1. Վասն այնորիկ ըստ նոցին նմանութեան արժանապէս տանջեցան. եւ վասն բազմութեան ճճեացն գանալից եղեն:
2. Փոխանակ այնր տանջանաց դիւրեցեր ժողովրդեան քում. ի ցանկութիւն տենչանաց` նորաճաշակ կերակուր պատրաստեցեր զլորամարգին:
3. Զի նոքա ցանկացեալք կերակրոյ ցուցելովքն որ առաքեցաւ նոցա, եւ ի կարեւոր կերակրոյ ցանկութենէն արգելցին: եւ սոքա առ սակաւ մի կարաւտացեալք ի նոր ճաշակսն վայելեսցեն:
4. Զի պարտ էր ի վերայ նոցա անհրաժեշտ կարաւտութեանն գալ. քանզի բռնանային եւ սոցա ցուցանել միայն, թէ որպէս սոցա թշնամիքն տանջիցին:
5. Քանզի սոցա յորժամ անհնարին բարկութիւն գազանացն եհաս ի վերայ` հարուածովք կամակոր աւձիցն սատակէին:
6. Ոչ մինչ ի սպառ յամեաց բարկութիւնն, այլ ի խրատ առ սակաւ մի խռովեցան. զի նշանակ փրկութեան ունիցին, առ ի յիշելոյ զպատուիրանս աւրինաց քոց:
7. Զի որ դառնայրն` ոչ վասն այնր զոր տեսանէրն ապրէր, այլ վասն քո որ ամենեցուն փրկիչդ ես:
8. Եւ այնու հաւանեցուցեր զթշնամիսն մեր, եթէ դու ես որ փրկես յամենայն չարէ:
9. Զի զոմանս մարախոյ եւ մկանց կոտորեցին հարուածք. եւ ոչ գտաւ բժշկութիւն անձանց նոցա. զի արժանի էին յայնպիսեացն տանջելոյ:
10. Բայց որդւոց քոց` եւ ոչ թիւնաւոր վիշապացն յաղթեցին ժանիք. եւ ողորմութիւն քո անջրպետեաց` եւ փրկեաց զնոսա:
11. Զի ի յիշատակ բանից քոց անդրէն պատուաստէին եւ վաղվաղակի փրկէին: զի մի ի խոր մոռացումն անկանիցին, եւ անպատսպարանք լինիցին ի քումմէ բարերարութենէդ:
12. Քանզի ոչ դեղք` եւ ոչ սպեղանիք բժշկեցին զնոսա. այլ քո Տէր բանդ որ զամենայն բժշկէ:
13. Քանզի կենաց եւ մահու դու ունիս իշխանութիւն, իջուցանես ի դժոխս` եւ հանես:
14. Այլ մարդ սպանանէ չարութեամբ իւրով. եւ ելեալ ոգին` անդրէն ոչ դառնայ. եւ ոչ պարանի շունչն գրաւեալ:
15. քանզի ի քումմէ ձեռանէ փախչել անհնարին է:
16. Ուրանան գիտել զքեզ ամպարիշտք, բայց զաւրութեամբ բազկի քոյ տանջեցան: Նոր անձրեւաւք կարկտի, եւ անհրաժեշտ շառաչմամբք հալածեալք, եւ հրովք ծախեալք.
17. եւ որ ինչ նորանշան սքանչելին էր: Զի յամենաշիջոյց ջուրն առաւել գործէր հուրն. զի վերամարտիկ արդարոց է աշխարհս:
18. Երբեմն ընտանենայր բոցն, զի մի այրիցէ զարձակեալ գազանսն ի վերայ ամպարշտաց: այլ նոքա հայեցեալ տեսանէին, թէ Աստուծոյ դատաստանաւն խուճապին:
19. Եւ երբեմն ի մէջ ջրոյն առաւել քան զզաւրութիւն հրոյ բորբոքէր, զի զմեղանչական երկրին զարդիւնսն ապականեսցէ:
20. Ընդ որոյ` կերակուր հրեշտակաց ջամբեցեր ժողովրդեան քում, եւ զպատրաստական հացն յերկնից ետուր նոցա առանց ջանալոյ: Առ ամենայն ցանկութիւն բաւական, եւ առ ամենայն հանդերձանս ճաշակաց:
21. Զի քո գոյաւորութիւնդ առ քո որդիսն եցոյց զքաղցրութիւն` ըստ մատուցանելոյ ցանկութեանն արբանեկեալ. առ որ զինչ ոք եւ կամէր` խառնէր:
22. Ձիւն եւ սառն կային ընդդէմ հրոյ` եւ ոչ հալէին. զի ծանիցուք թէ զպտուղ թշնամեացն ապականէր: հուրն բորբոքեալ ընդ կարկտի, եւ փայլատակեալ ի մէջ ջրոյ:
23. Եւ այն դարձեալ` զի արդարք կերակրեսցին, եւ զիւր զաւրութիւնն մոռանայցէ:
24. Զի քո արարածք քեզ արարչիդ արբանեկէ. եւ սաստկանայ ի տանջանս անիրաւաց. եւ աւրհնի ի բարերարութիւն փոխանակ ի քեզն յուսացելոց:
25. Վասն այնորիկ եւ յայնժամ յամենայն ինչ փոխեալ ամենակերակրիչ պարգեւիդ քում լինէր սպասաւոր, առ ի կամս քոյոցն կարաւտելոց:
26. Զի ուսանիցին որդիքն քո զոր դու սիրեցեր Տէր. զի ոչ եթէ արարք արմտեաց կերակրեն զմարդ, այլ քո բանդ զհաւատացեալսն ի քեզ պահէ:
27. Զի որ ի հրոյն ոչ ապականէր վայրապար, ի դոյզն ճառագայթից արեգականն ջեռեալ հալիւր:
28. Որպէս զի յայտ լիցի` թէ պարտ է կանխել նախ քան զարեգակն ի գովութիւն քո, եւ յառաջ քան զծագել լուսոյ յանդիման լինել քեզ:
29. Զի յոյս անշնորհակալին իբրեւ զսառն ձմերայնոյ հալեսցի, եւ ծորեսցէ իբրեւ զջուր անպիտան:
Հաղորդում կայքում սխալի վերաբերյալ
Տվյալ հատվածում առկա է սխալ: