Գլուխ 16

   
1․ Չուեցին յԵղիմայ, եւ եկին ամենայն ժողովուրդ որդւոցն Իսրայէլի յանապատն ի Սին, որ է ընդ Եղիմ եւ ընդ Սինա:
Եւ յաւուրն հինգետասաներորդի յերկրորդի ամսոյն ելանելոյ նոցա յերկրէն Եգիպտացւոց:
2․ Տրտնջեաց ամենայն ժողովուրդ որդւոցն Իսրայէլի զՄովսիսէ եւ զԱհարոնէ յանապատի անտ:
3․ Եւ ասեն ցնոսա որդիքն Իսրայէլի. Լաւ էր թէ մեռեալ էաք հարուածովքն ի Տեառնէ յերկրին Եգիպտացւոց. մինչ նստէաք առ կաթսայ մսոյն, եւ ուտէաք հաց յագ. քան հանէք զմեզ յանապատ յայս, սպանանել զամենայն ժողովուրդս ի սովոյ:
4․ Եւ ասէ Տէր ցՄովսէս. Ահա ես տեղացից ձեզ հաց յերկնից. եւ ելցէ ժողովուրդ իմ եւ ժողովեսցեն զաւրըստաւրէն, զի փորձեցից զնոսա` եթէ գնայցե՞ն յաւրէնս իմ, թէ ոչ:
5․ Եւ եղիցի յաւուրն վեցերորդի, պատրաստիցեն զոր ինչ բերիցենն. եւ եղիցի կրկին քան զայն, զոր աւրըստաւրէն ժողովիցեն:
6․ Եւ ասեն Մովսէս եւ Ահարոն ցամենայն ժողովուրդ որդւոցն Իսրայէլի. Ընդ երեկոյս գիտասջիք` եթէ Տէր եհան զձեզ յերկրէն Եգիպտացւոց:
7․ Եւ առաւաւտուց տեսջիք զփառսն Տեառն: Ի լսել նորա զտրտունջ ձեր զԱստուծոյ: Այլ մեք ով եմք զի տրտնջէք զմէնջ:
8․ Եւ ասէ Մովսէս` Ի տալ ձեզ Տեառն ընդ երեկոյս միս ուտելոյ. եւ ընդ առաւաւտս հաց յագ. վասն լսելոյ Տեառն զտրտունջ ձեր զոր դուք տրտնջիցէք զմէնջ. քանզի մեք ո՞վ եմք. զի ոչ զմէնջ է տրտունջդ ձեր, այլ զԱստուծոյ:
9․ Եւ ասէ Մովսէս ցԱհարոն. Ասա ցամենայն ժողովուրդ որդւոցդ Իսրայէլի. Մատերուք առաջի Տեառն, քանզի լուաւ զտրտունջ ձեր:
10․ Մինչդեռ խաւսէր Ահարոն ընդ ամենայն ժողովրդեան որդւոցն Իսրայէլի, դարձան յանապատն. եւ ահա փառք Տեառն երեւեցան ամպով:
11․ Եւ խաւսեցաւ Տէր ընդ Մովսիսի` եւ ասէ.
12․ Լուայ զտրտունջ որդւոցն Իսրայէլի: Արդ խաւսեաց ընդ դոսա` եւ ասասցես. Ընդ երեկոյս միս կերիջիք, եւ ընդ առաւաւտս հացիւ յագեսջիք. եւ ծանիջիք թէ ես եմ Տէր Աստուած ձեր:
13․ Եւ եղեւ ընդ երեկոյսն եւ ել լորամարգին եւ ծածկեաց զբանակն:
14․ Եւ եղեւ ընդ առաւաւտն` ընդ արկանել ցաւղոյն շուրջ զբանակաւն. եւ ահա ի վերայ երեսաց անապատին` մանր իբրեւ զգինձ, սպիտակ իբրեւ զեղեամն ի վերայ երկրին:
15․ Իբրեւ տեսին զայն որդիքն Իսրայէլի, ասեն այր ցընկեր, Զի՞նչ է այս. քանզի ոչ գիտէին զինչ իցէ: Եւ ասէ ցնոսա Մովսէս. Այդ է հացն զոր ետ ձեզ Տէր ուտելոյ.
16․ եւ այս բան է` զոր պատուիրեաց ձեզ Տէր: Ժողովեցէք ի դմանէ իւրաքանչիւր ըստ բաւականի իւրում. չափով ըստ գլուխ. ըստ թուոյ անձանց ձերոց, ըստ իւրաքանչիւր ըստ վրանս ձեր ժողովեցէք:
17․ Եւ արարին այնպէս որդիքն Իսրայէլի. եւ ժողովեցին, որ շատ եւ որ սակաւ:
18․ Եւ չափեցին չափովն: Որոյ շատն էր` ոչ յաւելաւ. եւ որոյ սակաւն էր` ոչ պակասեաց: Իւրաքանչիւր ըստ բաւականի իւրում ժողովեցին:
19․ Եւ ասէ ցնոսա Մովսէս. Մի ոք թողուցու այտի յայգ:
20․ Եւ ոչ լուան Մովսիսի. այլ թողին ոմանք ի նմանէ յայգ. եւ եռաց ի նմա որդն, եւ նեխեցաւ: Եւ դառնացաւ ի նոսա Մովսէս:
21․ Եւ քաղէին այգուն այգուն իւրաքանչիւր ըստ բաւականի իւրում. եւ իբրեւ արեւն ջեռնոյր` հալէր:
22․ Եւ եղեւ յաւուրն վեցերորդի ժողովեցին զպէտսն կրկին` երկուս չափս առ մի մի: Եւ մտին ամենայն իշխանք ժողովրդեանն եւ պատմեցին Մովսիսի:
23․ Ասէ ցնոսա Մովսէս. Այս բան է զոր խաւսեցաւ Տէր: Շաբաթ` հանգիստ` սուրբ Տեառն վաղիւ: Որ ինչ եփելոց էք` եփեցէք, եւ որ ինչ հասուցանելոց էք` հասուցէք. եւ զամենայն զաւելորդն թողուցուք յամանս մինչչեւ ցառաւաւտ:
24․ Եւ թողին ի նմանէ յայգ. որպէս հրամայեաց նոցա Մովսէս. եւ ոչ նեխեցաւ, եւ ոչ եղեւ ի նմա որդն:
25․ Եւ ասէ Մովսէս. Կերայք զայդ այսաւր. քանզի շաբաթ Տեառն է այսաւր. ոչ գտանէք այսաւր զայդ ի դաշտի:
26․ Զվեց աւր ժողովեցէք զայդ. եւ յաւուրն եւթներորդի շաբաթ. ոչ լինիցի ի նմա:
27․ Եւ եղեւ յաւուրն եւթներորդի` ելին ոմանք ի ժողովրդենէ անտի քաղել` եւ ոչ գտին:
28․ Եւ ասէ Տէր ցՄովսէս. Մինչչեւ յե՞րբ ոչ կամիք լսել պատուիրանաց իմոց եւ աւրինաց:
29․ Տեսէք զի Տէր ետ ձեզ զաւրս զայս շաբաթ. վասն այնորիկ ինքն ետ ձեզ յաւուրն վեցերորդի հաց` երկուց աւուրց: Նստարուք իւրաքանչիւր ի տունս ձեր. եւ մի ոք ելանիցէ ի տեղւոջէ իւրմէ յաւուրն եւթներորդի:
30․ Եւ շաբաթացաւ ժողովուրդն յաւուրն եւթներորդի:
31․ Եւ անուանեցին որդիքն Իսրայէլի զանուն նորա Ման: Եւ նա էր իբրեւ զսերմն գնձոյ` սպիտակ. եւ համ նորա իբրեւ զխորիսխ մեղու:
32․ Եւ ասէ Մովսէս. Այս բան է` զոր հրաման ետ Տէր. Լցէք լի չափով զմանանայդ յաման մի. եւ պահեցէք յազգս ձեր. զի տեսանիցէք զհացդ զոր կերայք դուք յանապատի աստ. ի ժամանակի իբրեւ եհան զձեզ Տէր յերկրէն Եգիպտացւոց:
33․ Եւ ասէ Մովսէս ցԱհարոն. Առ սափոր մի ոսկի, եւ արկցես ի նա լի չափովդ մանանայ, եւ դիցես զնա առաջի Աստուծոյ ի պահեստ յազգս ձեր:
34․ Որպէս հրաման ետ Տէր Մովսէսի: Եւ եդ զայն Ահարոն առաջի վկայութեանն ի պահեստ:
35․ Եւ որդիքն Իսրայէլի կերան զմանանայն զքառասուն ամ մինչչեւ եկին ի շէն երկիրն, զմանանայն ուտէին. մինչչեւ հասին ի կողմն Փիւնիկեցւոց:
36․ Եւ չափն էր տասներորդ երից գրուոց: