Ա. Լոպուխին
7-9. Այսպես է ասում Տեր Աստված. «Դա տեղի չի ունենա և չի լինի»: [7] Քանի որ արամեացիների գլուխը Դամասկոսն է, և Դամասկոսի գլուխը՝ Ռասինը: Իսկ մոտավորապես վաթսունհինգ տարուց Եփրեմը կդադարի ժողովուրդ լինելուց: Եփրեմի գլուխը Սամարիան է, իսկ Սամարիայի գլուխը՝ Ռոմելայի որդին: Իսկ եթե դուք չեք հավատում, ապա դա այն պատճառով է, որ դուք հաստատ համոզված չեք: (Սինոդական թարգ․)
Տերը Եսայի մարգարեի միջոցով Աքազին տեղեկացնում է, որ ո՛չ Ասորիքի թագավորը, ո՛չ էլ Իսրայելի թագավորը չեն կարողանալու տիրել Հուդայի թագավորությանը, այլ միայն ու միայն իրենց նախկին տիրույթների կառավարիչներ են մնալու, և այդ էլ ոչ երկար ժամանակով: Իսրայելի թագավորությանն արդեն իսկ վաթսունհինգ տարուց սպառնում է վերջնական կործանում: Այս վերջին մարգարեությունն ամենայն հավանականությամբ ի նկատի ունի ոչ թե Սամարիայի ոչնչացումը, որը տեղի ունեցավ շատ ավելի շուտ՝ այդ մարգարեացման իրականացումից 13 տարի անց (723թ.), այլ դեպի Ասորեստան Իսրայելի ժողովրդի մնացորդացի վերաբնակեցումը և Իսրայելի նախկին թագավորության ամայացած տարածքներում Միջագետքից եկած բնակչության հաստատումը, որը տեղի ունեցավ ասորական թագավոր Ասարխադոնի ժամանակաշրջանում (Դ Թագ. 17:24 և շարունակությունը, Ա Եզր. 4:2): Այսպիսով՝ ակնհայտ է, որ մարգարեն այս վաթսունհինգ տարիների մեջ ներառում է Աքազ թագավորի կառավարման 14 տարիները, ինչպես նաև Եզեկիայի կառավարման 29 տարիներն ու Մանասեի կառավարման 22 տարիները:
«Եթե դուք չեք հավատում». մարգարեն նկատում է Աքազի անվստահությունն իր խոսքերի հանդեպ և ակնարկում է, որ նա կարող է հնարավորություն ունենալ վստահանալու քիչ առաջ ասված խոսքերի մեջ:
«Եթե դուք չեք հավատում» արտահայտության թարգմանությունը, որն առաջարկվում է նորագույն մեկնիչների կողմից, բավականին անհասկանալի է:
--------------------------------
[7](Էջմիածին թարգ․) Այսպէս է ասում Զօրութիւնների Տէրը. «Այդ խորհուրդը չի կատարուելու եւ չի լինելու.
(Արարատ թարգ․) Այսպես է ասում Տեր Աստված. "Չպիտի կատարվի և չպիտի լինի,
(Գրաբար) Այսպէս ասէ Տէր զաւրութեանց. մի կացցէ խորհուրդն այն, եւ մի եղիցի:
Հաղորդում կայքում սխալի վերաբերյալ
Տվյալ հատվածում առկա է սխալ: