Գլուխ 30

   
1․ Այսպէս ասէ Տէր. վայ ձեզ որդիք ապստամբք, զի խորհեցարուք խորհուրդ եւ ոչ ինեւ, եւ դաշինս կռեցէք` եւ ոչ իմով հոգւով. յաւելուլ մեղս ի վերայ մեղաց:

2․ Որ գնայիք իջանել յերկիրն Եգիպտացւոց, եւ զիս ոչ հարցանէիք. գտանել աւգնականութիւն ի փարաւոնէ, եւ թիկունս առնել զեգիպտացին:

3․ Եւ եղիցի ձեզ թիկունք փարաւոն յամաւթ, եւ յուսացելոց յեգիպտացիսն նախատինք:

4․ Զի են յերկրին Տայանու իշխանք հրեշտակք չարք:

5․ զուր ջանան առ ժողովուրդն` որ ոչ լինի դոցա շահ յաւգնականութիւն. ոչ յաւգուտ, այլ յամաւթ եւ ի նախատինս:

6․ Տեսիլ չորքոտանեաց յանապատի, ի նեղութենէ եւ յանձկութենէ: Առեւծ, եւ կորիւն առիւծու. եւ ի նոցանէն իժք, եւ կորիւնք իժից: թռչունք ամբարձեալ բերեն իշոց զգանձս իւրեանց, եւ լցեալ ուղտուց զմեծութիւն իւրեանց. առ ազգ մի` որ ոչ ինչ աւգուտ լինիցի նոցա յաւգնականութիւն, այլ յամաւթ եւ ի նախատինս:

7․ Եգիպտացիքն որ զուր եւ տարապարտ աւգնիցեն ձեզ. պատմեա նոցա եթէ ի զուր է այդ մխիթարութիւն ձեր:

8․ Արդ նիստ` եւ գրեա ի տախտակի եւ ի գիրս. զի եղիցի այդ յաւուր իւրում եւ ի ժամանակս յաւիտենից:

9․ թէ ժողովուրդ անհաւան է, եւ որդիք սուտք. եւ ոչ կամեցան լսել զաւրէնս Աստուծոյ:

10․ Որք ասէին ցմարգարէսն` թէ մի պատմէք մեզ. այլ խաւսեցարուք ընդ մեզ, եւ պատմեցէք մեզ այլ մոլորութիւն:

11․ եւ դարձուցէք զմեզ ի ճանապարհէդ յայդմանէ, եւ ի բաց արարէք ի մէնջ զշաւիղդ զայդ. եւ հանէք ի մէնջ զաւրէնս Աստուծոյ Իսրայէլի:

12․ Վասն այսորիկ այսպէս ասէ Տէր` սուրբն Իսրայէլի. փոխանակ զի անարգեցէք դուք զբանսդ զայդոսիկ, եւ յուսացարուք ի ստութիւն սնոտի. եւ զի տրտնջեցէք` եւ յուսացարուք ի բանդ յայդ:

13․ Վասն այնորիկ եղիցին ձեզ մեղքդ այդոքիկ ի նզովս` իբրեւ զպարիսպ կործանեալ առժամայն ամուր քաղաքի առելոյ, որում յանկարծակի հասանիցէ կործանումն:

14․ Եւ կործանումն նորա եղիցի իբրեւ զբեկումն խեցեղէն անաւթոյ բրտի` մանր խորտակելոյ, զի մի ոք գտանիցէ ի նմանէ որով հուր բառնայցէ` կամ որով մարթիցէ առնուլ սակաւ մի ջուր:

15․ Զի այսպէս ասէ Տէր Տէր սուրբն Իսրայէլի. յորժամ դարձցիս եւ յոգոց հանիցես, յայնժամ կեցցես, եւ
գիտասցես` թէ ուր իցես: Զի յուսացեալ էիր դու ի սնոտիսն, սնոտի եղեւ եւ զաւրութիւն ձեր: եւ ոչ կամէիք լսել.

16․ այլ ասէիք, երիվարաւք մերովք փախիցուք. վասն այսորիկ փախստականք լինիցիք: եւ ասիցէք`
երագ երիվարաւք մերովք փախիցուք. վասն այնորիկ երագագոյնք քան զձեզ եղիցին որ հալածենն զձեզ:

17․ Զի ի միոջէ բարբառոյ հազարք փախիցեն, եւ ի բարբառոյ հնգից բազումք փախիցեն. մինչչեւ մնասջիք իբրեւ զձող ցցեալ ի վերայ լերին, եւ իբրեւ զկոթող կանգնեալ ի վերայ բլրոց:

18․ Եւ դարձեալ կանխեսցէ Աստուած գթալ ի ձեզ, եւ վասն այսորիկ բարձրասցի ողորմել ձեզ. զի դատաւոր Տէր Աստուած մեր է: Երանի ամենեցուն ոյք սպասեն նմա:

19․ զի ժողովուրդ սուրբ ի Սիոն բնակեսցէ: եւ Երուսաղէմ լալով ելաց` եթէ ողորմեաց ինձ: ողորմեսցի քեզ: ձայնի աղաղակի քում իբրեւ ետես` եւ լուաւ քեզ:

20․ Եւ տացէ քեզ Տէր հաց նեղութեան` եւ ջուր կարաւտանաց. եւ ոչ եւս մերձեսցին ի քեզ որ մոլորեցուցանէին զքեզ. զի աչք քո տեսցեն ի մոլորեցուցիչսն քո,

21․ եւ ականջք քո լուիցեն բանս զհետ մոլորեցուցչացն քոց. որք ասէին եթէ այս է ճանապարհ, եւ գնասցուք ընդ սա, կամ թէ յաջ կամ թէ յահեակ:

22․ Եւ գարշեցուսցես զկուռսն զարծաթապատս եւ զոսկիապատս. մանրեսցես զնոսա եւ հոսեսցես իբրեւ զջուր դաշտանաց, եւ իբրեւ զաղբ մերժեսցես զնոսա:

23․ Յայնժամ եղիցի անձրեւ սերմանեաց երկրին քում, եւ հաց արդեանց երկրի քոյ եղիցի յագուրդ եւ ի պարար: եւ ճարակեսցին խաշինք քո յաւուր յայնմիկ ի տեղւոջ պարարտութեան եւ յանդորրու:

24․ զուարակք ձեր եւ եզինք որ գործեն զերկիր` կերիցեն յարդ խառնեալ ընդ գարի, հոսեալ ի կալոյ:

25․ Եւ եղիցի ի վերայ ամենայն լերանց բարձանց, եւ ի վերայ ամենայն բլրոց բարձուանդակաց ջուր բղխեալ յաւուր յայնմիկ. յորժամ կորիցեն բազումք, եւ կործանեսցին աշտարակք:

26․ Եւ եղիցի լոյսն լուսնի իբրեւ զլոյս արեգական, եւ լոյսն արեգական եւթնպատիկ եղիցի իբրեւ զլոյս աւուրցն եւթանց: Յաւուր յայնմիկ բժշկեսցէ Տէր զբեկումն ժողովրդեան իւրոյ, եւ զցաւս վիրաց քոց բժշկեսցէ:

27․ Ահաւասիկ անուն Տեառն գայ յամայր ամս, յետ բազում ժամանակաց. վառեալ բարկութեամբ` եւ լի փառաւք: բանք շրթանց նորա, եւ բանք բերանոյ նորա լի բարկութեամբ. եւ բարկութիւն սրտմտութեան նորա իբրեւ զհուր կերիցէ:

28․ եւ հոգի նորա իբրեւ զջուր ձորալիր պարանոցաթաղ յորդեսցէ: Եւ բաժանեսցի խռովեցուցանել
զազգս վասն սնոտի մոլորութեանն. եւ հալածեսցէ զնոսա մոլորութիւնն, եւ հասցէ նոցա յանդիման նոցին:

29․ Միթէ հանապա՞զ պարտ իցէ ձեզ ուրախութեամբ մտանել ի սրբութիւնս իմ. յամենայն ժամ տաւնիւք եւ ուրախութեամբ եւ փողո՞վք մտանել ի լեառն Տեառն`  առ Աստուած սուրբն Իսրայէլի:

30․ Եւ լսելի՞ արասցէ զփառս բարբառոյ իւրոյ, եւ զսրտմտութիւն բազկի իւրոյ ցուցցէ՞ բարկութեամբ` եւ սրտմտութեամբ եւ բոցով որ ուտիցէ. եւ սաստիկ բարկութեամբ հրացանից, եւ ջրով, եւ կարկտիւ միանգամայն հոսելով բռնութեամբ:

31․ Զի ի բարբառոյ Տեառն ընկճեսցին ասորեստանեայք. հարուածովքն զոր հարկանիցէ զնոսա:

32․ Եւ եկեսցէ նմա շուրջ յաւգնականաց իւրոց` յոր կողմ եւ յուսացեալ իցէ: զի նոքա փողովք եւ թմբկաւ`  եւ պէսպէս պատերազմաւ փոխփոխ մարտիցեն ընդ նմա: եւ դու ոչ յառաջագոյն քան զաւուրսն պահանջիցին:

33․ Իսկ արդ եւ քեզ պատրաստեալ իցէ թագաւորել ի վերայ ձորոյն խորոյ. փայտ դիզեալ, հուր եւ փայտակոյտ բազում վառեալ. սրտմտութիւն Տեառն իբրեւ զձոր, լի ծծմբով բորբոքեալ: