Գլուխ 3

   
1. Եւ յո՛ւշ արասջիր նոցա, իշխանութեանց եւ պետութեանց հնազա՛նդ լինել՝ եւ հպատա՛կ կալ. եւ ամենայն գործոց բարութեան պատրա՛ստ գտանել.

2. մի՛ զոք հայհոյել, անկռի՛ւս լինել, հե՛զս, զամենայն ցածութիւն առ ամենա՛յն մարդիկ ցուցանել:

3. Զի էաք երբեմն եւ մեք անմիտք, անհաւա՛նք, մոլորեա՛լք. ծառայեա՛ք ցանկութեանց եւ պէսպէ՛ս անառակութեանց. չարութեամբ՝ եւ նախանձո՛ւ շրջէաք, ատեցեալք՝ եւ զմիմեա՛նս ատէաք:

4. Իսկ յորժամ քաղցրութիւն եւ մարդասիրութիւն փրկչին մերոյ Աստուծոյ յայտնեցաւ,

5. ո՛չ ի գործոց արդարութեան զոր արարաք մեք, այլ ըստ իւրում ողորմութեան ապրեցոյց զմեզ ի ձեռն աւազանին միւսանգամ ծննդեանն, եւ նորոգութեամբ հոգւոյն սրբոյ.

6. զոր եհեղ ի մեզ առատութեամբ ի ձեռն Յիսուսի Քրիստոսի փրկչին մերոյ,

7. զի արդարացեալք շնորհաւքն՝ եղիցուք ժառանգաւո՛րք յուսով կենացն յաւիտենականաց:

8. Հաւատարի՛մ է բանս, եւ ի սո՛յն կամիմ զքեզ հաստատուն լինել, զի փո՛յթ արասցեն բարեաց գործոց վերակացո՛ւ լինել հաւատացեալքն յԱստուած. զի ա՛յն է բարի եւ աւգտակար մարդկան:

9. Այլ զյիմարութեան խնդիրս՝ եւ զտոհմաթիւս, եւ զհեռ, եւ զաւրինական կռիւս ի բա՛ց մերժեսջիր. զի անաւգո՛ւտք են՝ եւ սնոտիք:

10. Յառնէ հերձուածողէ՝ յետ միանգամ եւ երկիցս խրատելոյ՝ հրաժարեսջի՛ր.

11. գիտասջի՛ր զի թիւրեա՛լ է այնպիսին, եւ մեղանչէ՛ անձամբ զանձն դատապարտեալ:

12. Այլ յորժամ յղեցից առ քեզ զԱրտեմայ կամ զՏիւքիկոս, փութասջի՛ր գա՛լ առ իս ի Նիկոպաւլիս. զի ա՛նդ եդի ի մտի ձմերել:

13. Եւ զԶենոն՝ զաւրինակա՛ն դպիր՝ եւ զԱպաւղոս՝ փութո՛վ արձակեսջի՛ր, զի մի՛ ինչ պակասիցէ նոցա:

14. Ուսցի՛ն եւ մե՛րքն եւս՝ բարեաց գործոց վերակացո՛ւ լինել ի պէտս կարեւորս. զի մի՛ անպտուղք լինիցին:

15. Ողջո՛յն տան քեզ որ ընդ ի՛ս են ամենեքին: Ողջո՛յն տուր սիրելեաց մերոց հաւատովք: Շնորհք ընդ ձեզ ամենեսին: Առ Տիտոս Կրետացւոց եկեղեցւոյն առաջին ձեռնադրեալ եպիսկոպոս, գրեցաւ ի Նիկապաւլսէ Մակեդովնացւոց: