Գլուխ 7

   
1․ Եւ կանխէ Յերոբոաղ նա ինքն է Գէդէովն, եւ ամենայն զաւրն որ ընդ նմա. եւ բանակեցան առ աղբերն Արեդայ. եւ բանակն Մադիամու եւ Ամաղեկայ` էր նոցա ընդ հիւսւսոյ, ի Գաբաաթամ որ ի հովտի անտ:
2․ Եւ ասէ Տէր ցԳեդէոն. Բազում է զաւրդ որ ընդ քեզ է, առ ի չմատնելոյ ինձ զՄադիամ ի ձեռս նորա. գուցէ պարծեսցի ի վերայ իմ Իսրայէլ` եւ ասիցէ, թէ ձեռն փրկեա ցիս:
3․ Եւ ասէ ցնա Տէր. Խաւսեաց յանկանջս ժողովրդեանդ, եւ ասասցես. ո ոք վատասիրտ իցէ` դարձցի: եւ դիմեցին ի լեռնէն Գաղաադու, եւ դարձան քսան եւ երկու հազարք.
եւ մնացին տասն հազար:
4․ Եւ ասէ Տէր ցԳեդէովն. Տակաւին բազում է զաւրդ. իջո զդոսա ի ջուրն, եւ փորձեցից քեզ զդոսա անդ: եւ եղիցի զորմէ ասացից քեզ ես` թէ դա երթիցէ ընդ քեզ, նա երթիցէ ընդ քեզ. եւ զամենայնէ զոր ասացից քեզ` թէ դա մի երթիցէ, նա մի երթիցէ ընդ քեզ:
5․ եւ իջոյց զզաւրն ի ջուրն: Եւ ասէ Տէր ցԳեդէովն. Ամենայն որ լափիցէ լեզուաւ իւրով ի ջրոյ անտի իբրեւ զշուն, կացուսցես զնոսա ուրոյն. եւ ամենայն որ անգանիցի ի վերայ ծնգաց իւրոց ըմպել, կացուսցես զնոսա առանձինն:
6․ Եւ եղեւ թիւ ամենայն որ լափեցին ձեռամբ եւ լեզուաւ իւրեանց, երեք հարիւր այր. եւ մնացորդ ժողովրդեանն անգան ի վերայ ծնգաց իւրեանց ըմպել ջուր:
7․ Եւ ասէ Տէր ցԳեդէովն. Երեք հարիւր արամբք որ լափեցին ջուր` փրկեցից զքեզ. եւ տաց զՄադիամ ի ձեռս քո: եւ ամենայն ժողովուրդդ երթիցէ այր յիւրաքանչիւր ի տեղի իւր:
8․ Եւ առին զպաշար ժողովրդեանն ի ձեռս իւրեանց, եւ զփողս նոցա զեղջեւրայս. եւ զամենայն այր Իսրայէլ արձակեաց զայր ի բնակութիւն իւրում: եւ զերեքհարիւր այրն եւեթ կալաւ: եւ բանակն Մադիամու` էին ի ներքոյ նորա ի հովիտսն:
9․ Եւ եղեւ ի գիշերին յայնմիկ, եւ ասէ ցնա Տէր. Արի էջ աստի վաղվաղակի ի բանակն, զի մատնեցի զնա ի ձեռս քո:
10․ ապա թէ երկնչիցիս դու իջանել, էջ դու նախ եւ պատանեակդ քո ի փարախ բանակն.
11․ եւ լուիցես թէ զի՞նչ խաւսիցին, եւ ապա զաւրասցին ձեռք քո, եւ իջցեն ի բանակն: Եւ էջ ինքն եւ պատանեակն իւր ընդ նմա ի մասն ինչ յիսներրորդաց բանակին:
12․ Եւ Մադիամ եւ Ամաղէկ, եւ ամենայն որդիքն արեւելից բանակեալ էին ի ծործորսն, իբրեւ զմարախ բազմութեամբ. եւ ուղտուց նոցա ոչ գոյր թիւ, այլ էին իբրեւ զաւազ առ եզեր ծովու բազմութեամբ:
13․ Եւ եմուտ Գեդէովն, եւ ահա այր պատմէր ընգերի իւրում երազ: տեսի ասէ երազ, եւ ահա նկանակ գարեղէն հոլովեալ ի բանակս մեր, եւ եկն մինչչեւ ի խորանն Մադիամու, եւ էհար զնա եւ կործանեաց. եւ անկաւ խորանն վերուստ ի վայր:
14․ Պատասխանի ետ ընկեր նորա եւ ասէ. Ոչ է այն` եթէ ոչ սուրն Գեդէովնի որդւոյ Յովասու
առն Իսրաէլացւոյ. մատնեաց Տէր ի ձեռս նորա զՄադիամ` եւ զամենայն բանակս:
15․ Եւ եղեւ իբր լուաւ Գեդէովն զպատմութիւն երազւոյն` եւ զմեկնութիւն նորա, երկիր եպագ Տեառն, եւ դարձաւ ի բանակն Իսրայէղի, եւ ասէ. Արիք զի մատնեաց Տէր զբանակն Մադամու ի ձեռս մեր:
16․ Եւ բաժանեաց զերեք հարիւր այրն` յերիս առաջս. եւ ետ փողս եղջեւրեայս ի ձեռս ամենեցունց, եւ ջահս ի մէջ սափորոցն:
17․ Եւ ասէ ցնոսա. յիս հայեսջիք, եւ այնպէս արասջիք: ահա ես մտանեմ ի մէջ բանակին, եւ եղիցի որպէս ես առնիցեմ, նոյնպէս եւ դուք առնիջիք:
18․ Եւ հարից ես զփողսն եղջեւրեայս, եւ ամենեքեան որ ընդ իս էք, հարջիք եւ դուք զփողսն եղջեւրեայս, շուրջ զբանակաւն զամենայն. եւ ասասջիք, Սուր Տեառն եւ Գեդէովնի:
19․ Եւ էմուտ Գեդէովն եւ հարիւր այր ընդ նմա ի կողմն բանակին, իսկ զբան միջնոյ պահուն. միայն զարթուցանելով զարթուցան զպահապանսն, եւ հարին փողս եղջեւրեայս, եւ թաւթափեցին զսափորսն որ ի ձեռս իւրեանց.
20․ եւ հարին զփողսն եղջեւրեայս երեքին առաջքն, եւ խորտակեցին զսափորսն: Եւ առին ձախոյ ձեռամբ իւրեանց զջահսն, եւ աջոյ ձեռաւք իւրեանց զփողսն հարին, եւ աղաղակեցին եւ ասեն. Սուր Տեառն եւ Գեդէովնի:
21․ Եւ կացին իւրաքանչիւր առանձինն շուրջ զբանակաւն. եւ ընթացաւ ամենայն բանակն` փող հարին եւ փախեան:
22․ Եւ գոչեցին երեքհարիւրեքին փողն եղջերեայք: եւ եդ Տէր զսուրն առն յընկեր իւր` եւ յամենայն բանակն.
23․ եւ փախեաւ բանակն մինչչեւ ցԲեթասետտայ, եւ միագունդ մինչչեւ ցդարն Արեղմէուղա, եւ ցՏաբէթ: Եւ գոչեցին այր Իսրայէլացի ի Նեփթաղիմայ, եւ Յասիրայ, եւ յամենայն Մանասէէ, եւ զհետ մտին Մադիամու:
24․ Եւ հրեշտակս արձակեաց Գեդէովն յամենայն սահմանս Եփրեմայ, եւ ասէ. Իջէք յառաջս Մադիամու, եւ կալարուք դուք զկիրճս ջրոցն մինչչեւ ցԲեթբերեա եւ ցՅորդանան:
25․ Եւ կալան զերկոսին իշխանսն Մադիամու Զորեբ, եւ Զզեբ. եւ սպանին Զորեբ ի Կովրովրեբա, եւ Զզեբ` սպանին ի յԱկեբզեբա. եւ հալածեցին զՄադիամ, եւ զգլուխն Ովրեբայ եւ Զզեբա բերին առ Գեդէովն յայնմ կողմանէ Յորդանանու: