1․ Եւ սկսաւ խաւսել երկրորդն, որ ասաց վասն զաւրութեան թագաւորի:
2․ Ո արք` ո՞չ ապաքէն զաւրացեալ են մարդիկ որ ունին զծով եւ զցամաք, եւ զամենայն որ ինչ ի նոսա:
3․ Իսկ թագաւոր զաւրացեալ տիրէ ամենայն երկրի եւ մարդկան. եւ զոր ինչ ասէ եւ հրամայէ` վաղվաղակի առնեն, եթէ հրամայէ պատերազմել` ընկեր ընդ ընկերի իւրում, ոչ իշխեն անցանել զբանիւ:
4․ եւ եթէ առաքէ զնոսա ի պատերազմ ընդ թշնամիս` երթեալ վաղվաղակի գործեն մենքենայս, եւ լերինս, եւ պարիսպս, եւ աշտարակս.
5․ սպանանեն, եւ մեռանին. եւ զհրամանաւ թագաւորին ոչ կարեն անցանել: եւ եթէ յաղթեսցեն` զամենայն բարութիւնս բերեն թագաւորին:
6․ Եւ ոչ միայն զաւրական պատերազմողք, այլեւ մշակք որ գործենզերկիր. յորժամ սերմանեն եւ հնձեն, զարդիւնս իւրեանց բերեն թագաւորին: եւ հարկահանք դարձեալ բռնադատեալ զաշխարհ, հանեն հարկս թագաւորի:
7․ Եւ թագաւոր` միայն զաւրացեալ իշխան է ի վերայ ամենայնի. եւ եթէ հրամայէ սպանանել` սպանանեն. եւ եթէ կեցուցանել` կեցուցանեն.
8․ եւ եթէ շինել` շինեն.
9․ եւ եթէ քակել` քակեն. եւ եթէ տնկել` տնկեն:
10․ եւ ամենայն աշխարհ` թագաւորի զաւրութեան եւ հրամանի լսեն. եւ ինքն արքայ` զինչ եւ կամի` գործէ: եւ ինքն ի հանգստեան կայ. բազմի, ուտէ, ըմպէ, եւ ի քուն մտանէ.
11․ եւ այլք ամենեքեան շուրջ պահեն զնա, եւ հրամանի նորա անսան. եւ ոչ իշխեն ըստ կամս իւրեանց երթալ ուրեք, եւ կամ գործել. եւ ոչ իշխեն անցանել զհրամանաւ թագաւորի:
12․ Արդ` ո արք, զիա՞րդ ոչ զաւրաւոր է թագաւոր, որոյ բան հրամանի իւրոյ այսչափ զաւրացեալ իշխէ ի վերայ ամենեցունց: Եւ զայս ասացեալ` լռեաց:
13․ Եւ երրորդն` որ ասաց վասն զաւրութեան կանանց. եւ վասն ճշմարտութեան. այս է Զորաբաբէլ. սկսաւ խաւսել` եւ ասէ.
14․ Ո արք` եթէ մեծ է թագաւոր` եւ կամ այլ բազում մարդիկ, եւ կամ զաւրաւոր է գինի. ո՞ է որ յաղթեալ ունի եւ տիրէ ի վերայ ամենեցուն:
15․ Ո՞չ ապաքէն կանայք. քանզի կանայք են որ ծնանին զթագաւորս. եւ ամենայն մարդիկ որ տիրեն ծովու եւ ցամաքի`
16․ ի նոցանէ ծնան. եւ կանայք ծնան եւ սնուցին զմշակս որ տնկեն զայգիս` ուստի լինի գինի:
17․ եւ նոքա են որ առնեն զհանդերձս արանց, եւ նոքաւք զարդարին եւ փառաւորին մարդիկ. եւ ոչ է հնար առանց նոցա լինել մարդկան:
18․ Եւ եթէ ժողովեսցեն զոսկի եւ զարծաթ` եւ զամենայն բարութիւնս, եւ տեսեալ կին մի գեղեցիկ`
19․ դարձեալ ի նա` եւ բերանաբաց եղեալ հային ընդ նա. եւ ամենայն կամաւք իւրեանց սիրեն զնա առաւել քան զոսկի եւ քան զարծաթ` եւ քան զամենայն բարութիւնս:
20․ եւ թողեալ զհայր` եւ զմայր իւր, որ ծնան եւ սնուցին զնա, եւ զաշխարհ իւր. երթայ զհետ կնոջ իւրոյ:
21․ եւ այնպէս միացեալ ոգեխառնի ընդ նմա, մինչչեւ ոչ յիշէ զհայր իւր եւ ոչ զմայր եւ ոչ զաշխարհ:
22․ Եւ յայսմանէ արժան է ձեզ գիտել` թէ տիրեն ի վերայ ձեր կանայք ձեր. զի զամենայն ինչ` զոր գործէք եւ աշխատիք, բերէք եւ տայք ցկանայս ձեր:
23․ Եւ առեալ առն զսուր իւր, գնայ ի ճանապարհ հեռի. եւ եթէ շահի ինչ, կամ աւազակէ եւ գողանայ, կամ ընդ ծով եւ ընդ գետս նաւէ.
24․ եւ գազանաց պատահէ, եւ ընդ խաւարուտ գնայ. եւ յորժամ գողանայ եւ յափշտակէ, եւ ընդ ամենայն վիշտս անցանէ, գայ բերէ զամենայն վաստակսն առ կին իւր.
25․ քանզի առաւել սիրէ մարդ զկին իւր` քան զհայր իւր եւ զմայր իւր:
26․ Եւ բազումք յիմարեցան ի մտաց իւրեանց. եւ վասն կանանց իւրեանց անկան ի ծառայութիւն:
27․ եւ բազումք ի կորուստ մատնեցան, եւ մեռան, եւ սպանին. եւ սխալեալ անկան ի մեծամեծ մեղս վասն կանանց:
28․ Եւ այժմ ոչ հաւատայք ինձ. ո՞չ մեծ թագաւորդ անձնիշխան է ինքն. եւ ամենայն ոք ի մարդկանէ ոչ իշխէ մերձենալ ի դա:
29․ Տեսանէի ես զդուստր հարճի թագաւորի, զի նստէր ընդ աջմէ թագաւորիդ.
30․ եւ առեալ զթագն ի գլխոյ դորա` դնէր ի գլուխ իւրում. եւ ածեալ ապտակ թագաւորիդ:
31․ եւ առ այս թագաւորդ ոչ ցասնոյր. այլ բացեալ զբերան իւր հայէր ընդդէմ նորա, եւ եթէ ծիծաղէր` ծիծաղէր ընդդէմ նորա. եւ եթէ տրտմէր` թագաւորդ ողոքէր, մինչչեւ սթափեցուսցէ զնա:
32․ Արդ` ո արք. զիա՞րդ ոչ են զաւրաւոր կանայք` որ զայս ամենայն առնեն:
33․ Եւ յայնժամ թագաւորն եւ մեծամեծք նորա սկսան հայել այր ընդ ընկեր իւր: Եւ սկսաւ խաւսել Զորաբաբէլ վասն ճշմարտութեան` եւ ասէ.
33․ Ո արք` ո՞չ ապաքէն զաւրաւոր են կանայք, մեծ է երկիր, բարձր են երկինք, եւ երագընթաց է արեգակն. վասն զի ունի արշաւանս ընդ կամարաձեւ խորանն երկնից. եւ դարձեալ վաղվաղակի սլացեալ հասանէ ի տեղի իւր ի միում աւուր:
34․ Գրաբար թարգմանությունը բացակայում է
35․ Ո՞չ ապաքէն մեծ է այն` որ զայս ամենայն արար: Արդարեւ` ճշմարտութիւն մեծ եւ զաւրաւոր է քան զամենեսեան:
36․ ամենայն երկիր ապաւինի ի ճշմարտութիւն, եւ երկինք աւրհնենզճշմարտութիւն. եւ ամենայն գործք շարժին եւ դողան առաջի նորա. եւ ոչ է ի ճշմարտութեան անիրաւութիւն եւ ոչ մի:
37․ Անիրաւ է գինի. անիրաւ է թագաւոր. անիրաւ են եւ կանայք. անիրաւ են եւ ամենայն որդիք մարդկան. անիրաւ են եւ ամենայն գործք նոցա. եւ ոչ գոյ ի նոսա ճշմարտութիւն, եւ յանիրաւութեան իւրեանց կորնչին:
38․ Իսկ ճշմարտութիւն կայ եւ մնայ, եւ զաւրաւոր է յաւիտեան. եւ կենդանի է, եւ ունի իշխանութիւն նորա յաւիտեանս յաւիտենից:
39․ եւ ոչ գոյ ի նմա ակնառութիւն, եւ ոչ երբէք փոփոխի, այլ իրաւունս առնէ. եւ մերժեալ է ի նմանէ անիրաւութիւն եւ չարութիւն. եւ ամենայն գործք ճշմարտութեան հաճոյ են ամենեցուն:
40․ եւ ոչ գոյ ի դատաստանի նորա անիրաւութիւն. քանզի ճշմարտութիւն է զաւրութիւն թագաւորաց, եւ իշխանութիւն եւ մեծութիւն: եւ է աւրհնեալ տէր Աստուած ճշմարտութեան:
41․ Եւ ասացեալ զայս` լռեաց ի խաւսելոյն: Եւ ամենայն ժողովն յայնժամ մեծաձայն աղաղակեցին` եւ ասեն. Մեծ է ճշմարտութիւն` եւ յաղթաւղ եւ զորաւոր:
42․ Յայնժամ թագաւորն ասէ ցնա. Խնդրեա զինչ եւ կամիս. եւ տաց եւս առաւել քան զգրեալսդ. վասն զի գտար իմաստուն քան զամենեսեան: եւ երկրորդ յաթոռ իմ նստջիր. եւ ազգական իմ անուանեսջիր:
43․ Յայնժամ ասէ Զորաբաբէլ ցթագաւորն. Յիշեա զուխտն զոր ուխտեցեր վասն շինուածոյն Երուսաղէմի. յաւուր յորում առեր դու զթագաւորութիւնդ քո. եւ ասացեր`
44․ զամենայն կահ եւ սպաս Երուսաղէմի դարձուցանել անդրէն, զոր որոշեալ մեկնեաց Կիւրոս, յորժամ եհար զԲաբելոն, եւ ուխտեաց նա դարձուցանել զսպասն Տեառն:
45․ Նոյնպէս եւ դու թագաւոր` ուխտեցեր շինել զտաճարն Տեառն, զոր այրեցին եդոմայեցիք յորժամ արարին անապատ զՀրէաստան քաղդեացիքն:
46․ Եւ այժմ աղաչեմ զքեզ տէր իմ եւ թագաւոր, եւ խնդրեմ ի քէն. եւ զայս մեծ պարգեւ շնորհեա դու ինձ. եւ վասն այսորիկ աղաչեմ զքեզ, կատարեա զուխտն զոր ուխտեցեր թագաւորին երկնաւորի. արա ըստ այնմ` որ ել ի բերանոյ քումմէ:
47․ Յայնժամ յարուցեալ Դարեհ թագաւոր եւ համբուրեաց զԶորաբաբէլ. եւ գրեաց նմա թուղթս առամենայն գաւառապետս, եւ տեղակալս, եւ զաւրագլուխս, եւ առ նախարարս, զի յուղարկեսցեն զնա, եւ որք ընդ նմայն էին` ելանել եւ շինել զԵրուսաղէմ:
48․ Եւ առ ամենայն տեղակալս կողմանցն ասորւոց եւ փիւնիկեցւոց, եւ որ են ի կողմանս Լիբանանու. գրեաց թուղթ` զի իջուսցեն մայր փայտ ի Լիբանանէ յԵրուսաղէմ, եւ շինեսցեն հանդերձ Զորաբաբելիւ զքաղաքն:
49․ Եւ գրեցաւ առ ամենայն հրէայս որ ելեալ էին ի թագաւորութեանն իւրում, եւ ազատեաց զնոսա ի հարկաց. եւ ասէ ցամենայն զաւրաւորս եւ նախարարս, եւ տեղակալս, եւ գաւառապետս. Մի ոք վասն հարկաց մերձեսցի ի դրունս նոցա:
50․ եւ զամենայն տեղիս զոր եւ ունին` անհարկ եւ ազատ լիցի. եւ ամենայն եդովմայեցիք տացեն ի բաց զգեաւղս եւ զտեղիս զոր ունին զհրէից:
51․ Եւ ի շինուած տաճարին տացեն յարքունուստ` յամի քսան տաղանտ, մինչչեւ շինեսցի տաճարն:
52․ Եւ ի սեղան ողջակիզացն տացեն զամենայն աւուրս, որպէս եւ գրեալ է յաւրէնսն, զեւթներորդս. եւ զտասներորդս անխափան մատուցանել: եւ այլեւս տաղանտս տասն` յամի:
53․ եւ ամենեքեան որ ելանեն յԵրուսաղէմ շինեսցեն զքաղաքն, եւ լիցին ազատք եւ առանց հարկաց. ինքեանք եւ ազգք իւրեանց, եւ ամենայն քահանայքն:
54․ Եւ հրամայեաց գրել եւ տալ զամենայն դարման. եւ զպատմուճան քահանայիցն որով կատարէին զպաշտաւնն Տեառն:
55․ եւ ղեւտացւոցն գրեաց տալ ռոճիկս զաւուրս, մինչչեւ կատարեսցի տաճարն Տեառն, եւ Երուսաղէմ շինեսցի:
56․ եւ ամենեցուն ոյք պահէին զքաղաքն` գրեաց տալ նոցա ժառանգութիւն երկրի` եւ ռոճիկս:
57․ Եւ առաքեաց զամենայն կահ եւ զսպաս տաճարին, զոր որոշեաց Կիւրոս ի Բաբելոնէ. եւ զամենայն զոր ինչ ասաց Կիւրոս` Դարեհ զնոյն արար եւ կատարեաց. եւ ետ տանել զամենայն սպասն Տեառն:
58․ Եւ յորժամ ել արտաքս ի թագաւորէն Զորաբաբէլ, համբարձ զձեռս իւր յերկինս ընդ կողմն Երուսաղէմի. եւ աւրհնեաց զտէր թագաւոր երկնից,
59․ եւ ասէ. Ի քէն է յաղթութիւն, եւ ի քէն է իմաստութիւն. եւ քեզ վայել են փառք. եւ ես ծառայ քո եմ.
60․ եւ աւրհնեմ զքեզ որ ետուր ինձ իմաստութիւն, եւ գոհանամ զքէն Աստուած հարցն մերոց:
61․ Եւ առ զթուղթսն եւ գնաց. եւ եկն եմուտ ի Բաբելոն, եւ պատմեաց զամենայն եղբարց իւրոց:
62․ եւ աւրհնեցին զԱստուած հարցն իւրեանց. վասն զի շնորհեաց նոցա ընդարձակութիւն, եւ արար թողութիւն
63․ ելանել եւ շինել զԵրուսաղէմ, եւ զտաճարն Տեառն` յորում անուանեցաւ անուն նորա ի նմա. եւ արարին ուրախութիւն մեծ, հանդերձ ամենայն նուագարանաւք զաւուրս եւթն:
Հաղորդում կայքում սխալի վերաբերյալ
Տվյալ հատվածում առկա է սխալ: