Գլուխ 5

   
1. Զերիցունս այսուհետեւ աղաչեմ՝ իբրեւ զերիցակից՝ եւ վկա՛յ չարչարանացն Քրիստոսի, որ եւ հանդերձեալ փառացն յայտնելոյ հաղո՛րդ.

2. արածեցէ՛ք որ ի ձեզ հաւտդ է Աստուծոյ. վերակացու լինել՝ մի՛ իբրեւ ակամայ՝ այլ կամա՛ւ ըստ Աստուծոյ. մի՛ զաւշաքաղութեամբ, այլ յաւժարութեամբ.

3. մի՛ իբրեւ տիրելով վիճակացն, այլ լինել աւրինա՛կ հաւտին:

4. Զի յերեւել հովուապետին՝ ընդունիջի՛ք զանթառամ փառաց պսակն:

5. Սոյնպէս եւ երիտասարդք՝ հնազա՛նդ լերուք ծերոց: Ամենեքին ընդ միմեանս՝ զխոնարհութիւն ունիցի՛ն. զի Աստուած ամբարտաւանից հակառակ կայ, տայ շնո՛րհս խոնարհաց:

6. Խոնարհեցարո՛ւք ընդ հզաւր ձեռամբն Աստուծոյ. զի զձեզ բարձրացուսցէ՛ ի ժամանակի:

7. Զամենայն հոգս ձեր ընկեցէ՛ք ի նա, զի նա՛ է որ հոգայ վասն ձեր:

8. Արթո՛ւն լերուք՝ հսկեցէ՛ք, զի ոսոխն ձեր սատանայ իբրեւ զառեւծ գոչէ, շրջի եւ խնդրէ՝ թէ զով կլանիցէ:

9. Որում ի դիմի՛ հարկանիցիք հաստատեալք հաւատովք: Գիտասջի՛ք զնոյն անցս չարչարանաց եղբայրութեան ձերոյ յաշխարհի յանձին կատարեալ:

10. Եւ Աստուած ամենայն շնորհաց, որ կոչեաց զձեզ յիւր ի յաւիտենական ի փառսն Քրիստոսիւ Յիսուսիւ, որում փոքր մի եղերուք չարչարակիցք, նա՛ կազդուրեցուսցէ, կարողացուսցէ, հաստահի՛մն արասցէ:

11. Նմա իշխանութիւն եւ փա՛ռք յաւիտեանս:

12. Ի ձեռն Սեղուանոսի՛ հաւատարիմ եղբաւր, որպէս կարծեմ՝ փոքր ի շատէ գրեցի ձեզ, մխիթարել, եւ ի վերայ սորին վկայե՛լ. զի եւ այս ճշմարիտ շնո՛րհք յԱստուծոյ են՝ յոր հաստատեալ կայցէք:

13. Ողջո՛յն տայ ձեզ որ ի Բաբելոն ընտրելակիցն եկեղեցի եւ Մարկոս որդի իմ:

14. Ողջոյն տաջիք միմեանց ի համբոյր սրբութեան: Խաղաղութի՛ւն ընդ ձեզ ամենեսեան, որ էք ի Քրիստոս Յիսուս. ամէն: