Գլուխ 9

   
1. Իբրեւ լուան ամենայն թագաւորքն Ամուրհացւոց որ յայնկոյս Յորդանանու` որ լեռնայինք եւ որ դաշտայինք, եւ որ յամենայն ծովեզեր ծովուն մեծի. եւ որ առ Լիբանաներբն, եւ Քետացիք` եւ Քանանացիք` եւ Փերեզացիք` եւ Խեւացիք` եւ Ամուրհացիք, եւ Գերգեսացիք.

2. եկին ի միասին տալ պատերազմ ընդ Յեսու եւ ընդ Իսրայէղի` ամենեքին առ հասարակ:

3. Եւ բնակիչք Գաբաւովնի լուան` ապա զոր ինչ արար Յեսու ընդ Երիքով եւ ընդ Գայի:

4. արարին եւ նոքա խորամանկութեամբ` եկեալք պաշարով եւ պատրաստութեամբ: առին քուրձս հնացեալս ի վերայ ուսոց իւրեանց, եւ տիկս գինոյ հնացեալս եւ պատառատունս եւ կարկատեալս.

5. եւ անկարորդք կաւշկաց նոցա` հողաթափք նոցա հնացեալք եւ կարկատեալք յոտս իւրեանց. եւ հանդերձք նոցա հնացեալք զանձամբք իւրեանց. եւ հաց պաշարի իւրեանց չորացեալ եւ ճըճեկեր.

6. եւ եկին առ Յեսու ի բանակն Իսրայէղի ի Գաղգաղա: Եւ ասեն ցՅեսու եւ ցամենայն Իսրայէլ. Յերկրէ հեռաստանէ եկեալ եմք, եւ արդ` դիք մեզ ուխտ: Եւ ասեն որդիքն Իսրայէղի ցՔոռացին.

7. Տես` գուցէ առ իս բնակեալ իցես. եւ զիա՞րդ դնիցեմ ընդ քեզ ուխտ:

8. Եւ ասեն ցՅեսու. Ծառայք քո եմք: եւ ասէ ցնոսա Յեսու. Ուստի՞ էք դուք, եւ ուստի՞ եկեալ էք:

9. եւ ասեն ցնա. Յերկրէ հեռաստանէ յոյժ եկին ծառայք քո յանուն Տեառն Աստուծոյ քոյ. զի լուաք զանուն նորա, եւ զոր ինչ արար ընդ Եգիպտոս,

10. եւ զոր ինչ արար ընդ երկուս թագաւորս Ամուրհացւոց որ էին յայնկոյս Յորդանանու, ընդ սեհովն թագաւորն եսեբովնի, եւ ընդ Ովգ թագաւոր Բասանու` որ բնակեալ էր յաստարովթ եւ յեթրային:

11. Եւ խաւսեցան ընդ մեզ ծերք մեր, եւ ամենայն բնակիչք երկրին մերոյ եւ ասեն. առէք ձեզ պաշար ճանապարհի` եւ երթայք ընդ առաջ նոցա, եւ ասասջիք նոսա, ծառայք ձեր եմք, եւ արդ դիք ընդ մեզ ուխտ:

12. զի զհացս զայս մեր, ջերմ առաք պաշար ի տանց մերոց յաւուր յորում ելաք առ ձեզ. եւ չորացաւ եւ եղեւ ճըճեկեր:

13. եւ տիկքս զոր լցաք գինով` նորք էին` եւ պատառեցին, եւ ձորձք մեր եւ կաւշիկք մաշեցան, ի բազում երկայն ճանապարհէն:

14. Եւ առին իշխանքն զպաշարս նոցա` եւ զՏէր ոչ հարցին:

15. եւ արար Յեսու ընդ նոսա խաղաղութիւն. Եւ ուխտեաց ընդ նոսա ուխտ ապրեցուցանել զնոսա. երդուան նոցա եւ իշխանք ժողովրդեանն:

16. Եւ եղեւ յետ երից աւուրց զհետ ուխտելոյ ընդ նոսա զուխտն, լուան եթէ մաւտաւորք են, եւ անդէն առ նոսա բնակեն:

17. Չուեցին որդիքն Իսրայէղի` եւ ելին ընդ քաղաքս նոցա յաւուրն երրորդի. եւ քաղաքն նոցա էին Գաբաւովն եւ Կեփիրայ եւ Րութ, եւ քաղաք Յարիմայ:

18. Եւ ոչ մարտեան ընդ նոսա որդիքն Իսրայէղի. քանզի երդուան նոցա ամենայն իշխանք ժողովրդեանն ի Տէր Աստուած Իսրայէղի: եւ տրտնջեցին ամենայն ժողովուրդն զիշխանացն:

19. Եւ ասեն իշխանքն ցամենայն ժողովուրդն. Մեք երդուաք նոցա ի Տէր Աստուած Իսրայէղի, եւ արդ ոչ կարեմք ստել նոցա:

20. արդ` զայս արասցուք նոցա ապրեցուցանել զնոսա, եւ ստասցուք զնոսա. եւ մի եկեսցէ ի վերայ մեր բարկութիւն վասն երդմանն զոր երդուաք նոցա:

21. Եւ ասեն ցնոսա իշխանքն. կեցցեն, եւ լիցին փայտաբերք եւ ջրկիրք ամենայն ժողովրդեանդ: եւ եղեն փայտակոտորք եւ ջրկիրք` որպէս ասացին նոցա իշխանքն:

22. Եւ կոչեաց զնոսա միահամուռ Յեսու, խաւսեցաւ ընդ նոսա եւ ասէ. Ընդէ՞ր խաբեցէք զիս եւ ասացէք` հեռի եմք ի

ձէնջ յոյժ, եւ դուք գաւառականք էք բնակչացս որ ի միջի մերում:

23. եւ արդ` անիծեալ էք. եւ մի պակասեսցի ի ձէնջ ծառայ փայտակոտոր եւ ջրկիր ինձ` եւ Աստուծոյ իմոյ:

24. Պատասխանի ետուն եւ ասեն ցՅեսու. Ազդեցութեամբ ազդ եղեւ մեզ, որ ինչ հրամայեաց Տէր Աստուած քո Մովսէսի ծառայի իւրում, տալ ձեզ զերկիրս զայս, եւ սատակել զմեզ եւ զամենայն բնակիչս սորա յերեսաց ձերոց. եւ երկեաք յոյժ վասն անձանց մերոց յերեսաց ձերոց, եւ արարաք զիրն զայն:

25. եւ արդ, ահաւասիկ եմք ընդ ձեռամբ ձերով. որպէս հաճոյ իցէ ձեզ եւ որպէս կամիցիք առնել` արարէք:

26. Եւ արարին նոցա այնպէս. եւ ապրեցոյց զնոսա Յեսու յաւուր յայնմիկ ի ձեռաց որդւոցն Իսրայէղի, եւ ոչ կոտորեցին զնոսա:

27. Եւ կացոյց զնոսա Յեսու յաւուր յայնմիկ փայտակոտորս եւ ջրկիրս ամենայն ժողովրդեանն` եւ սեղանւոյն Աստուծոյ մինչչեւ ցայսաւր ժամանակի. եւ ի տեղւոջն զոր ընտրեսցէ Տէր: