2. Լուարուք թագաւորք, եւ ի միտ առէք. ուսարուք դատաւորք ծագաց երկրի:
3. Ունկն դիք որ ունիք զբազմութիւն, եւ պերճացեալ էք ի վերայ ամբոխից ազգաց:
4. Զի ի Տեառնէ տուաւ ձեզ հարստութիւնդ, եւ իշխանութիւնդ ի բարձրելոյն. որ պահանջեսցէ զգործս ձեր, եւ քննեսցէ զխորհուրդս:
5. Զի սպասաւորք էքնորա թագաւորութեանն, եւ ոչ դատիք ուղղութեամբ. եւ ոչ պահեցէք զաւրէնս նորա, եւ ոչ գնացէք ըստ կամացն Աստուծոյ.
6. ահիւ եւ տագնապաւ հասցէ ի վերայ ձեր: Զի դատաստան անաչառ իշխանաց լինի.
7. այլ ռամիկն ներելի ողորմութեան է: Հզաւրք հզաւրագոյնս պահանջեսցին.
8. զի ոչ առնու ակն ամենեցունց Տէրն, եւ ոչ խորշի ի մեծութենէ, զի զփոքր եւ զմեծ ինքն արար. եւ զմի աւրինակ խնամ ունի ամենեցուն.
9. բայց ի վերայ զաւրաւորաց` զաւրաւոր քննութիւն հասանէ:
10. Արդ առ ձեզ ով բռունք են բանք իմ. զի ուսանիցիք զիմաստութիւն, եւ մի սխալիցիք:
11 Զի որք պահեցին սրբութեամբ զսրբութիւն` սրբեսցին. եւ որք ուսան զնոսա` գտցեն պատասխանատրութիւն:
12. Արդ ցանկացարուք բանից իմոց. փափաքեցարուք եւ խրատեսջիք:
13. Լուսաւոր եւ անթառամ է իմաստութիւն, եւ դիւրաւ երեւի սիրողաց իւրոց, եւ գտանի խնդրողաց իւրոց:
14. Հասանէ առ ցանկացաւղս իւր, առ յառաջագոյն ճանաչելոյ:
15. Որ կանխեաց առ նա` ոչ վաստակեսցի. զի դեգերեալ գտցէ զնա առ դրունս իւր:
16. Քանզի եւ զմտաւ ածել զնմանէ` կատարեալ իմաստութիւն է. եւ որ տքնի վասն նորա` վաղվաղակի անհոգ լիցի:
17. Զի ինքնին շրջի խնդրել զարժանաւորս իւր. եւ ի շաւիղս երեւի նոցաքաղցրութեամբ, եւ յամենայն հնարագիտութիւնս պատահէ նոցա:
18. Զի սկիզբն նորա ճշմարիտ ցանկութիւն խրատու է.
19. եւ խնամ խրատու` սէր. եւ պահպանութիւն աւրինաց նորա` գութ. մտադիւրութիւն աւրինաց` հաստատութիւն անեղծութեան:
20. Իսկ անեղծութիւն` մերձաւոր լինել առնէ Աստուծոյ.
21. եւ ցանկութիւն իմաստութեան` տանի յարքայութիւն:
22. Արդ եթէ ցանկայք աթոռոց եւ գաւազանաց իշխանութեան` բռունք ժողովրդոց` պատուեցէք զիմաստութիւն, զի յաւիտեան թագաւորիցէք:
24. Իսկ եթէ զի՞նչ է իմաստութիւն, եւ ո՞րպէս եղեւ` պատմեցից, եւ ոչ թաքուցից ի ձէնջ զխորհուրդս. այլ ի սկզբանէ արարածոց քննեցից, եւ ածից յայտ զգիտութիւն նորա: Եւ ոչ ստերիւրեցայց ի ճշմարտութենէն.
25. եւ ոչ նախանձու մաշեալ գնացից ընդ նմա. զի այն` ոչ հաղորդի ընդ իմաստութեան:
26. Բազմութիւն իմաստնոց` փրկութիւն աշխարհաց. եւ թագաւոր հանճարեղ` հաստատութիւն ժողովրդոց:
27. Այսուհետեւ խրատեցարուք բանիւք իմովք` եւ աւգտեցարուք:
Հաղորդում կայքում սխալի վերաբերյալ
Տվյալ հատվածում առկա է սխալ: