1. Յայնժամ եկեղեցացոյց արքայ Սողոմոն զամենայն ծերս Իսրայէլի, հանդերձ ամենայն գլխաւք գաւազանացն համբարձելոց հարց որդւոց Իսրայէլի առ արքայ Սողոմոն ի Սիոն. հանել զտապանակ ուխտին Տեառն ի քաղաքէ Դաւթի` այս է Սիոն:
2. եւ եկեղեցացան առ արքայ Սողոմոն ամենայն այր Իսրայէլի, յամսեանն Անթանի` ամի տաւնին, այն է ամիսն եւթներորդ:
3. Եւ ելին ամենայն ծերք Իսրայէլի, եւ բարձին քահանայքն զտապանակն.
4. եւ հանին զտապանակն Տեառն, եւ զխորանն վկայութեան, եւ զամենայն սպասն սրբութեան որ ի խորանին վկայութեան ¡: եւ հանին զայն քահանայքն եւ ղեւտացիք:
5. Եւ արքայ Սողոմոն եւ ամենայն ժողովուրդն Իսրայէլի գումարեալք առ նա, հանդերձ նովաւ առաջի տապանակին. զենուին արջառս եւ ոչխարս անհամարս եւ անթիւս ի բազմութենէ:
6. Եւ տարան ի ներքս քահանայքն զտապանակ ուխտին Տեառն ի տեղի իւր, ի Դաբիր տանն սրբութեան սրբութեանցն` ընդ թեւովք քրոբէիցն:
7. զի քրոբէքն թռուցեալ թեւովք ի վերայ տեղւոյ տապանակին, եւ ծածկեցին քրոբէքն զտապանակն, եւ զսրբութիւնս նորա ի վերուստ:
8. Եւ կային ի վերայ սրբեցելոցն, եւ հայէին գլուխք սրբեցելոցն ի սրբութեանց անտի հանդէպ դաբիրայն, եւ արտաքս ոչ երեւէին. եւ եղեն անդ մինչչեւ ցայսաւր:
9. Եւ ոչ ինչ գոյր ի տապանակին, բայց երկու տախտակքն քարեղէնք, տախտակք ուխտի, զորս եդ անդ Մովսէս ի Քորէբ. զորս ուխտեաց Տէր ընդ որդիսն Իսրայէլի յելանել նոցա յերկրէն Եգիպտացւոց:
10. Եւ եղեւ իբրեւ ելին քահանայքն ի սրբութենէն, եւ ամպն ելից զտունն Տեառն.
11. եւ ոչ կարէր քահանայն կալ ի սպասու յերեսաց ամպոյն. զի փառք Տեառն լցին զտունն:
12. Յայնժամ ասէ Սողոմոն. Տէր ասաց հովանի լինել միգով:
13. շինելով շինեցի քեզ տուն բնակութեան. հաստատութիւն աթոռոյ քում յաւիտեան:
14. Եւ դարձոյց արքայ զերեսս իւր, եւ աւրհնեաց զամենայն Իսրայէլ: եւ ամենայն եկեղեցին Իսրայէլի կայր:
15. Եւ ասէ. Աւրհնեալ տէր Աստուած Իսրայէլի այսաւր. որ խաւսեցաւ բերանով իւրով վասն Դաւթի հաւր իմոյ. եւ ձեռաւք իւրովք ելից` եւ ասէ:
16. Յաւրէ յորմէ հանի զժողովուրդ իմ զԻսրայէլ յԵգիպտոսէ, ոչ ընտրեցի ի քաղաքի միում ուրեք ի գաւազանաց Իսրայէլի շինել տուն` զի լինիցի անուան իմոյ. եւ ընտրեցի զԴաւիթ լինել ի վերայ ժողովրդեան իմոյ Իսրայէլի:
17. Եւ եղեւ ի սրտի Դաւթի հաւր իմոյ շինել տուն անուան տեառն Աստուծոյ Իսրայէլի:
18. եւ ասէ Տէր ցԴաւիթ հայր իմ. փոխանակ զի եկն ի սիրտ քո շինել տուն անուան իմոյ` բարւոք արարեր, զի եղեւ ի սրտի քում.
19. բայց դու ոչ շինեսցես զտունն, այլ որդի քո որ ելանէ յերանաց քոց` նա շինեսցէ տուն անուան իմոյ:
20. Եւ կանգնեաց Տէր զբան իւր զոր խաւսեցաւ: եւ կացի ես փոխանակ Դաւթի հաւր իմոյ, եւ նստայ յաթոռն Իսրայէլի որպէս եւ խաւսեցաւ Տէր. եւ շինեցի տուն անուան տեառն Աստուծոյ Իսրայէլի.
21. եւ եդի անդ տեղի տապանակին, որ է ուխտն Տեառն զոր ուխտեաց Տէր ընդ հարսն մեր, ի հանել նորա զնոսա յերկրէն եգիպտացւոց:
22. Եւ յարեաւ Սողոմոն յերեսաց սեղանոյն Տեառն` առաջի ամենայն եկեղեցւոյն Իսրայէլի, եւ տարածեաց զձեռս իւր յերկինս,
23. եւ ասէ. Տէր Աստուած Իսրայէլի. չիք իբրեւ զքեզ Աստուած յերկինս ի վեր եւ յերկիր ի խոնարհ` որ պահեցեր զուխտ եւ զողորմութիւն ծառայի քում գնացելոյ առաջի քոյ ամենայն սրտիւ իւրով.
24. պահել ծառայի քում Դաւթի հաւր իմոյ, զոր խոստացար նմա, եւ խաւսեցար բերանով քով, եւ ձեռաւք քովք կատարեցեր որպէս եւ յաւուր յայսմիկ:
25. Եւ արդ տէր` Աստուած Իսրայէլի, պահեա ծառայի քում Դաւթի հաւր իմոյ, զոր խաւսեցար նմա եւ ասացեր. Ոչ բարձցի քո այր յերեսաց իմոց որ նստիցի յաթոռ Իսրայէլի, միայն թէ զգուշասցին որդիք քո ճանապարհաց իւրեանց գնալ առաջի իմ, որպէս եւ գնացեր դու առաջի իմ:
26. Եւ արդ տէր` Աստուած Իսրայէլի, հաւատարիմ լիցի բանն քո զոր խաւսեցար ծառայի քում Դաւթի հաւր իմոյ,
27. թէ բնակիցէ՞ Աստուած ընդ մարդկան որ ի վերայ երկրի: եթէ երկինք` եւ երկնից երկինք չեն քեզ բաւական, արդ` զիա՞րդ տունս զոր շինեցի:
28. Եւ արդ` հայեաց յաղաւթս ծառայի քում, եւ ի խնդրուածս իմ, տէր Աստուած Իսրայէլի, լսել պաղատանաց աղաւթից ծառայի քոյ որ կայ առաջի քո առ քեզ.
29. լինել բաց աչաց քոց զցայգ եւ զցերեկ, ի տեղւոջս զորմէ ասացեր թէ եղիցի անուն իմ անդ, ի լսել աղաւթից զոր աղաչիցէ ծառայ քոյ ի տեղւոջս յայսմիկ ¡ ի տուէ եւ ի գիշերի, եւ լուիցես ձայնի ծառայի քոյ, եւ ժողովրդեան քո Իսրայէլի, զոր կայցեն յաղաւթս ի տեղւոջս յայսմիկ:
30. եւ դու լուիցես ի տեղւոջ բնակութեան քոյ յերկինս, եւ արասցես եւ քաւեսցես,
31. զոր ինչ ոք մեղիցէ ընկերի իւրում: Եւ եթէ առցէ ի վերայ նորա անէծս անիծանել զնա, եւ խոստովան լիցի առաջի սեղանոյ քոյ ի տանս յայսմիկ,
32. եւ դու լուիցես յերկնից, եւ արասցես եւ դատեսցիս զժողովուրդ քո զԻսրայէլ: Յանաւրինել անաւրինին, տալ ըստ ճանապարհաց նորա ի գլուխ նորա: եւ արդարացուցանել զարդարն. տալ նմա ըստ արդարութեան նորա:
33. Եւ ի պարտել ժողովրդեան քո Իսրայէլի առաջի թշնամեաց, յորժամ մեղանչիցեն քեզ եւ դառնայցեն առ քեզ` եւ խոստովան լիցին անուան քում. եւ յաղաւթս կայցեն, եւ աղաչիցեն առ քեզ ի տանս յայսմիկ.
34. եւ դու լուիցես յերկնից, եւ քաւեսցես զմեղս ժողովրդեան քոյ Իսրայէլի: եւ դարձուսցես զնոսա յերկիրս զոր ետուր հարց նոցա:
35. Եւ յարգելուլ երկնից` եւ ի չլինել անձրեւի, զի մեղուցեալ իցեն քեզ. եւ յաղաւթս կացցեն ի տեղւոջս յայսմիկ, եւ խոստովան լինիցին անուանքում, եւ ի մեղաց իւրեանց դառնայցեն, յորժամ նկուն առնիցես զնոսա.
36. լուիցես յերկնից, եւ քաւեսցես զմեղս ծառայից քոց եւ ժողովրդեան քոյ Իսրայէլի. զի ցուցցես նոցա ճանապարհ բարի գնալ ի նա. եւ տացես անձրեւ յերկիր քո զոր ետուր ժողովրդեան քում ի ժառանգութիւն:
37. Եւ սով` եթէ լինիցի յերկրի, կամ թէ մահ լինիցի, կամ թէ հրայրեացք, կամ դալուկն, կամ ջորեակ, կամ ժանգ եթէ լինիցի. եւ նեղիցէ զնա թշնամի իւր ի միում քաղաքացն իւրոց. ամենայն պատահար եւ ամենայն ցաւ:
38. Ամենայն աղաւթք` եւ ամենայն խնդրուածք որ լինիցին ամենայն մարդոյ, ամենայն ժողովրդեան քոյ Իսրայէլի, որպէս զիարդ գիտիցեն իւրաքանչիւր զախտս սրտի իւրոյ, եւ տարածեսցէ զձեռս իւր ի տանս յայսմիկ.
39. եւ դու` լուիցես յերկնից ի պատրաստ բնակութենէ քումմէ, եւ քաւեսցես եւ արասցես. եւ տացես առն ըստ ամենայն ճանապարհաց իւրոց, որպէս եւ գիտիցես զսիրտ նորա. զի դու միայն գիտես զսիրտ ամենայն որդւոց մարդկան.
40. զի երկիցեն ի քէն զամենայն աւուրս իւրեանց` որչափ եւ կեցցեն ի վերայ երեսաց երկրի, զոր ետուր հարց մերոց:
41. Եւ աւտարոտին որ ոչ իցէ ի ժողովրդենէ քումմէ Իսրայէլի, եւ նա եկեալ իցէ յերկրէ հեռաստանէ.
42. ուր եւ լսիցէ զանուանէ քումմէ մեծէ, եւ զձեռանէ քումմէ հզաւրէ, եւ զբազկէ քումմէ ձգելոյ. եւ եկեսցէ եւ յաղաւթս կացցէ ի տեղւոջս յայսմիկ.
43. եւ դու լուիցես յերկնից ի պատրաստ բնակութենէ քումմէ, եւ արասցես ըստ ամենայնի զոր եւ կարդասցէ առ քեզ աւտարոտին: զի ծանիցեն ամենայն ազգք երկրի զանուն քո, եւ երկիցեն ի քէն որպէս եւ ժողովուրդ քո Իսրայէլ. եւ ծանիցեն զի անուն քո կոչեցեալ է ի վերայ տանս զոր շինեցի:
44. Եւ եթէ ելանիցէ ժողովուրդ քո ի պատերազմ ընդ թշնամիս իւր` ի ճանապարհի յորմէ դարձուսցես զնոսա. եւ կացցեն յաղաւթս յանուն Տեառն ի ճանապարհի քաղաքիս զոր ընտրեցեր, եւ ի տանս զոր շինեցի անուան քում.
45. եւ դու լուիցես յերկնից աղաւթից նոցա եւ խնդրուածոց նոցա, եւ արասցես նոցա իրաւունս.
46. քանզի մեղանչեցին քեզ. զի չիք մարդ որ ոչ մեղանչէ: Եւ եթէ ածցես ի վերայ նոցա, եւ մատնեսցես զնոսա առաջի թշնամեաց. եւ գերեսցեն զնոսա գերիչք իւրեանց յերկիր թշնամւոյ` ի հեռաւոր կամ ի մաւտաւոր.
47. եւ դարձուսցեն զսիրտս իւրեանց յերկիրն յոր գերեցան. եւ դառնայցեն եւ աղաչեսցեն զքեզ յերկրին գերութեան իւրեանց. եւ ասիցեն` մեղաք անաւրինեցաք անիրաւեցաք.
48. եւ դարձցին առ քեզ յամենայն սրտէ իւրեանց, եւ յամենայն անձնէ իւրեանց` յերկրին թշնամեաց իւրեանց յոր փոխեցեր զնոսա. եւ յաղաւթս կացցեն առ քեզ վասն ճանապարհի երկրին իւրեանց զոր ետուր հարցն նոցա, եւ քաղաքիս զոր ընտրեցեր, եւ տանս զոր շինեցի անուան քում:
49. եւ լուիցես յերկնից ի պատրաստ բնակութենէ քումմէ աղաւթից նոցա եւ խնդրուածոց նոցա, եւ արասցես նոցա իրաւունս:
50. եւ քաւեսցես զանիրաւութիւնս նոցա զոր մեղան քեզ. եւ ըստ ամենայն արհամարհանաց նոցա զոր արհամարհեցին զքեզ. եւ տացես զնոսա ի գթութիւն առաջի գերչաց իւրեանց, եւ գթասցիս ի նոսա.
51. զի ժողովուրդ քո եւ ժառանգութիւն քո են` զորս հաներ յերկրէն եգիպտացւոց ի միջոյ երկաթոյն հալոցաց:
52. Եւ եղիցին աչք քո եւ ականջք քո բաց ի խնդրուածս ծառայի քոյ. եւ ի խնդրուածս ժողովրդեան քո Իսրայէլի` լսել նոցա յամենայնի որովք եւ կարդայցեն առ քեզ:
53. զի դու զատուցեր զնոսա քեզ ի ժառանգութիւն յամենայն ժողովրդոց երկրի. որպէս խաւսեցար ի ձեռն Մովսիսի ծառայի քոյ ի հանել զհարսն մեր յԵգիպտոսէ Տէր Տէր: Յայնժամ խաւսեցաւ Սողոմոն վասն տանն իբրեւ կատարեաց շինել զնա. Զարեգակն ծանեաւ յերկինս. Տէր ասաց բնակել ի միգի: Շինեա զտուն իմ տուն վայելուչ բնակել ի նմա նորոգութեամբ: ոչ աւանիկ գրեալ է այս ի գիրս երգոց:
54. Եւ եղեւ իբրեւ կատարեաց Սողոմոն կալ յաղաւթս առ Տէր, զամենայն աղաւթս զայս եւ զխնդրուածս. յարեաւ յերեսաց սեղանոյն Տեառն ուր կայր ի գուճս ի վերայ ծնգաց իւրոց, եւ ձեռք իւր ընդ երկինս տարածեալ:
55. եւ եկաց եւ աւրհնեաց զամենայն եկեղեցին Իսրայէլի մեծաձայն, եւ ասէ:
56. Աւրհնեալ է Տէր այսաւր, որ ետ հանգիստ ժողովրդեան իւրում Իսրայէլի ըստ ամենայնի զոր խաւսեցաւ` ոչ վրիպեաց բան մի յամենայն բանից նորա բարեաց որովք խաւսեցաւ ի ձեռն Մովսիսի ծառայի իւրոյ:
57. եւ եղիցի տէր Աստուած մեր ընդ մեզ` որպէս էր ընդ հարսն մեր, եւ մի թողցէ զմեզ:
58. այլ դարձուսցէ զմեզ առ ի չխոտորելոյ սրտից մերոց ի նմանէ. գնալ յամենայն ճանապարհս նորա, եւ պահել զամենայն պատուիրանս նորա, եւ զհրամանս նորա, եւ զիրաւունս նորա զորս պատուիրեաց հարցն մերոց:
59. Եղիցին բանքս իմ այսոքիկ որովք պաղատեցայ առաջի տեառն Աստուծոյ մերոյ` մերձենալ առ տէր Աստուած մեր ի տուէ եւ ի գիշերի, առնել իրաւունս ծառայի քում, եւ իրաւունս ժողովրդեան քում Իսրայէլի, զբան աւրըստաւրէ.
60. զի ծանիցեն ամենայն ժողովուրդք երկրի, զի Տէր` նա է Աստուած, եւ չիք այլ ոք:
61. Եւ եղիցին սիրտք մեր կատարեալք առ տէր Աստուած մեր անարատութեամբ գնալ ըստ հրամանաց նորա, եւ պահել զպատուիրանս նորա որպէս եւ յաւուր յայսմիկ:
62. Եւ արքայ եւ ամենայն որդիքն Իսրայէլի ընդ նմա` զոհեցին զոհս առաջի Տեառն:
63. եւ զոհեաց արքայ Սողոմոն զոհս խաղաղականաց զորս զոհեաց Տեառն յարջառոց քսան եւ երկուս հազարս, եւ յոչխարաց հարիւր եւ քսան հազար: Եւ արար նաւակատիս տանն Տեառն արքայ` եւ ամենայն որդիքն Իսրայէլի:
64. Յաւուր յայնմիկ սրբեաց արքայ զմիջոց սրահին որ հանդէպ տանն Տեառն. զի անդ արար զողջակէզսն եւ զպատարագսն, եւ զզոհսն, եւ զճարպսն խաղաղականաց. զի սեղանն պղնձի որ առաջի Տեառն կայր` փոքր էր, եւ ոչ կարէր ընդունել զողջակէզսն եւ զպատարագսն, եւ զզոհս խաղաղականաց:
65. Եւ արար Սողոմոն յաւուր յայնմիկ տաւն, եւ ամենայն Իսրայէլ ընդ նմա եկեղեցի մեծ, ի մտիցն Եմաթայ մինչչեւ ցգետն եգիպտացւոց` առաջի տեառն Աստուծոյ մերոյ, ի տանն զոր շինեաց` ուտելով եւ ըմպելով եւ ուրախ լինելով առաջի տեառն Աստուծոյ մերոյ զեւթն աւր եւ զեւթն աւր, աւուրս չորեքտասան:
66. Եւ յաւուրն ութերորդի արձակեաց զժողովուրդն. եւ աւրհնեցին զարքայ եւ գնացին իւրաքանչիւր ի բնակութիւնս իւրեանց, խնդութեամբ եւ սրտիւ զուարթութեամբ` ի վերայ ամենայն բարեացն զոր արար տէր Աստուած ծառայի իւրում Դաւթի` եւ Իսրայէլի ժողովրդեան իւրում:
Հաղորդում կայքում սխալի վերաբերյալ
Տվյալ հատվածում առկա է սխալ: