Գլուխ 5

   

1. Արդ՝ այսուհետեւ մե՛ծատունք՝ լացէք եւ ողբացէ՛ք ի վերայ թշուառութեանցն, որ գալոց են ի վերայ ձեր:

2. Զի մեծութիւնդ ձեր՝ յոչի՛նչ է, եւ հանդերձ ձեր կերակո՛ւր ցեցոյ:

3. Եւ արծաթ ձեր եւ ոսկի՝ ժանկահար, եւ ժանկն նոցա լիցի ձեզ ի վկայութիւն, եւ կերիցէ՛ զմարմինս ձեր. իբրեւ զհո՛ւր գանձեցէք աւուրցն յետնոց:

4. Ահաւասիկ վարձք մշակաց որ գործեն զանդս ձեր՝ առ ձե՛զ են. զրկեալն ի ձէնջ աղաղակէ՛, եւ բողոք հնձողացն եհա՛ս յականջս Տեառն զաւրութեանց:

5. Փափկացայք ի վերայ երկրի՝ եւ զբաւսա՛յք. սնուցէք զսիրտս ձեր՝ իբրեւ աւուր սպանման:

6. Զրկեցէք սպանէք զարդարն, որ ո՛չ կայր ձեզ հակառակ:

7. Երկայնամի՛տ լերուք եղբա՛րք իմ մինչեւ ի գալուստն Տեառն: Ահա մշակ երկայնամտեա՛լ սպասէ պատուական պտղոյն երկրի, մինչեւ առցէ՛ զկանուխ եւ զանագան:

8. Երկայնամտեցէ՛ք եւ դո՛ւք, հաստատեցէ՛ք զսիրտս ձեր. զի գալուստն Տեառն մերձեա՛լ է:

9. Մի տրտմեցուցանէք զմիմեանս ե՛ղբարք, զի մի՛ դատիցիք. ահաւասիկ դատաւորն առ դո՛ւրս կայ:

10. Աւրինա՛կ առէք ե՛ղբարք՝ չարչարանաց եւ երկայնմտութեան զմարգարէսն, որք խաւսեցան յանուն Տեառն:

11. Ահաւասիկ երանե՛մք համբերողաց. զհամբերութիւնն Յովբայ լուարուք՝ եւ զկատարումն Տեառն տեսէ՛ք. զի բազմագութ է Տէր՝ եւ ողորմա՛ծ:

12. Յառաջ քան զամենայն ինչ եղբա՛րք իմ, մի՛ երդնուցուք, մի՛ յերկինս, մի՛ յերկիր, մի՛ յայլ ինչ երդումն, այլ եղիցի ձեր այոյն՝ այո՛, եւ ոչն՝ ո՛չ. զի մի՛ ի կեղծաւորութիւն ինչ անկանիցիք:

13. Վշտանայցէ ոք ի ձէնջ, յաղա՛ւթս կայցէ. բերկրիցի ոք, սաղմո՛ս ասասցէ:

14. Հիւանդանայցէ ոք ի ձէնջ՝ կոչեսցեն զերիցունս եկեղեցւոյն, եւ արասցեն ի վերայ նորա աղաւթս, աւծցե՛ն իւղով յանուն Տեառն.

15. եւ աղաւթքն հաւատովք՝ փրկեսցէ զաշխատեալն, եւ յարուսցէ զնա Տէր. եւ եթէ մեղս ինչ իցէ գործեալ՝ թողցին նմա:

16. Խոստովա՛ն եղերուք միմեանց զմեղս, եւ աղա՛ւթս արարէք ի վերայ միմեանց, որպէս զի բժշկեսջիք. քանզի յո՛յժ զաւրաւոր են աղաւթք արդարոց յաւգնականութիւն:

17. Եղիայ մա՛րդ էր իբրեւ զմեզ չարչարելի՛. եւ յաղաւթս եկաց, եւ ո՛չ տեղեաց յերկիր զերիս ամս եւ զվեց ամիս:

18. Եւ դարձեալ եկաց յաղաւթս՝ եւ ետո՛ւն երկինք զանձրեւ՝ եւ բուսոյց երկիր զպտուղ իւր:

19. Եղբա՛րք իմ, եթէ ոք ի ձէնջ մոլորեսցի ի ճանապարհէ ճշմարտութեան, եւ դարձուսցէ ոք զնա.

20. գիտասցէ՛ զի որ դարձուսցէ՛ զմեղաւորն ի մոլորութեան ճանապարհէն իւրմէ, փրկեսցէ զոգի իւր ի մահուանէ, եւ ծածկեսցէ զբազմութիւն մեղաց: