1. Եւ իբրեւ վախճանեաց ամենայն ժողովուրդն անցանել ընդ Յորդանան. Խաւսեցաւ Տէր ընդ Յեսուայ եւ ասէ.
2. առեալ քեզ ի ժողովրդենէդ արս երկոտասան, այր մի իւրաքանչիւր ի ցեղէ,
3. հրաման տուր նոցա եւ ասասցես. առէք դուք այտի ի միջոյ Յորդանանու յոտնատեղեաց քահանայիցն պատրաստականս քարինս երկոտասանս, եւ տարջիք ընդ ձեզ. եւ դիջիք ի մէջ բանակին ձերոյ` ուր բանակիցէք զայս գիշեր:
4. Եւ կոչեաց Յեսու արս երկոտասանս ի փառաւորաց որդւոցն Իսրայէղի` մի յիւրաքանչիւր ցեղէ,
5. եւ ասէ ցնոսա Յեսու: Մատերուք առաջի իմ յանդիման Տեառն ի մէջ Յորդանանու, եւ առեալ բարձցեն անտի իւրաքանչիւր ոք քար մի ի վերայ ուսոց իւրոց ըստ թուոյ ցեղիցն Իսրայէղի.
6. զի լինիցին նոքա ձեզ կալ ի նշանակ հանապազորդ: զի յորժամ հարցանիցէ ցքեզ առ վաղիւ որդին քո եւ ասասցէ. զի՞նչ են քարինքս այս ձեզ,
7. պատմեսցես դու որդւոյն քո եւ ասասցես, թէ` զի պակասեաց գետն Յորդանան յերեսաց տապանակի ուխտին Տեառն ամենայն երկրի` մինչ անցանէր ընդ Յորդանան, նուազեաց ջուրն Յորդանանու: եւ եղիցին քեզ քարինքն այնոքիկ յիշատակ ի մէջ որդւոցն Իսրայէղի, մինչչեւ ցյաւիտեան:
8. Եւ արարին այնպէս որդիքն Իսրայէղի որպէս պատուիրեաց Տէր Յեսուայ. եւ առեալ երկոտասան քար ի միջոյ Յորդանանու` որպէս հրաման ետ Տէր Յեսուայ ի վախճանի անցանելոյ որդւոցն Իսրայէղի: Եւ տարան ընդ իւրեանց ի բանակն եւ եդին զնոսա անդ:
9. Եւ կանկնեաց Յեսու եւ այլ եւս երկոտասան քարինս անդէն ի Յորդանան, ի տեղւոջ ուր կացին ոտք քահանայիցն որ կրէին զտապանակ ուխտին Տեառն. եւ են անդ մինչչեւ ցայսաւր ժամանակի:
10. Եւ կային անդ քահանայքն որ բարձեալ ունէին զտապանակ ուխտին ի մէջ Յորդանանու` մինչչեւ վախճանեաց Յեսու զամենայն զոր պատուիրեաց Տէր Յեսուայ պատմել ժողովրդեանն` ըստ ամենայնի զոր պատուիրեաց Տէր Յեսուայ: եւ փութացաւ ժողովուրդն` եւ անց:
11. Եւ եղեւ իբրեւ վախճանեաց ամենայն ժողովուրդն անցանել, անց եւ տապանակ ուխտին Տեառն, եւ երկոտասան քարինքն առաջի նոցա:
12. Անցին եւ որդիքն Ռովբենի եւ որդիքն Գադայ` եւ կէս ցեղին Մանասէի կազմեալք առաջի որդւոցն Իսրայէղի, որպէս պատուիրեաց նոցա Մովսէս:
13. Չորք բեւրք վառեալք ի կռիւ, անցին առաջի Տեառն ի պատերազմ ընդ Երեքով քաղաքի:
14. Յաւուր յայնմիկ աճեցոյց Տէր զՅեսու առաջի ամենայն ազգացն Իսրայէղի. եւ երկնչէին ի նմանէ որպէս եւ երկնչէին ի Մովսէսէ` որչափ ժամանակս եւ եկաց:
15. Եւ խաւսեցաւ Տէր ընդ Յեսուայ` եւ ասէ.
16. հրաման տուր քահանայիցդ` որ բարձեալ ունին զտապանակ ուխտին վկաութեանն` ելանել ի Յորդանանէ:
17. Եւ հրաման ետ Յեսու քահանայիցն եւ ասէ. ելէք ի Յորդանանէ:
18. Եւ եղեւ իբրեւ ելին քահանայքն որ բարձեալ ունէին զտապանակ ուխտին Տեառն ի միջոյ Յորդանանու, եւ եդին զոտս քահանայքն ի ցամաքի, եւ դիմեաց ջուրն Յորդանանու ի տեղի իւր, եւ գնայր որպէս յերէկն եւ յեռանդն ընդ ամենայն յատակս նորա:
19. Եւ ել ժողովուրդն ի Յորդանանէ ի տասներորդում աւուրն յամսեանն առաջնոյ: եւ բանակեցան որդիքն Իսրայէղի ի Գաղգաղա յարեւելից կողմանէ Երեքովի:
20. եւ զերկոտասան քարինսն զոր առին ի Յորդանանէ, կանկնեաց Յեսու ի Գաղգաղա:
21. Եւ ասէ ցորդիսն Իսրայէղի. յորժամ հարցանիցեն որդիքն ձեր առ վաղիւ եւ ասասցեն, զի՞նչ են քարինքս այսոքիկ.
22. պատմեսջիք որդւոց ձերոց թէ` ցամաք անց Իսրայէլ ընդ Յորդանան,
23. ի ցամաքեցուցանել Տեառն Աստուծոյ մերոյ զջուրն Յորդանանու յերեսաց նոցա մինչչեւ անցին:
24. Որպէս եւ արար Տէր Աստուած մեր ընդ ծովն Կարմիր, զոր ցամաքեցոյց Տէր Աստուած մեր առաջի մեր մինչչեւ անցաք.
25. զի ծանիցեն ամենայն ազգ երկրի` թէ զաւրութիւն Տեառն զաւրաւոր է: եւ զի դուք պաշտիցէք զՏէր Աստուած ձեր զամենայն ժամանակս:
Հաղորդում կայքում սխալի վերաբերյալ
Տվյալ հատվածում առկա է սխալ: