Գլուխ 7

   
1. Եւ յանցեան որդիքն Իսրայէղի յանցանս, եւ գողացան ի նզովից անտի: եւ առ Աքար որդի Քարմեայ` որդւոյ Զարայի` ի ցեղէ Յուդայ` ի նզովից անդի. եւ բարկացաւ սրտմտութեամբ Տէր որդւոցն Իսրայէղի:

2. Եւ առաքեաց Յեսու արս յերէքովէ ի Գայի` որ է յանդիման Բեթէլայ, եւ ասէ ցնոսա. լրտեսեցէք զԳայի: եւ ելին արքն եւ լրտեսեցին զԳայի:

3. Եւ դարձան առ Յեսու եւ ասեն ցնա. մի ելցէ ամենայն ժողովուրդդ, այլ իբրեւ երկու հազարք կամ երեք հազարք արանց ելցեն` եւ պաշարեսցեն զքաղաքսն. մի տանիր անդր զամենայն ժողովուրդդ` զի սակաւք են:

4. Եւ ելին անդր ի ժողովրդենէն իբրեւ երեքհազարք եւ փախեան յերեսաց արանց Գայեայ.

5. եւ կոտորեցին ի նոցանէ արք Գայեայ արս` երեսուն եւ վեց. եւ հալածեցին զնոսա ի դրանէն մինչչեւ խորտակեցին զնոսա. եւ վիրաւորեցին ի զառիվայրին. եւ պակեաւ սիրտ ժողովրդեանն եւ եղեն իբրեւ զջուր:

6. Եւ պատառեաց Յեսու զհանդերձս իւր, եւ անկաւ Յեսու ի վերայ երեսաց իւրոց յերկիր առաջի տապանակին Տեառն մինչչեւ ցերեկոյ, ինքն եւ ծերքն Իսրայէղի. եւ արկին հող զգլխովք իւրեանց:

7. Եւ ասէ Յեսու. աղաչեմ զքեզ Տէր Տէր. ընդէ՞ր բնաւ անցանելով իսկ անցոյց ծառայ քո զժողովուրդս զայս ընդ Յորդանան` մատնել զսա Ամուրհացւոյն` եւ կորուսանել զմեզ: Լաւ էր թէ անդէն զետեղեալ եւ բնակեալ էաք առ եզերբ Յորդանանու:

8. Յիս Տէր. եւ արդ զի՞նչ ասացից` որովհետեւ կորացոյց Իսրայէլ զպարանոց առաջի թշնամեաց իւրոց:

9. եւ լուեալ Քանանացւոցն եւ ամենայն բնակչաց երկրին պատիցեն զմեզ եւ սատակիցեն զմեզ յերկրէ: եւ զի՞նչ արասցեն զանուն քո մեծ:

10. Եւ ասէ Տէր ցՅեսու. յոտն կաց, ընդէր անկեալ կաս ի վերայ երեսաց քոց.

11. մեղաւ ժողովուրդն, եւ անց զուխտիւն իմով զոր ուխտեցի առ նոսա. գողացան եւ առին ի նզովիցն, ստեցին, եւ արկին յամանս իւրեանց:

12. եւ ոչ եւս կարիցեն որդիքն Իսրայէղի կալ առաջի թշնամեաց իւրեանց. այլ դարձուսցեն զպարանոցս առաջի թշնամեաց իւրեանց` զի եղեն ի նզովս. ոչ եւս յաւելից լինել ընդ ձեզ, եթէ ոչ բառնայցէք զնզովսդ զայդ ի միջոյ ձերմէ:

13. Արի սրբեա զժողովուրդն, եւ ասասցես սրբել առ վաղիւ. Այսպէս ասէ Տէր Աստուած Իսրայէղի. նզովք են ի ձեզ Իսրայէլ. ոչ կարացէք կալ առաջի թշնամեաց ձերոց, մինչչեւ բառնայցէք զնզովսն ի ձէնջ:

14. Եւ ժողովեսջիք ամենեքեան ընդ առաւաւտն ըստ ցեղից ձերոց. եւ եղիցի ցեղ` զոր ցուցցէ Տէր, մատուսջիք ըստ տոհմից. տոհմ` զոր յանդիմանեսցէ Տէր, մատուսջիք ըստ տանց. եւ զտունն` զոր յանդիմանեսցէ Տէր, մատուսջիք ըստ արանց:

15. Եւ որ յանդիմանեսցի ի նզովսն, այրեսցի հրով ինքն` եւ ամենայն ինչ որ նորա իցէ. զի անց զուխտիւ Տեառն, եւ արար անաւրէնութիւն ի մէջ Իսրայէղի:

16. Եւ կանխեաց Յեսու ընդ առաւաւտն, եւ մատոյց զժողովուրդն ըստ ցեղից իւրոց, եւ յանդիմանեցաւ ցեղն Յուդայի.

17. եւ մատուցաւ ըստ տոհմիցն Յուդաի, եւ յանդիմանեցաւ տունն Զարայի. եւ մատուցաւ տոհմ Զարայի ըստ արանց, եւ յանդիմանեցաւ Զամբրի.

18. եւ մատուցաւ տունն զարայի ըստ արանց, եւ յանդիմանեցաւ Աքար որդի Քարմեայ, որդւոյ Զամբրեայ, որդւոյ Զարայի, ի ցեղէն Յուդայ:

19. Եւ ասէ Յեսու ցԱքար. որդեակ իմ, տուր փառս այսաւր Տեառն Աստուծոյ Իսրայէղի, եւ տուր խոստովանութիւն, եւ պատմեա ինձ զինչ գործեցեր. եւ մի թագուցաներ:

20. Պատասխանի ետ Աքար եւ ասէ ցՅեսու. արդարեւ ես մեղայ առաջի Տեառն Աստուծոյ Իսրայէղի. զայս ինչ եւ զայս ինչ գործեցի:

21. Տեսի յաւարին ամղան մի նկարէն գեղեցիկ, եւ երկերիւր երկդրամեան արծաթւոյ, եւ լեզու մի ոսկի` որոյ ի յիսուն երկդրամեան էր ձոյլ նորա. եւ ցանկացեալ նոցա առի. Եւ ահաւանիկ թագուցեալ կայ ընդ հողով ի վրանի իմում. եւ արծաթն թագուցեալ կայ ի ներքոյ նոցա:

22. Եւ առաքեաց Յեսու արս հրեշտակս եւ ընթացան ի վրանն ի բանակն. եւ այն թագուցեալ կայր ի վրանի նորա. Եւ արծաթն ի ներքոյ նոցա:

23. հանին զայն ի վրանէ անտի եւ բերին առ Յեսու եւ առ ծերսն Իսրայէղի` եւ եդին զայն առաջի Տեառն:

24. Եւ առ Յեսու Զաքար զորդի Զարայի, եւ էհան զնա ի ձորն Աքովրայ, եւ զուստերս նորա եւ զդստերս նորա, եւ զարջառ նորա, եւ զէշ նորա, եւ զամենայն ոչխարս նորա, եւ զվրան նորա, եւ զամենայն ինչս նորա. եւ ամենայն Իսրայէլ ընդ նմա. եւ ած զնոսա յԵմեկն Աքովրայ:

25. Եւ ասէ Յեսու ցԱքովր ընդէ՞ր սատակեցեր զմեզ. սատակեսցէ զքեզ Տէր ըստ աւուրս ըստ այսմիկ: Եւ քարկոծեցին զնա ամենայն Իսրայէլ քարամբք, եւ այրեցին զնոսա հրով. եւ քարկոծեցին զնոսա քարամբք.

26. եւ կուտեցին ի վերայ նոցա կարկառ մեծ քարանց մինչչեւ ցայսաւր. եւ դադարեաց Տէր ի բարկութենէ սրտմտութեան. վասն այնորիկ անուանեաց զնա Եմեկ Աքովրայ մինչչեւ ցայսաւր: