Գլուխ 4

   

1. Ուստի՞ պատերազմունք՝ եւ ուստի՞ կռիւք ի ո՞չ յայդպիսի՛ ցանկութեանց ձերոց՝ որ զաւրացեալ են յանդամս ձեր:

2. Ցանկայք, եւ ո՛չ ունիք. սպանանէք եւ նախանձիք, եւ ո՛չ կարէք հասանել. պատերազմիք կռուիք՝ եւ ո՛չ ունիք, վասն զի ո՛չ խնդրէք:

3. Խնդրէք՝ եւ ո՛չ առնուք, վասն զի չարաչա՛ր խնդրէք. զի անդէն ի ցանկութիւնս ձեր մաշեսջիք:

4. Շնացաւղք՝ ո՞չ գիտէք՝ զի սէր աշխարհիս այսորիկ թշնամութի՛ւն է առ Աստուած: Զի որ ոք կամիցի սիրել զաշխարհ, թշնամի՛ առնէ զանձն իւր Աստուծոյ:

5. Կամ թէ վայրապա՛ր համարիցիք՝ զոր ասէ գիրն առ նախանձ ինչ, որում փափաքէ՛ հոգին՝ որ բնակեաց ի մեզ,

6. տալ զառաւել շնորհսն: Վասն որոյ ասէ. Տէր ամբարտաւանից հակառակ կայ, տայ շնորհս խոնարհաց:

7. Հնազանդեցայք այսուհետեւ Աստուծոյ, եւ կացէ՛ք հակառակ չարախաւսին եւ լիցի փախստակա՛ն առ ի ձէնջ:

8. Մերձեցարո՛ւք առ Աստուած, եւ մերձեսցի՛ առ ձեզ: Սրբեցէ՛ք զձեռս մե՛ղաւորք, եւ ուղի՛ղ արարէք զսիրտս՝ ե՛րկմիտք:

9. Տառապեցարո՛ւք, սգացարո՛ւք, եւ լացէ՛ք. ծաղր ձեր ի սո՛ւգ դարձցի, եւ ուրախութիւն ձեր ի տրտմութիւն. 10 խոնարհեցարո՛ւք առաջի Տեառն՝ եւ բարձրացուսցէ՛ զձեզ:

11. Մի՛ բամբասէք զմիմեանս ե՛ղբարք. որ բամբասէ զեղբայր իւր կամ դատի զեղբայր իւր, զաւրէնսն դատի. իսկ եթէ զաւրէնսն դատիցիս, ո՛չ առնելի աւրինացն ես՝ այլ դատաւո՛ր:

12. Մի՛ է աւրէնսդիր եւ դատաւոր. որ կարաւղն է փրկել եւ կորուսանել:

13. Դու ո՞ ես՝ որ դատիս զընկերն: Ահաւասիկ են որ ասեն՝ այսաւր եւ վաղիւ երթիցո՛ւք յայս անուն քաղաք, եղիցուք անդ տարի մի, վաճառեսցո՛ւք՝ եւ շահեսցուք.

14. որք ո՛չ գիտէք զվաղիւն,

15. որպիսի՞ ինչ իցեն կեանք ձեր. զի իբրեւ զմրրիկ էք, որ առ սակաւ մի երեւեալ՝ եւ ապականեալ: Փոխանակ զի ասէիք՝ եթէ Տէր կամեսցի, կեցցո՛ւք եւ արասցուք զայս ինչ՝ կամ զայն:

16. Եւ արդ՝ պարծիք յամբարտաւանութեան ձերում: Ամենայն ինչ այնպիսի պարծանք՝ չարութի՛ւն են:

17. Որ ոք գիտիցէ զբարին՝ եւ ո՛չ առնիցէ, մե՛ղք են նմա: