1. Եւ էր անդ ոմն յազգէ Ղեւեայ. որ առ իւր կին ի դստերաց անտի Ղեւեայ:
2. Եւ յղացաւ` ծնաւ արու: Եւ տեսանէին զնա կայտառ. եւ թաքուցին զնա ամիսս երիս:
3. Եւ իբրեւ ոչ եւս կարէին թաքուցանել, առ մայրն նորա տապանակ պրտուեայ, եւ ծեփեաց զնա կպրաձիւթով. եւ եդ ի նմա զմանուկն, եւ ընկէց զայն ի խաղ մի առ ափն գետոյն:
4. Եւ դիտէր քոյրն նորա ի հեռաստանէ, տեսանել թէ զի՞նչ անցք անցանիցեն ընդ նա:
5. Եւ իջեալ դուստրն փարաւոնի լուանալ ի գետն. եւ նաժիշտք նորա շրջէին առ գետովն: Եւ տեսեալ զտապանակն ի խաղի անդ, առաքեաց զնաժիշտ մի առնուլ զնա:
6. Եբաց` եւ ետես զմանուկն. եւ լայր մանուկն ի տապանակի անդ: Խանդաղատեցաւ զնովաւ դուստրն փարաւոնի, եւ ասէ. Ի մանկա՞նց Եբրայեցւոց է դա:
7. Եւ ասէ քոյրն նորա ցդուստրն փարաւոնի. Կամի՞ս զի կոչեցից քեզ կին մի դայեակ ի հեբրայեցւոց անտի. եւ սնուցանիցէ քեզ զմանուկդ:
8. Ասէ դուստրն փարաւոնի` Երթ: Գնաց աղջիկն եւ կոչեաց զմայր մանկանն:
9. Եւ ասէ ցնա դուստրն փարաւոնի. Առ զմանուկդ, եւ սնո ինձ զդա. եւ ես տաց քեզ զվարձս քո: Եւ առ կինն զմանուկն` եւ սնոյց զնա: Եւ իբրեւ հաստատեցաւ մանուկն, ած զնա առ դուստրն փարաւոնի,
10. եւ եղեւ նմա յորդեգիրս: Եւ անուանեաց զանուն նորա Մովսէս. ասէ, Ի ջրոյ անտի հանի զդա:
11. Եւ եղեւ յետ աւուրց բազմաց, իբրեւ եղեւ մեծ Մովսէս, ել առ եղբարս իւր որդիսն Իսրայէլի, հայեցեալ ի չարչարանս նոցա. ետես այր մի Եգիպտացի, զի հարկանէր զոմն Եբրայեցի յեղբարց իւրոց` յորդւոցն Իսրայէլի:
12. Հայեցեալ յայս կոյս յայն կոյս` ոչ զոք տեսանէր. եհար զԵգիպտացին, եւ ծածկեաց զնա ընդ աւազով:
13. Եւ ելեալ յերկրորդում աւուր, տեսանէր երկուս արս Եբրայեցիս ընդ միմեանս մարտուցեալս. եւ ասէ ցայրն որ զրկէրն. Ընդ է՞ր հարկանես զընկերդ:
14. Եւ նա ասէ, Ո՞ կացոյց զքեզ այր իշխան եւ դատաւոր ի վերայ մեր: Եթէ սպանանե՞լ զիս կամիցիս որպէս երէկ սպաներ զԵգիպտացին: Զահի հարաւ Մովսէս` եւ ասէ. Թէ այնպէս յայտնի եղեւ բանն:
15. Եւ լուաւ փարաւոն զբանն, եւ խնդրէր սպանանել զՄովսէս: Եւ փախեաւ Մովսէս յերեսաց փարաւոնի, եւ բնակեաց յերկրին Մադիամու: Զ Եւ եկեալ յերկրին Մադիամու` նստաւ առ ջրհորի միում:
16. Եւ քրմին Մադիանացւոց էին դստերք եւթն, որ արածէին զխաշինս հաւրն իւրեանց, եւ եկեալ էին հանել ջուր, մինչչեւ լցին զաւազանսն, արբուցեալ խաշանց հաւրն իւրեանց:
17. Եւ եկեալ այլ հովիւք` մերժեցին զնոսա ի բաց: Յարուցեալ Մովսէս թափեաց զնոսա. եւ եհան նոցա ջուր, եւ արբոյց զխաշինս նոցա:
18. Եւ եկին առ Հռագուէլ հայրն իւրեանց: Եւ նա ասէ ցնոսա. Զի՞ է զի յարեւու եկիք այսաւր:
19. Եւ նոքա ասեն. Այր մի Եգիպտացի փրկեաց զմեզ ի հովուաց անտի. եւ եհան ջուր եւ արբոյց խաշանց մերոց:
20. Եւ նա ասէ ցդստերսն իւր. Եւ ուր է, ընդ է՞ր թողէք զայրն. արդ` կոչեցէք զնա` զի կերիցէ հաց:
21. Եւ բնակեցաւ Մովսէս առ առնն, եւ ետ զՍեպփովրա դուստր իւր Մովսիսի կնութեան:
22. Յղացաւ կինն` եւ ծնաւ որդի. եւ անուանեաց զանուն նորա Մովսէս` Գերսամ. ասէ` Զի պանդուխտ եմ ես յաւտար երկրի:
23. Եւ յետ աւուրց բազմաց մեռաւ թագաւորն Եգիպտացւոց. եւ տառապէին որդիքն Իսրայէլի ի գործոյ անտի, եւ աղաղակէին ի վեր: Եւ ել աղաղակ նոցա առաջի Աստուծոյ ի գործոյ անտի:
24. Եւ լուաւ Աստուած հեծութեան նոցա: Եւ հիշեաց Աստուած զուխտ իւր որ ընդ Աբրաամու եւ Սահակայ եւ Յակոբայ.
25. Եւ հայեցաւ Աստուած յորդիսն Իսրայէլի. եւ ծանուցաւ նոցա:
Հաղորդում կայքում սխալի վերաբերյալ
Տվյալ հատվածում առկա է սխալ: