Գլուխ 3

   
1․ Եւ այս ազգ են զորս եթող Յեսու փորձել նոքաւք զԻսրայէլ. զամենեսին զոր ոչ գիտէին զամենայն պատերազմունս Քանանացւոց.

2․ բայց վասն ազգացն որդւոցն Իսրայէղի ուսուցանել նոցա պատերազմ. սակայն եւ որ յառաջագոյն քան զնոսա էին` ոչ գիտէին:

3․ Զհինգ նախարարութիւնս այլազգեացն. եւ զամենայն Քանանացին. եւ զՍիդովնացին. եւ զԽեւացին զբնակեալ ի Լիբանան ի լեռնէն Բազհերմովնայ` մինչչեւ ցՂաբովեմաթ:

4․ Եւ եղեւ ի փորձելն նոքաւք զԻսրայէլ. գիտեն էթէ լսիցեն պատուիրանացն Տեառն` զորս պատուիրեաց հարց նոցա ի ձեռն Մովսէսի:

5․ Եւ որդիքն Իսրայէղի բնակեցին ի մէջ Քանանացւոյն, եւ Քետացւոյն, եւ Ամուրհացւոյն, եւ Փերեզացւոյն, եւ Խեւացւոյն, եւ Յեբուսացւոյն:

6․ Եւ առին զդստերս նոցա իւրեանց ի կանայս, եւ զդստերս իւրեանց ետուն ուստերաց նոցա. եւ պաշտեցին զդիս նոցա:

7․ Եւ արարին որդիքն Իսրայէղի չար առաջի Տեառն. եւ մոռացան զՏէր Աստուած իւրեանց, եւ պաշտեցին զԲահաղ` եւ զանդառս:

8․ եւ բարկացաւ սրտմտութեամբ Տէր Իսրայէղի, եւ մատնեաց զնոսա ի ձեռս Քուսարսաթեմայ արքայի Ասորւոյ ի միջագետաց. եւ ծառայեցին նմա ամս ութ:

9․ Եւ աղաղակեցին որդիքն Իսրայէղի առ Տէր: Եւ յարոյց Տէր փրկիչ Իսրայէղի, եւ ետ նոցա զԳոթոնիէլ որդի Կենեզա, զեղբայր Քաղեբայ` կրտսեր քան զնա:

10․ եւ լուաւ նոցա: Եւ եղեւ ի նմա հոգի Տեառն, եւ դատեաց զԻսրայէլ: եւ ել ի պատերազմ ընդ Քուսարսաթեմայ. եւ մատնեաց Տէր ի ձեռս նորա զՔուսարսաթեմ արքայ Ասորւոց. եւ սաստկացաւ ձեռն նորա ի վերայ Քուսարսաթեմայ:

11․ եւ դադարեաց երկիրն ամս քառասուն: եւ մեռաւ Գոթոնիէլ որդի Կենեզի:

12․ Եւ յաւելին որդիքն Իսրայէղի առնել չար առաջի Տեառն. եւ զաւրացոյց Տէր զԵդղոմ արքայ Մովաբու ի վերայ Իսրայէղի. վասն առնելոյ նոցա չար առաջի Տեառն:

13․ Եւ ժողովեաց ի վերայ նոցա զամենայն որդիսն Ամովնեա, եւ զԱմաղէկ. եւ չոգաւ էհար զԻսրայէլ. եւ ժառանգեաց զքաղաքն Արմաւենեաց:

14․ Եւ ծառայեցին որդիքն Իսրայէղի Եգղոմայ արքայի Մովաբու ամս ութ եւ տասն:

15․ եւ աղաղակեցին որդիքն Իսրայէղի առ Տէր: Եւ յարոյց նոցա Տէր փրկիչ զԱովթ որդի Գերեայ` զորդի առն Յամենացւոյ, զերկոցունց ձեռաց զաջողակն: եւ առաքեցին որդիքն Իսրայէղի ի ձեռս նորա պատարագս Եդղոմա արքայի Մովաբու:

16․ Եւ արար իւր Աովդ սուր երկսայրի թզաւ յերկայնութիւն, եւ եդ յաջոյ ազդեր իւրում ընդ տառիոտականաւն, եւ գնաց:

17․ եւ մատոյց զպատարագսն Եգղովմա արքայի Մովաբու: եւ Եգղոմ էր այր յոյլ յոյժ:

18․ Եւ եղեւ իբրեւ վախճանեաց Աովդ մատուցանել զպատարագսն, եւ արձակեաց զպատարագաբարձսն:

19․ եւ Եգղովմ դարձաւ ի դրաւշելոցն հանդերձ դաղգաղաւն: Եւ ասէ Աովդ. Բանք ինչ են իմ ընդ քեզ լռելայն արքայ: եւ ասէ Եգղովմ. Լուռ լեր: եւ ասէ ցամենեսին. Ի բաց գնացէք: եւ ելին արտաքս որ զնովաւն կային:

20․ եւ նա նստէր յամարանոցի ի վերնատան իւրում միայն առանձինն: Եւ ասէ Աովդ. Պատգամ Աստուծոյ է իմ առ քեզ արքայ: եւ յարեաւ Եգղովմ յաթոռոյն մերձ առ նա:

21․ Եւ եղեւ ընդ յառնելն նորա, ձգեաց Աովթ զձեռն իւր զձախ, եւ առ զսուրն յաջոյ ազդերէ իւրմէ, եւ եհար ի կշտի Եգղովմա,

22․ եւ արկ զերեխակալն եւ զհետ վերին. եւ արգել ճարպն զվիրաբերանն, զի ոչ ձգեաց զսուրն ի բաց ի կշտէ նորա:

23․ եւ ել ի պատշգամբն, եւ անց ընդ վանդակապատսն, եւ փակեաց զդուրսն վերնատանն ընդդէմ նորա եւ ախեաց. եւ ել գնաց ինքն:

24․ Եւ ծառայք նորա մտին` եւ տեսին. եւ ահա դուրք վերնատանն փակեալ էին: եւ ասեն` Գուցէ յաթոռսն նըստցի ի պէտս սենեկին:

25․ եւ կացին մնացին ամաչեցեալք: եւ ահա ոչ ոք էր որ բան այր զդուրս վերնատանն: եւ առին զբանալին եւ բացին. եւ ահա տէրն իւրեանց անկեալ կայր մեռեալ ի գետնի:

26․ Եւ Աովթ զերծաւ ի Սիրովթա` մինչ նոքա զաղմկաւն էին. եւ ոչ ոք էր որ փոյթ առնէր զնմանէ: եւ նա անց առ դրաւշելովքն, եւ զերծաւ անգաւ ի Սիրութա:

27․ Եւ եղեւ իբրեւ եկն Աովթ յերկիրն Իսրայէղի, էհար փող ի լերինն Եփրեմայ. եւ իջին որդիքն Իսրայէղի ընդ նմա ի լեռնէ անդի. եւ ինքն առաջի նոցա:

28․ եւ ասէ ցնոսա. իջանէք զկնի իմ, զի մատնեաց Տէր Աստուած զթշնամիս մեր զՄովաբացիս ի ձեռս մեր: Եւ իջին զկնի նորա. եւ կալան նախ զանցսն Յորդանանու ի Մովաբայ, եւ ոչ թողին մարդոյ անցանել:

29․ Եւ հարին ի Մովաբայ յաւուր յայնմիկ իբրեւ տասն հազար արանց զամենայն պատերազմողս ի նոցանէ, եւ զամենայն այր զաւրութեան. եւ ոչ ապրեցաւ եւ ոչ մի այր:

30․ Եւ վանեցաւ Մովաբ յաւուր յայնմիկ ընդ ձեռամբ Իսրայէղի: եւ դադարեաց երկիրն ամս ութսուն: եւ դատեաց զնոսա Աով մինչչեւ մեռաւ:

31․ Եւ յետ նորա յարեաւ Սամեդար որդի Անաթայ. եւ էհար յայլազգեացն վեց հարիւր այր, թող զորթս արջառոց: եւ փրկեաց նա զԻսրայէլ: