Բացատրական աստվածաշունչ, Ա. Պ. Լոպուխինի (†1904)
«Եթե ատում ես նրան, արձակի՛ր,- ասում է Իսրայելի Տեր Աստվածը,- և անարգանքը կծածկի նրա հանդերձը,- ասում է Զորությունների Տերը։ Ուստի զգուշացե՛ք ձեր հոգիների համար և ուխտազանց մի՛ եղեք»։ (Սինոդական թարգ․) [16]
Այս համարի ռուսերեն թարգմանությունն անորոշ է։ Տիխոմիրովի մոտ տրվում է հետևյալ թարգմանությունը․ «Քանզի Ես ատում եմ ապահարզանը, - ասում է Տերը` Իսրայելի Աստվածը,− և նրան, ով իր հագուստը անարգանքով է ծածկում, - ասում է Զորությունների Տերը։ Ուստի զգուշացե՛ք ձեր հոգիների համար և ուխտազանց մի՛ եղեք»։ Այս թարգմանության իմաստն ամբողջովին պարզ է։ Աստված չի կարող խրախուսել ամուսնալուծությունը, որովհետև ամուսնալուծվողն ակնհայտ մեղք է գործում (կարծես ամբողջությամբ անարգանքով է զգեստավորվում)։
Հիանալի է Մաղաքիա մարգարեի խստությունը խառնամուսնությունների և ամուսնալուծությանն առնչվող հարցերի վերաբերյալ։ Մովսեսի Օրենքն արգելում էր միայն քանանացի կանանց հետ ամուսնությունները (Ելք 34։16, Բ Օր․ 7։3), մինչդեռ Մաղաքիան ընդհանրապես արգելում է օտարազգիների հետ ամուսնությունները։
Այս հարցում նա համաձայն է Եզրասի և Նեեմիայի հետ (Բ Եզր․ 9։2, Նեեմ․ 13։23)։ Հետգերության շրջանի հրեական նոր համայնքը պետք է խստորեն պահեր իր աստվածապետական մեկուսացումը, որպեսզի չձուլվեր հեթանոսությանը։ Ճիշտ այդպես էլ Մաղաքիան խստացնում է նաև Մովսիսական Օրենքի արգելքը ամուսնալուծության վերաբերյալ։ Մովսեսն ամուսնալուծություն թույլ էր տալիս միայն որոշակի պարագաներում (Բ Օր․ 24։1), իսկ Մաղաքիան ամբողջությամբ մերժում է ամուսնալուծության իրավունքը` այս հարցում մոտենալով Քրիստոսի պատվիրանին (Մատթ․ 19։8-9)։
--------------------------------
[16](Էջմիածին թարգ․) իսկ եթէ ատելու պատճառով արձակես նրան, ամբարշտութիւնը կը ծածկի քո խորհուրդը, - ասում է Իսրայէլի Տէր Աստուածը: Զգո՛յշ վարուեցէք եւ անհաւատարիմ մի՛ եղէք, - ասում է Ամենակալ Տէրը:
(Արարատ թարգ.) «Որովհետև ես ատում եմ ապահարզանը,- ասում է Տերը՝ Իսրայելի Աստվածը,- բռնությամբ հանդերձը ծածկելը,- ասում է Զորքերի Տերը,- ուրեմն զգուշացե՛ք ձեր հոգիների համար և անհավատարիմ մի՛ եղեք»։
(Գրաբար) բայց եթէ առ ատել արձակեսցես՝ ասէ Տէր Աստուած Իսրայէլի։ Ծածկեսցէ ամպարշտութիւն զխորհուրդս քո, ասէ Տէր ամենակալ. զգոյշ լերուք յոգիս ձեր, եւ մի թողուցուք։
Հաղորդում կայքում սխալի վերաբերյալ
Տվյալ հատվածում առկա է սխալ: