Գլուխ 1

   

1․ Պե՛տրոս առաքեա՛լ Յիսուսի Քրիստոսի, ընտրելոց նժդեհից որ ի սփիւռս Պոնտացւոց, Գաղատացւոց, եւ Կապադովկեցւոց, եւ Ասիացւոց, եւ Բիւթանացւոց,

2․ ըստ կանո՛ւխ գիտութեանն Աստուծոյ հաւր, սրբութեամբ հոգւոյն, ի հնազանդութիւն եւ ի հեղումն
արեանն Յիսուսի Քրիստոսի: Շնո՛րհք ընդ ձեզ եւ խաղաղութիւն բազմասցի:

3․ Աւրհնեա՛լ է Աստուած եւ հայր Տեառն մերոյ Յիսուսի Քրիստոսի, որ ըստ բազում ողորմութեան իւրում ծնաւ զմեզ վերստին ի յոյսն կենդանի. ի ձեռն յարութեանն Յիսուսի Քրիստոսի ի մեռելոց,

4․ յանեղծ եւ յանարատ եւ յանթառամ ժառանգութիւնն՝ որ պահեալ է յերկինս

5․ որ զաւրութեամբն Աստուծոյ պահեալ էիք հաւատովք ի պատրաստեալ փրկութիւնն, յայտնեալ ի յետին ժամանակս:

6․ Որով ուրա՛խ լինիջիք, որք այժմ սակաւիկ ինչ ըստ պատշաճի իրացդ տրտմեա՛լք ի պէսպէս փորձութիւնս:

7․ Զի հանդէս ձերոց հաւատոցն առաւե՛լ քան զոսկի կորստական պատուական որ հրով փորձեալ գտաւ, ի գովութիւն եւ ի փառս եւ ի պատիւ ի յայտնութեանն Յիսուսի Քրիստոսի:

8․ Զոր ո՛չն տեսէք՝ եւ սիրեցէք. ընդ որ այժմ ո՛չ հայեցեալք, բայց հաւատացէք. եւ ուրա՛խ էք անճառ եւ փառաւորեալ խնդութեամբն.

9․ ընկալեալ զկատարումն հաւատոցն ձերոց զոգւո՛ցն փրկութիւն:

10․ Վասն որոյ փրկութեան խնդրեցին եւ քննեցին մարգարէքն. որք վասն որոյ ի ձեզ լինելոց էին շնորհքն՝ մարգարէանայի՛ն.

11․ քննէի՛ն յորո՛ւմ եւ յորպիսի՛ ժամանակի գուշակէր ի նոսա հոգին Քրիստոսի. որ նախ՝ չարչարանա՛ցն Քրիստոսի վկայէր, եւ յետ այնորիկ՝ զփառա՛ցն:

12․ Որոց եւ յայտնեցա՛ւ իսկ. զի ո՛չ թէ անձանց, այլ մե՛զ մատակարարք լինէին, նոցին՝ որք ա՛յժմ պատմեցան, այնոքիւք որք աւետարանեցի՛նն ձեզ հոգւովն սրբով որ առաքէրն յերկնի՛ց՝ զոր ցանկային տեսանել գոնեայ ընդ աղա՛ւտ հրեշտակք:

13․ Որով պնդեալ զմէջս մտաց ձերոց՝ զուարթացեալք, բովանդակ սպասեցէ՛ք հասելոց ձեզ շնորհացն ի յայտնութեանն Յիսուսի Քրիստոսի,

14․ իբրեւ զորդի՛ս հնազանդութեան. մի՛ կերպարանեալք առաջին ձերովք անգիտութեանն ցանկութեամբք:

15․ Այլ ըստ սրբոյն որ կոչեաց զձեզ, եւ դո՛ւք սուրբք յամենայն գնացս ձեր լինիջի՛ք:

16․ Վասն որոյ գրեալ է, եթէ եղերո՛ւք սո՛ւրբ զի ես սուրբ եմ:

17․ Եւ եթէ հայր կոչիցէք զայն, որ առա՛նց ակնառութեանն դատի ըստ իւրաքանչիւր գործոց. ապա երկիւղիւ զձերոցն պանդխտութեան ժամանակդ գնասջի՛ք:

18․ Գիտասջի՛ք, զի ո՛չ ապականացու արծաթեղինաւք՝ եւ ոսկեղինաւքն փրկեցարուք ի ձերոց ունայնութեան հայրենատուր գնացիցն.

19․ այլ պատուակա՛ն արեամբն Քրիստոսի, իբրեւ անբիծ եւ անարատ գառին:

20․ Որ յառաջ ծանա՛ւթ էր նախ քան զիսկզբանէ աշխարհի: Եւ երեւեցա՛ւ ի վախճան ժամանակաց վասն ձեր.

21․ որք նովաւ հաւատացէք յԱստուած, որ յարոյց զնա ի մեռելոց, եւ ետ նմա փառս. զի հաւատքն ձեր եւ յոյս իցեն յԱստուած:

22․ Զանձինս ձեր սրբե՛լ հնազանդութեամբ ճշմարտութեան հոգւոյն, յեղբայրսիրութեան առանց կեղծաւորութեան, ի սուրբ սրտէ սիրե՛լ սերտիւ զմիմեանս:

23․ Ծնեալք ի վերստին ո՛չ յապականութեան սերմանէն. այլ յանապականացուէ՛ն, կենդանի եւ մշտնջենակա՛ն բանիւն Աստուծոյ:

24․ Քանզի ամենայն մարմին իբրեւ զխո՛տ եւ ամենայն փառք մարդոյ իբրեւ զծաղի՛կ խոտոյ. խոտն ցամաքեցաւ՝ եւ ծաղիկն թաւթափեցաւ:

25․ Եւ բան Տեառն մնա՛յ յաւիտեան. ա՛յսինքն է, բա՛նն որ ի ձե՛զ աւետարանեցաւ: