1. Եւ Յեսու ծերացեալ եւ անցեալ զաւուրբք: Եւ ասէ Տէր ցՅեսու. Դու ծերացեալ եւ անցեալ ես զաւուրբք. Եւ երկիր բազում մնացեալ է ի ժառանգութենէ:
2. Եւ այս է երկիրն մնացեալ. ամենայն սահմանք Փխղշտացւոց. Գէսուրի.
3. եւ Քանանացին, յանշինէ անտի ընդդէմ Եգիպտոսի, մինչչեւ ի սահմանս Ակարովնի, ընդ աջմէ Քանանացւոյն համարի հնգից նախարարացն Փղշտացւոցն. Գազացւոյն, եւ Ազովտացւոյն, եւ Ասկալովնացւոյն, եւ Գեթացւոյն, եւ Ակկարովնացւոյն. եւ Խեւացւոյն ի Թեմանայ:
4. Եւ ամենայն երկրին Քանանացւոց ի Գազայ, եւ Սիդովնացիք մինչչեւ ցԱփեկկա մինչչեւ ցսահմանս Ամուրհացւոց:
5. եւ զամենայն երկրին Գաբաի փղշտացւոց` եւ զամենայն Լիբանան յելից արեւու, ի Գաղգաղա` առ ոտամբն լերինն Ահերմովնի մինչչեւ ցմուտս Եմաթայ.
6. ամենայն որ բնակեալ իցէ զլեռնակողմն, ի Լիբանանէ մինչչեւ ի Մասերեփ Ովթմայիմ: Զամենայն Սիդովնացիս: ես սատակեցից զնոսա յերեսաց Իսրայէղի. բայց դու բաշխեա զնոսա ի ժառանգութիւն Իսրայէղի որպէս եւ պատուիրեցի քեզ:
7. Եւ արդ` բաժանեա զերկիրս զայս ի ժառանգութիւն ինն ցեղիցն, եւ կիսոյ ցեղին Մանասէ: ի Յորդանանէ մինչչեւ ցծովն մեծ ընդ կողմն արեւմտից` տացես զնա. եւ ծովն մեծ սահմանեսցէ:
8. Եւ երկուց ցեղից` եւ կիսոյ ցեղին Մանասէի` որ են ընդ Ռովբենի ընդ Գադայ որ առին զժառանգութիւնս իւրեանց զոր ետ Մովսէս յայնկոյս Յորդանանու յարեւելից. բաժանեաց նոցա Մովսէս ծառայ Տեառն,
9. յարուերայ` որ է առ եզերբ հեղեղատին Առնովնայ, եւ զքաղաքն որ ի մէջ ձորոյն, եւ զամենայն զՄիսովր, ի Մեդաբայ մինչչեւ ցԳեդովն:
10. զամենայն քաղաքսն Սեհոնի Ամուրհացւոյն որ թագաւորեաց յԵսեբովն, մինչչեւ ցսահմանս որդւոցն Ամովնայ:
11. եւ զԳաղաադայինն, եւ զսահմանս Գեսուրայ, եւ զՄաքաթեաց, զամենայն լեռն Ահերմովն. եւ զամենայն Բասանաստանն մինչչեւ ցՍեղքա:
12. Զամենայն թագաւորութիւնն Ովգայ արքայի ի Բասա, որ թագաւորեաց յԵդրային եւ յԱստարովթ. նա մնայ ի մնացորդաց¡ ի սկայիցն. եւ էհար զնա Մովսէս` եւ սատակեաց:
13. Եւ ոչ սատակեցին որդիքն Իսրայէղի զԳեսուրի, եւ զՄաքաթի, եւ զՔանանացին. եւ բնակէր թագաւորն Գեսուրայ Մաքառի ի մէջ որդւոցն Իսրայէղի մինչչեւ ցայսաւր:
14. Բայց ցեղին Ղեւեայ ոչ տուաւ ժառանգութիւն. զի Տէր Աստուած Իսրայէղի է նոցա ժառանգութիւն` որպէս եւ ասաց նոցա Տէր: Եւ այս են բաժինք զոր բաժանեաց Մովսէս որդւոցն Իսրայէղի, յԱռաբովթ Մովաբ յայնկոյս Յորդանանու յանդիման երէքովի:
15. Եւ ետ Մովսէս ցեղին Ռովբենի ըստ տոհմից նոցա:
16. Եւ եղեւ սահմանք նոցա յարուէրայ` որ կայ յանդիման ձորոյն Առնովնայ, եւ ամենայն Միսովր. եւ Մեդաբայ
17. մինչչեւ ցՍեդովն. եւ զամենայն քաղաքս նոցա որ էին ի Մեսովր, եւ զԳեբովն, եւ զԲաթմովթբաաղ. եւ զտունս Բէեղմմութայ.
18. եւ զՅասսայ, եւ զԿեդեմովդ, եւ զՄեփայաթ.
19. եւ զԿարիաթեմ եւ զՍեբամա, եւ զՍարթ, եւ զՍիովր ի լերինն Ենակայ:
20. եւ զՓեփագովր. եւ զԱսեդովթփասգայ, եւ զԲեթսիմութ, եւ զամենայն քաղաքս Միսովրայ,
21. Եւ զամենայն թագաւորութիւնս Սեհովնի արքայի Ամուրհացւոց, որ թագաւորեաց յԵսեբովն. զոր էհար Մովսէս, զնա եւ զիշխանսն Մադիամու, եւ Զեւի, եւ Զրոկոմ, եւ զսուր, եւ զուր, եւ զորբոք. զիշխանս Պարասիովնացն զբնակեալս յերկրին:
22. Եւ զԲաղաամ զԲէովրեան զհարցուկ, կոտորեցին որդիքն Իսրայէղի սրով ի միում վայրկենի:
23. եւ եղեն սահմանք Ռուբենի Յորդանան սահման: Այս է ժառանգութիւն որդւոցն Ռովբենի ըստ տոհմից իւրեանց, քաղաքք եւ աւանք նոցա:
24. Եւ ետ Մովսէս որդւոցն Գադայ ըստ տոհմից իւրեանց.
25. եւ եղեն նոցա սահմանք յԱզերայ, ամենայն քաղաքք Գաղաադու. եւ կէս երկրի որդւոցն Ամովնայ մինչչեւ յարուէր որ է յանդիման Ռաբբայ.
26. եւ յԵսերովնայ մինչչեւ ցԱմովթ` առ Մասփայիւ. եւ Բոտանիմ, եւ Մաանեմ մինչչե ցսահմանսն Դաբիրայ:
27. Եւ յԵմեկն Բեթերամ, եւ Բեթնամրա, եւ սովքով, եւ սափովն. եւ զայլ եւս թագաւորութիւնս Սեհովնի արքայի Եսեբովնայ. Յորդանան սահման է. մինչչեւ յեզր ծովուն Քեներովթայ, յայնկոյս Յորդանանու յարեւելից:
28. Այս ժառանգութիւն է որդւոցն Գադայ ըստ տոհմից իւրեանց. ըստ քաղաքաց նոցա` եւ ագարագք նոցին:
29. Եւ ետ Մովսէս կիսոյ ցեղին Մանասէի. եւ եղեւ կիսոյ ցեղից որդւոցն Մանասէի, ըստ տոհմից իւրեանց:
30. եւ եղեն սահմանք նոցա ի Մաենեմա, եւ ամենայն Բասան. եւ ամենայն թագաւորութիւն Ովգայ արքայի Բասանու, եւ ամենայն աւանք Յայիրայ, որ են ի Բասանաստանի. վաթսուն քաղաք:
31. եւ կէս երկրին Գաղաադու, եւ յԱստարովթ, եւ յԵդրային, քաղաքք թագաւորութեան Ովգայ ի Բասանաստանի: Եւ տուան որդւոցն Մաքիրայ որդւոյն Մանասէի, եւ կիսոց որդւոցն Մաքիրայ որդւոցն Մանասէի ըստ տոհմից իւրեանց:
32. Սոքա են զորս ժառանգեցոյց Մովսէս յայնկոյս Յորդանանու յՌաբովթ Մովաբ յայնմ կողմանէ Յորդանանու հանդէպ երէքոյի յարեւելից:
33. Եւ ցեղին Ղեւեայ ոչ ետ Մովսէս ժառանգութիւն. զի Տէր Աստուած Իսրայէղի ինքն է ժառանգութիւն նոցա` որպէս եւ խաւսեցաւ ընդ նոսա:
Հաղորդում կայքում սխալի վերաբերյալ
Տվյալ հատվածում առկա է սխալ: