Գլուխ 19

   
1. Եւ պատմեաց Աքաաբ Յեզաբելայ կնոջ իւրում զամենայն զոր արար Եղիա. եւ ո՞րպէս կոտորեաց զամենայն մարգարէսն սրով:

2. Եւ առաքեաց Յեզաբէլ հրեշտակս առ Եղիա` եւ ասէ. Եթէ դու Եղիա իցես` եւ ես Յեզաբէլ, աւն եւ աւն արասցեն ինձ աստուածքն` եւ աւն եւ աւն յաւելցեն, եթէ ոչ վաղիւ ի սոյն ժամու եդից զանձն քո իբրեւ զանձն միոյ ի նոցանէ:

3. Եւ երկեաւ Եղիա` եւ յարեաւ գնաց առանձինն, եւ եկն ի Բերսաբէէ յերկիրն Յուդայ. եւ եթող անդ զպատանեակն իւր:

4. եւ ինքն գնաց յանապատ աւուր միոյ ճանապարհ, եւ չոգաւ եւ նստաւ ընդ Բեւեկնեաւ. եւ խնդրեաց մահ անձին իւրոյ, եւ ասէ. Շատ է արդ Տէր` առ զոգի իմ յինէն Տէր. զի ոչ եմ ես լաւ քան զհարս իմ:

5. Եւ ի քուն եմուտ եւ ննջեաց ընդ տնկովն, եւ ահա ոմն մերձեցաւ ի նա` եւ ասէ. Արի եւ կեր:

6. եւ հայեցաւ Եղիա, եւ ահա ի սնարից նորա նկանակ հաճարոյ եւ կուժ ջրոյ, եւ յարեաւ եկեր եւ արբ. եւ դարձեալ ննջեաց:

7. Եւ դարձեալ հրեշտակն Տեառն երկրորդ անգամ մերձեցաւ առ նա` եւ ասէ ցնա. Արի կեր, զի բազում է ի քէն եւ անդր ճանապարհդ:

8. եւ յարեաւ` եկեր` եւ արբ, եւ գնաց զաւրութեամբ կերակրոյն այնորիկ զքառասուն տիւ եւ զքառասուն գիշեր, մինչչեւ ցլեառնն Աստուծոյ ի Քորէբ.

9. եւ եմուտ անդ յայրն` եւ դադարեաց: Եւ ահա բան Տեառն եղեւ առ նա` եւ ասէ. Զի՞ ես դու աստ Եղիա:

10. եւ ասէ Եղիա. Նախանձեցայ զնախանձ Տեառն ամենակալի. զի թողին զքեզ որդիքն Իսրայէլի, զսեղանս քո կործանեցին, եւ զմարգարէս քո կոտորեցին սրով. ես միայն մնացեալ եմ, եւ խնդրեն զանձն իմ առնուլ զսա:

11. Եւ ասէ. Ելցես դու վաղիւ` եւ կացցես ի լերին անդ առաջի Տեառն. եւ ահա Տէր անցցէ, եւ հողմ մեծ ուժգին` որ զլերինս քակիցէ եւ զվէմս խորտակիցէ առաջի Տեառն, եւ ոչ ի հողմն Տէր. եւ յետ հողմոյն շարժումն, եւ ոչ ի շարժմանն Տէր:

12. եւ յետ շարժմանն հուր, եւ ոչ ի հուրն Տէր. եւ յետ հրոյն ձայն մեղմոյ աւդոյ, եւ անդ Տէր:

13. Եւ եղեւ իբրեւ լուաւ Եղիա` ծածկեաց զերեսս իւր մաշկեկաւն. եւ ել եւ եկաց ի ներքոյ այրին: եւ ահա բարբառ առ նա եւ ասէ. Զի՞ ես դու աստ Եղիա:

14. Եւ ասէ Եղիա. Նախանձեցայ զնախանձ Տեառն ամենակալի, զի թողին զուխտ քո որդիքն Իսրայէլի, զսեղանս քո քակտեցին, եւ զմարգարէս քո կոտորեցին սրով. ես միայն մնացեալ եմ, եւ խնդրեն զանձն իմ առնուլ զնա:

15. Եւ ասէ ցնա Տէր. Գնա եւ դարձիր զճանապարհ քո, եւ երթիցես զճանապարհ անապատին Դամասկեայ, եւ երթիցես եւ աւծցես զԱզայէլ ի թագաւոր ասորւոց:

16. Եւ զՅէու որդին Ամեսսեայ ի թագաւոր ի վերայ Իսրայէլի. եւ զԵղիսեէ որդի Սափատայ Յաբելմաուլայ` աւծցես ի մարգարէ փոխանակ քո:

17. եւ եղիցի` զապրեալն ի սրոյ Ազայելի` սպանցէ Յէու. եւ զապրեալն ի սրոյ Յէուայ` սպանցէ Եղիսեէ.

18. եւ թողցես դու յԻսրայէլէ եւթն հազար արանց զամենայն որոյ ոչ իցէ կրկնեալ ծունր Բահաղու, եւ զամենայն բերան որոյ ոչ իցէ պագեալ զնա:

19. Եւ գնաց անտի, եւ եգիտ զԵղիսեէ որդի Սափատայ, եւ նա վարէր երկոտասան եզամբք, եւ զոյգք զոյգք եզանց առաջի նորա, եւ ինքն ի վերայ երկոտասանիցն. եւ եհաս Եղիա առ նա, եւ ընկէց զմաշկեակն իւր ի վերայ նորա:

20. եւ եթող Եղիսեէ զեզինսն, եւ ընթացաւ զհետ Եղիայի, եւ ասէ. Համբուրեցից զհայր իմ եւ զմայր իմ, եւ եկից զկնի քո: եւ ասէ ցնա. Երթ` դարձիր անդրէն. զի՞նչ առնելոց էր` արարի քեզ:

21. Եւ դարձաւ ի նմանէ. եւ առ զզոյգս զոյգս եզանցն, եւ եզեն. եւ գործեաւք եզանցն հասոյց զնոսա, եւ ետ ժողովրդեանն եւ կերան, եւ յարեաւ գնաց զհետ Եղիայի, եւ պաշտէր զնա: