Գլուխ 18

   
1․ Եւ եկեղեցացաւ ամենայն ժողովուրդ որդւոցն Իսրայէղի ի սելով, եւ կանկնեցին անդ զխորանն վկայութեան. եւ երկիրն նուաճեցաւ ի նոցանէ:

2․ Եւ մնացին որդիքն Իսրայէղի` եւ ոչ ժառանգեցին եւթն ցեղն:

3․ Եւ ասէ ցնոսա Յեսու. մինչչեւ յե՞րբ մեղկիցիք չմտանել ժառանգել զերկիրն զոր Տէր Աստուած հարցն մերոց ետ:

4․ տուք ի ձէնջ երիս արս ի ցեղէ, եւ առաքեցից զնոսա, եւ յարուցեալ անցցեն ընդ երկիր, եւ գրեսցեն զնոսա առաջի իմ` թէ ո՞րպէս պարտ իցէ բաժանել զնոսա: Եւ եկին առ նա:

5․ եւ բաժանեաց նոցա եւթն մասն: Յուդայ կացցէ նոցա սահման ի հարաւոյ. եւ որդիքն Յովսեփայ կացցեն ի սահմանս իւրեանց ի հիւսւսոյ:

6․ եւ դուք բաժանեցէք զերկիրն եւթն բաժին` եւ բերէք առ իս այսր. եւ հանից ձեզ վիճակ աստ առաջի Տեառն Աստուծոյ մերոյ:

7․ Զի ոչ գոյ ի ձեզ բաժին Ղեւեայ որդւոցն. զի քահանայութիւն Տեառն է բաժին նոցա: եւ Գադ, եւ Ռովբեն, եւ կէս ցեղի որդւոցն Մանասէի առին զժառանգութիւն իւրեանց յայնկոյս Յորդանանու յարեւելս` զոր ետ նոցա Մովսէս ծառայ Տեառն:

8․ եւ յարուցեալ արքն գնացին: Եւ պատուիրեաց Յեսու արանցն երթալոց աշխարհադիտել զերկիրն. եւ ասէ. անցէք գնացէք եւ աշխարհադիտեցէք զերկիրն, եւ եկեսջիք առ իս այսր. եւ ես հանից ձեզ վիճակ առաջի Տեառն ի սելով:

9․ Եւ գնացին արքն եւ շրջեցան ընդ երկիրն, եւ աշխարհադիտեցին զերկիրն, եւ տեսին զնա. եւ գրեցին ըստ քաղաքաց իւրոց եւթն բաժին ի մատենի. եւ բերին առ Յեսու ի բանակն ի սելով:

10․ Եւ արկ նոցա Յեսու վիճակ ի սելով առաջի Տեառն, եւ բաժանեաց անդ զերկիրն որդւոցն Իսրայէղի` ըստ բաժանման իւրեանց:

11․ Եւ ել նախ վիճակ ցեղին Բենիամենի ըստ տոհմից իւրեանց. եւ ելին սահմանք վիճակի նոցա ի մէջ Յուդայ` եւ ի մէջ որդւոցն Յովսեփայ:

12․ Եւ եղեն նոցա սահմանք ի հիւսւսոյ Յորդանանու. Եւ ամբարձցին սահմանքն ի հարաւու Երեքովի ընդ հիւսւսի, եւ ամբարձին ի լեառնն ընդ ծովակողմն. եւ եղիցին նորա ելք Մաբդարայինն Բեթաւան.

13․ եւ անցցեն անդի սահմանքն Ղուզայ, ի թիկանց Ղուզայ ի հարաւոյ կողմանէ, այլ է Բեթէլ: եւ իջցեն սահմանքն ցԱստարովթադարայ ի լեռնակողմն, որ է ի հարաւոյ Բեթորովնայ ներքնոյ:

14․ Եւ անցցեն սահմանքն եւ պատեսցին առ եզերբն որ հայի ընդ ծով ի հարաւոյ, ի լեռնէն որ հանդէպ Բեթորովնի է ի հարաւոյ: եւ եղիցին նորա ելք ի Կարիաթբաաղ. այն է Կարիաթարիմ քաղաք որդւոցն Յուդայ. Եւ այն է եզր ընդ ծովակողմն,

15․ եւ եզր ընդ հարաւ յեզերէ Կարիաթբաաղայ. եւ անցցեն սահմանքն ի Գային, եւ ելցեն աղբեր ջրոցն Նափթովայ:

16․ Եւ իջցեն սահմանքն յեզր լերինն` յանդիման հովտաց որդւոյն Ենովմայ, որ է ի Մասնէ Եմակա` Ռափայնոցն ի հիւսւսոյ. եւ իջցեն ի Գայի Ենովմայ ի թիկանց Յեբուսայ ի հարաւոյ. եւ իջցեն յաղբերն Ռովդեդա:

17․ Եւ հատցեն ընդ հիւսւսի, եւ անցցեն յաղբերն ի Բեթսամիս,

18․ եւ պատեսցին առ Գալիլովթաւ. որ է հանդէպ զառիվերին Եդովմինա. եւ իջցեն ի վիմէն Բաան, որդւոյն Հռովբենի, եւ անցցեն ի թիկանց Բեթարաբա հիւսւսոյ. եւ իջցեն յԱրաքա:

19․ եւ իջցեն սահմանքն ի թիկանց Բեթագալա ի հիւսւսոյ. Եւ եղիցին ելք սահմանացն ի Սար ծովուն աղոյ ի հիւսւսոյ, եւ յեզր Յորդանանու ի հարաւոյ:

20․ Այս են սահմանք նոցա ի հարաւոյ, եւ Յորդանան զատուցանէ ի կողմանէ արեւելից: Այս է ժառանգութիւն որդւոցն Բենիամենի. սահմանք նոցա շուրջանակի ըստ տոհմից իւրեանց:

21․ Եւ եղեն քաղաքք ցեղի որդւոցն Բենիամինի ըստ տոհմից իւրեանց: ՅԵրիքով, եւ Բեթագղա, եւ Ամեկկասիս,

22․ եւ Բէթարաբայ, եւ Սեմարիմ, եւ Բեդէլ.

23․ եւ Աւիմ, եւ Սափար, եւ Ափրայ,

24․ եւ Եկարէն, եւ Քափերամմին, եւ Գաբաա:

25․ քաղաքք երկոյտասանք եւ աւանք նոցա:

26․ Գաբաւովն, եւ Ռամա, եւ Բերովթ,

27․ եւ Մասփա, եւ Քեփիրա, եւ Ամովսա,

28․ եւ Ռէկիմ, եւ Յերփայէլ, եւ Թարաղա:

29․ Եւ Սեղաղէփ, եւ Յեբուս` այն է Երուսաղէմ. եւ Գաբաադ. եւ քաղաքն Արեմ. քաղաք երկոտասանք, եւ աւանք նոցա: Այս է ժառանգութիւն որդւոցն Բենիամենի ըստ տոհմից իւրեանց: