1. Իբրեւ լուաւ Յաբին արքայ Ասովրայ, առաքեաց առ Յովբաբ արքայ Մառովնայ, եւ առ արքայն Սոմերովնի, եւ առ արքայն Աքիփայ.
2. եւ առ թագաւորս մեծի Սիդովնայ ի լեռնայինս, եւ յՌաբաթ հանդէպ Քեներեթայ: Եւ ի դաշտայինն, եւ ի Նափեթովբ, եւ ի ծովեզերեայսն
3. Քանանացւոց յարեւելից կողմանէ. եւ ի ծովեզերեայսն Ամուրհացիս, եւ ի Քետացիս, եւ ի Փերեզացիս, եւ Յեբուսացիսն որ ի լերինն, եւ ընդ Խեւացիսն որ ընդ Ահերմովնիւ ի Մասսեփայ:
4. Եւ ելին ինքեանք եւ թագաւորք իւրեանց ընդ նոսա. եւ զաւր բազում իբրեւ զաւազ առ ափն ծովու բազմութեամբ, եւ երիւարք եւ կառք բազում յոյժ.
5. գումարեցան ամենայն թագաւորքն այնոքիկ եւ եկին ի միասին. եւ բանակեցան միանգամայն առ ջրովն Ռովնա տալ պատերազմ ընդ Իսրայէղի:
6. Եւ ասէ Տէր ցՅեսու. Մի երկիցես յերեսաց նոցա, զի վաղիւ ի սոյն ժամ մատնեցից ես զամենեսեան զնոսա վանեալս առաջի որդւոցն Իսրայէղի. եւ զերիւարս նոցա կարթակոտորս արասցես, եւ զկառս նոցա այրեսցես հրով:
7. Եւ եկն Յեսու եւ ամենայն զաւրն պատերազմող ընդ նմա, ի վերայ նոցա ի ջուրն Մոռովնայ յանկարծաւրէն. եւ անկան ի վերայ նոցա ի լեռնակողմանն:
8. եւ մատնեաց զնա Տէր ձեռամբ Իսրայէղի. եւ կոտորեալ զնոսա արարին հալածական մինչչեւ ցմեծն Սիդովն, եւ մինչչեւ ցՄասրեփովթայիմ, եւ մինչչեւ ցդաշտսն Մասեփայ ընդ արեւելս. եւ կոտորեցին զնոսա մինչչեւ չմնալոյ ի նոցանէ ապրեալ:
9. Եւ արար ընդ նոսա Յեսու որպէս պատուիրեաց նմա Տէր. զերիւարս նոցա կարթակոտորս արար, եւ զկառս նոցա այրեաց հրով:
10. Եւ դարձաւ Յեսու ի ժամանակին յայնմիկ, եւ առ զԱսովր եւ զթագաւոր նորա, եւ սպան զնա սրով: զի Ասովր էր նախիշխան ամենայն թագաւորութեանցն այնոցիկ:
11. եւ կոտորեցին զամենայն շնչաւոր որ ի նմա սրով սուսերի, եւ սատակեցին զամենեսին. եւ ոչ մնաց ի նմա շնչաւոր: Եւ զԱսովր այրեցին հրով.
12. եւ զամենայն քաղաքս թագաւորութեանցն այնոցիկ, եւ զթագաւորս նոցա առ Յեսու, եւ կոտորեաց զնոսա սրով սուսերի, եւ սատակեաց զնոսա. Զոր աւրինակ հրամայեաց նոցա Մովսէս ծառայ Տեառն:
13. Այլ ամենայն քաղաքս հողացեալս ի նոցանէ ոչ այրեաց Իսրայէլ, բայց միայն զԱսովր զոր այրեացն Յեսու.
14. եւ զամենայն կապուտ նորա եւ զանասուն առին իւրեանց յաւարի որդիքն Իսրայէլի. բայց զամենեսին սատակեցին զնոսա սրով սուսերի մինչչեւ կորուսին զնոսա, եւ ոչ թողին ի նոցանէ եւ ոչ մի շնչաւոր.
15. զոր աւրինակ հրամայեաց Տէր Մովսէսի ծառայի իւրում. եւ որպէս պատուիրեաց Մովսէս Յեսուայ` նոյնպէս արար Յեսու. եւ ոչ անց եւ ոչ զիւիք յամենայնէ զոր պատուիրեաց նմա Մովսէս:
16. Եւ առ Յեսու զամենայն երկիրն զայն, զլեռնակողմն, եւ զամենայն երկիրն Նագեբ, եւ զամենայն երկիրն Գոսոմ, եւ զդաշտայինս եւ զարեւմտեայսն, եւ զլեառն Իսրայէղի, եւ զհովիտս նորա լերամբն.
17. ի լեռնէն Աքեղայ եւ ցելսն Սէիրայ, մինչչեւ ցԲաաղգադ: եւ զդաշտայինն Լիբանանու առ ոտամբն Ահերմովնի: եւ զթագաւորս նոցա. զամենեսին առ եւ կոտորեաց:
18. Եւ աւորս բազումս արար Յեսու ընդ ամենայն թագաւորս ընդ այնոսիկ պատերազմ:
19. եւ ոչ էր քաղաք զոր ոչ մատնեաց որդւոցն Իսրայէղի, բայց ի Խեւացւոցն որ բնակեալ էր ի Գաբաւովն. զամենեսին առ պատերազմաւ:
20. Զի ի Տեառնէ կարծրանային սիրտք նոցա պատահել պատերազմաւ Իսրայէղի` զի սատակիցին: եւ մի տացի նոցա ողորմութիւն, այլ զի սատակիցին որպէս եւ խաւսեցաւ Տէր ընդ Մովսէսի:
21. Եւ եկն Յեսու ի ժամանակի յայնմիկ` եւ սատակեաց զԵնակիմսն, ի լեռնակողմանն Քեբրովրի, եւ Դաբիրայ, եւ Յանովբայ` եւ յամենայն լեռնէն Իսրայէղի, եւ յամենայն լեռնէն Յուդայ, հանդերձ քաղաքաւք նոցա. եւ սատակեաց զնոսա Յեսու,
22. եւ ոչ մնաց յԵնակիմացն յորդւոցն Իսրայէղի, բայց միայն ի Գազա, եւ ի Գէթ, եւ յԱսէթովթ մնացին:
23. Եւ առ Յեսու զամենայն երկիրն որպէս եւ պատուիրեաց Տէր Մովսէսի. եւ ետ Յեսու ի ժառանգութիւն Իսրայէղի վիճակաւ ընդ ցեղից նոցա: եւ դադարեաց երկիրն պատերազմեալ:
Հաղորդում կայքում սխալի վերաբերյալ
Տվյալ հատվածում առկա է սխալ: