Գլուխ 3

   
1. Եւ կանխեաց Յեսու ընդ առաւաւտն, եւ չուեցին ի Սատարիմայ եւ եկին մինչչեւ ցՅորդանան, ինքն եւ ամենայն որդիքն Իսրայէղի. եւ բանակեցան անդ յառաջ քան զանցանելն:

2. Եւ եղեւ յետ երից աւուրց, անցին դպիրքն ընդ բանակն,

3. եւ պատուիրեցին ժողովրդեանն եւ ասեն. յորժամ տեսանիցէք զտապանակ ուխտին Տեառն Աստուծոյ ձերոյ, եւ զքահանայս մեր, եւ զՂեւտացիսն որ բարձեալ ունիցին զնա` եւ դուք խաղասջիք ի տեղեաց ձերոց եւ գնասջիք զհետ նոցա:

4. Բայց հեռագոյն լինիցի ընդ ձեզ եւ ընդ նա` որչափ կանկունք երկու հազարաց, զտեղի առնուցուք եւ ոչ մերձանայցէք ի նա. զի գիտիցէք զճանապարհն ընդ որ երթայցէք. զի ոչ էք երթալոց ընդ ճանապարհ երէկին եւ եռանդին:

5. Եւ ասէ Յեսու ցժողովուրդն. սրբեցարուք առ վաղիւ. զի վաղիւ արասցէ Տէր ի ձեզ զսքանչելիս:

6. Եւ խաւսեցաւ Յեսու ընդ ժողովրդեանն` եւ ասէ. առէք զտապանակ ուխտին Տեառն, եւ գնացէք յառաջագոյն առաջի ժողովրդեանն: եւ բարձին քահանայքն զտապանակ ուխտին Տեառն` եւ երթային առաջի ժողովրդեանն:

7. Եւ ասէ Տէր ցՅեսու. յաւուրս յայսմիկ սկիզբն արարից բարձրացուցանել զքեզ առաջի ամենայն որդւոցն Իսրայէղի. զի ծանիցես թէ որպէս էի ընդ Մովսէսի, նոյնպէս եւ եղէց եւ ընդ քեզ:

8. Եւ արդ` պատուիրեա քահանայիցն որ բառնան զտապանակ ուխտին` եւ ասասցես. յորժամ մտանիցէք յեզր ջրոյն Յորդանանու, եւ կացջիք ի ներքս ի Յորդանան:

9. Եւ ասէ Յեսու ցորդիսն Իսրայէղի. մատերուք այսր եւ լուարուք զպատգամս Տեառն Աստուծոյ մերոյ:

10. Եւ ասէ Յեսու. այնու գիտասջիք եթէ Տէր կենդանի է ի ձեզ. եւ սատակելով սատակեսցէ յերեսաց մերոց` զՔանանացին, եւ զՔետատացին, եւ զՓերեզացին, եւ զԽեւացին, եւ զԱմուրհացին, եւ զԳերգեսացին, եւ զՅեբուսացին:

11. Ահաւասիկ տապանակ ուխտի Տեառն ամենայն երկրի անցանէ առաջի ձեր ընդ Յորդանան:

12. Եւ արդ` յառաջ կալարուք ի ձէնջ արս երկուտասան յորդւոցդ Իսրայէղի, այր մի յիւրաքանչիւր ցեղէ.

13. եւ եղիցի յորժամ մխեսցին ոտք քահանայիցն կրելեաց զտապանակ ուխտին Տեառն ամենայն երկրի ի ջուրն Յորդանանու, պակասիցէ ջուրն որ իջանէ ի վերուստ, կայցէ իբրեւ զկարկառակոյտ մի:

14. Եւ եղեւ իբրեւ չուեաց ժողովուրդն ի խորանաց իւրեանց անցանել ընդ Յորդանան. եւ քահանայքն բարձին զտապանակ ուխտին Տեառն առաջի ամենայն ժողովրդեանն:

15. Եւ իբրեւ մտանէին քահանայքն որ կրէին զտապանակ ուխտին ի Յորդանան, եւ ոտք քահանայիցն կրելեաց տապանակին մխեցան յեզր ջրոյն Յորդանանու, եւ Յորդանան լցեալ գայր դարիւ եւ դարիւ իբրեւ յաւուրս հնձոց ցորենւոյ.

16. եւ կաին ջուրքն որ իջանէին ի վերուստ` միաձոյլ, անջրպետեալք, հեռացեալք յոյժ յոյժ. յադամիտէս քաղաքէ` որ է մասն ինչ ի Կարիաթարիմայ. եւ որ իջանէինն` իջին ի ծովն արաբացւոց ի ծովն աղի, մինչչեւ ի սպառ նուազելոյ: եւ ժողովուրդն կայր յանդիման Երեքովի:

17. Եւ կացին քահանայքն որ կրէին զտապանակ ուխտին Տեառն ի վերայ ցամաքի ի մէջ Յորդանանու պատրաստութեամբ: Եւ ամենայն որդիքն Իսրայէղի անցին ընդ ցամաք, մինչչեւ վախճանեաց ամենայն ժողովուրդն անցանել ընդ Յորդանան: