1․ Եւ մատեան նահապետք որդւոցն Ղեւեայ առ Եղիազար քահանայ, եւ առ Յեսու Նաւեան, եւ առ նահապետս տոհմից ի ցեղի որդւոցն Իսրայէղի.
2․ եւ խաւսեցան ընդ նոսա յերկրին Քանանացւոց ի սելով` եւ ասեն. Հրաման ետ Տէր ի ձեռն Մովսէսի` տալ մեզ զքաղաքս բնակելոյ, եւ զանդաստանս նոցա անասնոց մերոց:
3․ Եւ ետուն որդիքն Իսրայէղի Ղեւտացւոցն ի ժառանգութիւն նոցա հրամանաւ Տեառն, զքաղաքս զայսոսիկ եւ զանդաստանս նոցա:
4․ Եւ ել վիճակն տոհմին Կաաթու: եւ եղեն որդւոցն Ահարովնի քահանայիցն Ղեւտացւոց, ի ցեղէն Յուդայ եւ ի ցեղէն Շմաւովնի, եւ ի ցեղէն Բենիամենի, վիճակաւ` քաղաքս երեքտասան:
5․ Եւ այլոց որդւոցն Կահաթու մնացելոցն` յազգականութենէ եւ ցեղիցն Եփրեմա, եւ ի ցեղէն Դանայ, եւ ի կիսոյ ցեղէն Մանասէի, վիճակաւ քաղաք տասն:
6․ Եւ որդւոցն Գերսովնի յազգականութենէ ցեղին Իսաքարայ` ի ցեղէն Ասերայ, եւ ի ցեղէն Նեփթաղիմայ, եւ ի կիսոյ ցեղէն Մանասէի ի Բասան, վիճակաւ քաղաքք երեքտասան:
7․ Եւ որդւոցն Մերարեայ ըստ տոհմից իւրեանց, ի ցեղէն Ռովբենի, եւ ի ցեղէն Գադայ, եւ ի ցեղէն Զաբուղովնի, վիճակաւք քաղաքք երկոտասան:
8․ Եւ ետուն որդիքն Իսրայէղի Ղեւտացւոցն զքաղաքսն զայնոսիկ եւ զանդաստանս նոցա զոր աւրինակ պատուիրեաց Տէր Մովսէսի, վիճակաւ:
9․ Եւ ետ ցեղի որդւոցն Յուդայ, եւ ցեղի որդւոցն Շմաւոնի, եւ ցեղի որդւոցն Բենիամենի զքաղաքս զայնոսիկ, եւ կոչեցան յանուն
10․ եւ յազգ որդւոցն Ահարովնի, ի տոհմէն Կահաթու որդւոցն Ղեւեայ, զի նոցա ել վիճակն նախ:
11․ Եւ ետուն նոցա զԿարիաթարբոկ զմայր քաղաքացն Ենակայ, այն է` Քեբրովն ի լերինն Յուդայ, եւ զանդաստանս շուրջ զնովաւ,
12․ եւ զագարակս նորա, եւ զաւանս նորա. ետ Յեսու Քաղեբայ որդւոյն Յեփոնեայ ի կալուած:
13․ Եւ որդւոցն Ահարովնի քահանայից, ետուն քաղաք ապաստան սպանողի, զՔեբրովն, եւ զատուցեալսն ի նա: եւ զՂեբնա, եւ զզատուցեալսն ի նա:
14․ եւ զՅեթեր, եւ զզատուցեալսն ի նա: եւ զԵսթեմովն, եւ զզատուցեալսն ի նա:
15․ եւ զՍողովն, եւ զզատուցեալսն ի նա: եւ զԳաբիր, եւ զզատուցեալսն ի նա:
16․ եւ զԱյին, եւ զատուցեալսն ի նա: եւ զՅետտա, եւ զզատուցեալսն ի նա: եւ զԲեթաամիս, եւ զզատուցեալսն ի նա. քաղաքս ինն, եւ յերկուց ցեղիցն այնոցիկ:
17․ Եւ ի ցեղէն Բենիամենի. զԳաբաւովն, եւ զզատուցեալսն ի նա:
18․ եւ զԳաբեկ, եւ զզատուցեալսն ի նայ, եւ զանաթովթ, եւ զզատուցեալսն ի նա: եւ զԱղմովն, եւ զզատուցեալսն ի նա. քաղաքս չորս:
19․ Ամենայն քաղաք որդւոցն Ահարովնի քահանայից, քաղաքք երեքտասանք, եւ անդաստանք նոցա:
20․ Եւ տոհմից որդւոցն Կաաթու Ղեւտացւոցն` մնացելոցն յորդւոցն Կահաթու: եղեն քաղաք սահմանաց նոցա,
21․ ի ցեղէն Եփրեմայ: Եւ ետուն նոցա քաղաք ապաստանի սպանողի, զՍիւքեմ, եւ զզատուցեալսն ի նա ի լերինն Եփրեմայ. եւ զԳազեր,եւ զզատուցեալսն ի նայ:
22․ Եւ զԿապսեմ, եւ զզատուցեալսն ի նա: եւ զվերին Բոթորովն, եւ զզատուցեալսն ի նա. քաղաքս չորս:
23․ Եւ ի ցեղէն Դանայ. զԵղթեկով, եւ զզատուցեալսն ի նա: եւ զԳեբեթովն, եւ զզատուցեալսն ի նա:
24․ եւ զգեթրեմովն, եւ զզատուցեալսն ի նա. քաղաքս չորս:
25․ Եւ ի կիսոյ ցեղէն Մանասէի. զԹանաք, եւ զզատուցեալսն ի նա. քաղաքս երկուս:
26․ Ընդ ամենայն` քաղաքս տասն, եւ զզատուցեալսն ի նոսա. տոհմից որդւոցն Կահաթու, մնացելոցն:
27․ Եւ որդւոցն Գերսովնա, ազգականացն Ղեւտացւոց, ի կիսոյ ցեղին Մանասէի քաղաքս զատուցեալս սպանողաց. զԳովղան ի Բասանաստանի, եւ զզատուցեալսն ի նա: եւ զԲէեսթարա, եւ զզատուցեալսն ի նա. քաղաքս երկուս:
28․ Եւ ի ցեղէն Իսաքարայ. զԿեսիոն, եւ զզատուցեալսն ի նա: եւ զԴաբրաթ, եւ զզատուցեալսն ի նա:
29․ եւ զԵրիմութ, եւ զզատուցեալսն ի նա: եւ զաղբեւր Նամակաց, եւ զզատուցեալսն ի նա. քաղաքս չորս:
30․ Եւ ի ցեղէն Ասերայ. զՄասաաղ, եւ զզատուցեալսն ի նա: եւ զԱբդովն, եւ զզատուցեալսն ի նա:
31․ եւ զՔեղկաթ, եւ զզատուցեալսն ի նա: եւ զՌովբ, եւ զզատուցեալսն ի նա. քաղաքս չորս:
32․ Եւ ի ցեղէն Նեփթաղիմայ, քաղաքս զատուցեալս սպանողի. զԿադէս ի Գալիլա, եւ զզատուցեալսն ի նա: եւ զԵմաթգովր, եւ զզատուցեալսն ի նա: եւ զՆոյեմոն, եւ զատուցեալսն ի նա. քաղաքս երիս:
33․ Ընդ ամենայն քաղաքք Գերսովնա ըստ տոհմից իւրեանց քաղաքք երեքտասան, եւ զատուցեալք նոցին:
34․ Եւ տոհմի որդւոցն Մերարեայ այլոցն Ղեւտացւոց. Ի ցեղէ որդւոցն Զաբողովնի. զՅեկնաիմ, եւ զանդաստանս նորա. զԿադէս, եւ զանդաստանս նորա. եւ զԿարթա, եւ զանդաստանս նորա:
35․ ԶԴեմա, եւ զանդաստանս նորա: զՆաաղովղ, եւ զանդաստանս նորա. քաղաքս չորս:
36․ Եւ յայնկոյս Յորդանանու ի հանդիպէ անդի Երիքով. Ի ցեղէն Ռովբենի քաղաք ապաստանի սպանողի. զԲոսոր յանապատին Միսորա, եւ զանդաստանս նորա: եւ զՅազեր, եւ զանդաստանս նորա:
37․ զԿեդմովն, եւ զանդաստանս նորա: զՄասփա, եւ զանդաստանս նորա. քաղաքս չորս:
38․ Եւ ի ցեղէն Գադայ` քաղաք ապաստանի սպանողի. զՌամովթ ի Գաղաադ, եւ զանդաստանս նորա: եւ զՄաանամ, եւ զանդաստանս նորա:
39․ եւ զԵսեբովն, եւ զանդաստանս նորա: եւ զԱզեր, եւ զանդաստանս նորա:
40․ ընդ ամենայն քաղաքս չորս: Ամենայն քաղաքք որդւոցն Մերարեայ, ըստ տոհմից իւրեանց մնացելոց ի ցեղէն Ղեւեայ. եւ եղեն սահմանք նոցա քաղաքք երկոտասանք:
41․ Ընդ ամենայն քաղաքք Ղեւտացւոց ի մէջ կալուածոց որդւոցն Իսրայէղի քառասուն եւ ութ քաղաք, եւ անդաստանք նոցա շուրջ զքաղաքաւքն այսոքիւք.
42․ քաղաք եւ քաղաքք եւ անդաստանք շուրջ զքաղաքաւն. նոյնպէս ամենեցունց քաղաքացն այնոցիկ: Եւ վախճանեաց Յեսու բաժանել զերկիրն սահմանովք իւրովք: Եւ ետուն որդիքն Իսրայէղի բաժին Յեսուայ ըստ հրամանի Տեառն` ետուն նմա զքաղաքն զոր խնդրեաց` զԹամնասաքար ի լերինն Եփրեմայ. եւ շինեաց Յեսու զքաղաքն եւ բնակեցաւ ի նմա: Եւ առ Յեսու զսուրն քարեղէնս որովք թլփատեաց զորդիսն Իսրայէղի, զեղեալսն ի ճանապարհի անապատին. քանզի թլփատեցան յանապատի անդ. եւ եդ զնոսա ի Թամնասաքար:
43․ Եւ ետ Տէր Իսրայէղի զամենայն երկիրն զոր երդու տալ հարցն նոցա, եւ ժառանգեցին զնա, եւ բնակիցին ի նմա:
44․ Եւ հանգոյց զնոսա Տէր շուրջանակի` որպէս երդուաւ Տէր հարցն նոցա. եւ ոչ ոք յարեաւ ընդդէմ նոցա ի թշնամեաց իւրեանց. զի զամենայն թշնամիս նոցա մատնեաց Տէր ի ձեռս նոցա.
45․ եւ ոչ սղխալեցաւ բան մի յամենայն բանից բարեաց, զոր խաւսեցաւ Տէր որդւոցն Իսրայէղի. այլ ամենայն ինչ եղեւ:
Հաղորդում կայքում սխալի վերաբերյալ
Տվյալ հատվածում առկա է սխալ: