Ա․ Լոպուխին
(եբր․ 14)․ Ահա Ես քեզ վրա եմ, ասում է Զորությունների Տերը։ Եւ ծխի մեջ կայրեմ քո մարտակառքերը, և սուրը կխժռի քո կորյուններին, և երկրից կոչնչացնեմ քո որսը, և այլևս չի լսվի քո դեսպանների ձայնը։ (Սինոդական թարգ․)[13]
Խորամանկ Նինվեի անհաղթելի ուժի և երկրի երեսից նրա անհետ կորչելու հակադրության պատճառով ընթերցողի մոտ ակամայից ծագող տարակուսանքը (11, 12 համարներ) մարգարեն փարատում է ամենակարող Աստծո դատաստանի մատնանշմամբ (Նավ․ 3։5ա)։ Միևնույն ժամանակ «քանի որ մարգարեն վերևում փոխաբերական իմաստով է հիշատակում առյուծների և կորյունների, որսալու և արոտավայրի մասին, ապա, ըստ այսմ, ասորեստանցիների կործանումն էլ է այլաբանորեն կանխատեսում։ Եվ քանի որ գազանների ինչ−որ քարանձավներում թաքնվելու և այնտեղից դուրս գալ չցանկանալու դեպքում որսորդներն այդ քարանձավների մուտքերի մոտ ծուխ են դնում, նրանց դուրս գալ են ստիպում և դուրս եկողին էլ աղեղով են դիմավորում, ուստի այս պարագայի նմանողությամբ Աստված ասում է, որ ամբողջ բազմությանը ծխի կմատնի, իսկ առյուծներին՝ սրի․ իսկ սա քաղաքի հրկիզում և թագավորների սպանություն է նշանակում, որից հետո էլ որսն ավարտվում է» (երանելի Թեոդորոս, Տասներկու մարգարեների մեկնությունը, Մ․, 1857, գիրք 3, էջ 15)։ Մինչ այս հնչած մարգարեի այլաբանական խոսքը համարի եզրափակիչ արտահայտության մեջ արդեն վերափոխվում է ասորական տերության անդառնալի կործանման մասին ուղղակի խոսքի․ «և այլևս չի լսվի քո դեսպանների ձայնը», որն էլ երանելի Հերոնիմոսը հետևյալ կերպ է վերաշարադրում․ «Դու այլևս երկրներ չես ամայացնի և հարկեր չես պահանջի, և քո սուրհանդակներն այլևս լսելի չեն լինի տարբեր երկրներում» («Մեկ գիրք՝ Նավում մարգարեի մեկնության»։ Կիև, 1896, մաս 13, էջ 289)։ Սուրհանդակները, Ասորեստանի թագավորի դեսպաններն էին, որոնք նրա հրամանները տանում էին հպատակ ժողովուրդներին և պահանջում էին վերջիններիս աներկբա հնազանդությունը իրենց տիրոջ կամքին և հրամաններին։ Այդպիսին էր հայտնի Ռաբսակը (Դ Թագ․ 18։17−37,Ես․ 36։13−20)։
Այսպիսին է Նինվեի հանդեպ ամենակարող Աստծո, Զորությունների Տիրոջ, (եբրայերեն՝ «Иегова−Цебаот») դատաստանը։ Հայտնի է Աստծո այս անվան եռակի նշանակությունը՝ Իսրայելի բանակի (Ելք․ 6։26, 7։4), երկնային լուսատուների (Ես․ 40։26, Սոփ․ 1։5 և այլն) և, հատկապես, Հրեշտակների զորքերի առնչությամբ (Գ Թագ․ 22։19, Ես․ 24։21, նաև պրոֆ․ Ա․ Ա․ Գլագոլևի գրքում, Հինկտակարանյան աստվածաշնչյան ուսուցում հրեշտակների մասին, Կիև, 1900, էջ 238−256)։ Հաշվի առնելով ասորեստանցիների մոտ գոյություն ունեցող երկնային մարմինների պաշտամունքը՝ Իսրայելի Աստծուն Զորությունների Տեր անվանելն ինքնին ասորեստանցիներին պետք է ցույց տար, որ ոչինչ այլևս չի կարող նրանց փրկել այդ Աստծո ձեռքից, Ով նրանց աստվածների միակ Տերն է (Բ Օր․ 11։17)։
--------------------------------
[13](Էջմիածին թարգ․) «Ահա ես քո դէմ եմ, - ասում է Ամենակալ Տէրը, - ծխով կ՚այրեմ քո զօրքերը, սուրը կ՚ուտի քո առիւծներին, երկրից կը վերացնեմ քո որսը, եւ այլեւս չեն լսուի քո գործերը»:
(Արարատ թարգ․) «Ահա ես քո դեմ եմ,- ասում է Զորքերի Տերը,- և պիտի ծխով այրեմ նրա մարտակառքերը. սուրը պիտի ուտի քո կորյուններին, և երկրից պիտի բնաջնջեմ քո որսին, և քո պատգամաբերների ձայնն այլևս չպիտի լսվի»։
(Գրաբար) Ահաւասիկ ես ի վերայ քո, ասէ Տէր ամենակալ, եւ այրեցից ծխով զբազմութիւն քո՝ եւ կերիցէ սուր զառեւծս քո, եւ բարձից յերկրէ զորս քո, եւ ոչ եւս լուիցին գործք քո։
Հաղորդում կայքում սխալի վերաբերյալ
Տվյալ հատվածում առկա է սխալ: