ մի՛ զարհուրել, մի՛ հոգւով, եւ մի՛ բանիւ, եւ մի՛ թղթովք՝ իբրեւ թէ ի մէնջ. որպէս թէ եկեալ հասեալ իցէ աւր Տեառն:

3. Մի՛ ոք զձեզ խաբեսցէ՛՝ եւ մի՛ իւիք իրաւք. զի եթէ ոչ նախ եկեսցէ ապստամբութիւնն. եւ յայտնեսցի մա՛րդն անաւրէնութեան՝ որդին կորստեան,

4. հակառակորդն հպարտացեա՛լ ի վերայ ամենայնի՝ որ անուանեալ իցէ Աստուած՝ կամ պաշտաւն. մինչեւ նստել նմա ի տաճարին Աստուծոյ, եւ ցուցանել զանձն՝ թէ Աստուած իցէ:

5. Ո՞չ յիշիցէք՝ զի մինչ առ ձե՛զն իսկ էի՝ ասէի զայս:

6. Եւ արդ դո՛ւք ինքնին գիտէք զայն, որ ունին յայտնե՛լ նմա յիւրում ժամանակի:

7. Զի խորհուրդն անաւրէնութեան արդէն իսկ զաւրանայ. բայց յայնժամ, մինչ ի միջոյ բարձցի՛ որ այժմդ ունի:

8. Եւ ապա՛ յայտնեսցի անաւրէնն: Զոր Տէր Յիսուս սատակեսցէ հոգւով բերանոյ իւրոյ, եւ խափանեսցէ յայտնութեամբ գալստեանն իւրոյ:

9. Որոյ գալուստն ըստ ազդեցութեա՛ն սատանայի է, ամենայն զաւրութեամբ եւ նշանաւք եւ արուեստիւք ստո՛վք,

10. եւ ամենայն պատրանաւք անիրաւութեան ի վերայ կորուսելոցն. փոխանակ զի զսէրն ճշմարտութեան ո՛չ ընկալան՝ զի ապրեսցին, եւ վասն այնորիկ առաքեսցէ նոցա Աստուած ազդեցութիւն մոլորութեան՝ հաւատալ նոցա ստութեանն:

11. Զի դատապարտեսցի՛ն ամենեքեան որ ո՛չ հաւատացին ճշմարտութեանն, այլ հաճեցան ընդ անաւրէնութիւնն:

12. Այլ մեք պարտիմք գոհանա՛լ զԱստուծոյ յամենայն ժամ՝ վասն ձեր եղբա՛րք սիրեցեալք ի Տեառնէ. զի ընտրեաց զմեզ Աստուած իսկզբանէ ի փրկութիւն՝ սրբութեամբ հոգւոյն, եւ հաւատովքն ճշմարտութեան.

13. յոր եւ կոչեաց զձեզ աւետարանաւն մերով ի փրկութիւն՝ փառացն Տեառն մերոյ Յիսուսի Քրիստոսի:

14. Այսուհետեւ ե՛ղբարք հաստատո՛ւն կացէք՝ եւ պի՛նդ կալարուք զաւանդութիւնսն՝ զոր ուսարուք, եթէ բանիւ, եւ եթէ թղթով մերով:

15. Այլ ինքն Տէր մեր Յիսուս Քրիստոս, եւ Աստուած հայր մեր, որ սիրեացն զմեզ՝ եւ ետ մեզ մխիթարութիւն յաւիտենի՛ց՝ եւ յոյս բարեաց շնորհաւք,

16. մխիթարեսցէ զսիրտս ձեր, եւ հաստատեսցէ՛ յամենայն բանս եւ ի գործս բարութեան: