Գլուխ 4

   
1․ Այսուհետեւ եղբա՛րք իմ սիրելիք եւ անձկալիք, ուրախութիւն իմ եւ պսակ. ա՛յսպէս հաստատո՛ւն կացէք ի Տէր՝ սի՛րելիք:

2․ զԵւոդիա աղաչե՛մ, եւ զՍիւնտիք, աղաչեմ զնոյն խորհել ի Տէր:

3․ Այո՛ աղաչե՛մ եւ զքեզ՝ մտերի՛մ իմ եւ լծակից, եւ դու աւգնակա՛ն լինիջիր նոցա՝ որք յաւետարանին նահատակեցան ընդ իս Կղեմա՛ւ հանդերձ, եւ այլովք գործակցա՛ւք իմովք. որոց անուանքն ի դպրութեան կենաց:

4․ Ուրա՛խ լերուք ի Տէր յամենայն ժամ. դարձեալ ասեմ՝ ուրա՛խ լերուք:

5․ Հեզութիւն ձեր յայտնի լիցի ամենայն մարդկան. Տէր մերձ է:

6․ Մի՛ ինչ հոգայք. այլ ամենայն աղաւթիւք եւ խնդրուածովք, գոհութեամբ, խնդրուածք ձեր յայտնի՛ լիցին առ Աստուած:

7․ Եւ խաղաղութիւնն Աստուծոյ՝ որ ի վեր է քան զամենայն միտս, պահեսցէ՛ զսիրտս ձեր եւ զմիտս ի Քրիստոս Յիսուս:

8․ Այսուհետեւ ե՛ղբարք՝ որ ինչ ճշմարտութեա՛մբ է, որ ինչ պարկեշտութեա՛մբ, որ ինչ արդարութեամբ, որ ինչ սրբութեամբ, որ ինչ սիրով, որ ինչ համբաւ բարեաց, որ ինչ քաջութեամբ, որ ինչ գովութեամբ, զա՛յն խորհիջիք:

9․ Զոր ուսարուքն եւ ընկալարուք, եւ լուայք եւ տեսէք յիս, զա՛յն արարէք. եւ Աստուած խաղաղութեան եղիցի ընդ ձեզ:

10․ Ուրա՛խ եղէ ես ի Տէր յոյժ. զի եւ դուք զմտաւ ածէք հոգա՛լ ինչ վասն իմ, որպէս եւ հոգայի՛քն. բայց բարբարէի՛ք իմն է՛:

11․ Իբր ո՛չ առ կարաւտութեան ինչ ասեմ. զի ես ուսա՛յ՝ որովք կարեմ բաւակա՛ն լինել:

12․ Գիտեմ նուազել, գիտե՛մ առաւելուլ. յամենայնի ամենեւին խելամո՛ւտ եմ, եւ յագել, եւ քաղցենա՛լ, եւ առաւելուլ, եւ նուազե՛լ:

13․ Յամենայնի կարա՛ւղ եմ, այնու՝ որ զաւրացոյցն զիս:
14․ Բայց բարւո՛ք արարէք զի կցորդ եղերուք ինձ ի նեղութեանս:

15․ Գիտէ՛ք եւ դուք փի՛լիպեցիք, զի ի սկզբան աւետարանին իբրեւ ելի ես ի Մակեդովնիա. եւ ո՛չ մի եկեղեցի հաղորդեա՛ց ինձ յաղագս տալոյ եւ առնլոյ, բայց միայն դո՛ւք.

16․ զի եւ ի Թեսաղոնիկ՝ միանգամ եւ երկիցս զպէտս իմ ետուք բերել:

17․ Իբր ո՛չ եթէ խնդրեմ զտուրսն, այլ խնդրեմ զպտուղն որ յաճախէ ի բան ձեր:

18․ Այլ իմ առեա՛լ զամենայն, եւ առաւելեա՛լ եմ, ընկալայ՝ եւ լի՛ եմ ի ձեռն Եպափրոդիտեայ, որ է ի ձէնջ հոտ անուշից, պատարագ ընդունելի՝ հաճոյ

Աստուծոյ:

19․ Եւ Աստուած իմ լի՛ արասցէ զամենայն պէտս ձեր, ըստ իւրում մեծութեանն՝ փառաւք ի Քրիստոս Յիսուս:

20․ Այլ Աստուծոյ եւ հաւր մերում փա՛ռք յաւիտեանս յաւիտենից. ամէն:

21․ Ողջո՛յն տաջիք ամենայն սրբոց՝ ի Քրիստոս Յիսուս:

22․ Ողջո՛յն տան ձեզ որ ընդ իս են եղբարք:

23․ Ողջո՛յն տան ձեզ ամենայն սուրբք. մանաւանդ որ ի տանէ կայսե՛ր են:

24․ Շնո՛րհք Տեառն Յիսուսի ընդ ոգւոյդ ձերում. ամէն:

Առ Փիլիպեցիս՝ գրեցաւ ի Հռովմէ ի ձեռն Եպափրոդիտեայ: