1․ Եւ յորժամ եղեւ եւ կատարեցաւ այս ամենայն: Թագաւորեաց Արտաշէս արքայ ի վերայ պարսից. Առ որ երթեալ Եզրի, որդւոյ Ազարիայ, որդւոյ Եզերիայ, որ ի Քեղկեայ, որ ի Սաղեմայ,
2․ որ ի Յադուկայ, որ ի յԱքիտովբայ, որ ի յԱմարէթայ, որ ի յԱղեկայ, որ ի Մարերովթայ, որ ի Զարեայ, որ ի Սեուիայ, որ ի Բովկեայ, որ ի յԱբասեայ, որ ի Փենեեսէ, որ յԵղիազարայ, որ յԱհարոնէ առաջին քահանայէ:
3․ Այս Եզր որ ել ի Բաբելոնէ. որ է գրիչ յաջողակ աւրինացն Մովսիսի տուելոց յԱստուծոյ Իսրայէլի:
4․ Եւ ետ նմա թագաւորն մեծ փառս. եւ գտեալ շնորհս առաջի նորա փառաւորեաց զնա մեծաւ պատուով:
5․ Եւ ելին ընդ նմա յորդւոցն Իսրայէլի, եւ ի քահանայիցն, եւ ի ղեւտացւոց, եւ իպաշտաւնէիցն փսալտաց, եւ ի դռնապանաց, եւ ի ծառայից քահանայիցն յԵրուսաղէմ:
6․ Յամի եւթներորդի թագաւորութեանն Արտաշեսի արքայի, յամսեանն հինգերորդի, որ էր ամ եւթներորդ թագաւորին. ելեալ ի Բաբելոնէ յամսամտին առաջնոյ ամսեանն, եւ յամսամտի հինգերորդ ամսեանն
7․ եմուտ յԵրուսաղէմ. որպէս եւ յաջողեաց նմա Տէր զճանապարհն:
8․ Քանզի լցեալ էր Եզր ամենայն իմաստութեամբ, եւ ոչ ինչ պակաս էր ի նմանէ յամենայն ի պատուիրանացն Տեառն. եւ ըստ աւրինացն Տեառն ուսուցանէր Իսրայէլի զամենայն դատաստանս եւ զիրաւունս:
9․ Եհաս գիր հրամանի Արտաշիսի թագաւորի առ Եզր քահանայ եւ պատմիչ աւրինացն Տեառն. եւ էր գրեալ զայս աւրինակ:
10․ Թագաւոր Արտաշէս` Եզրի քահանայի` եւ պատմչի աւրինացն Տեառն ողջոյն:
11․ Ամենայն մարդասէր կամաւք կշռելով իմ. հրամայեցի ամենայն ազգաց Հրէաստանի, որ կամիցին ելանել յԵրուսաղէմ. եւ քահանայապետիցն եւ ղեւտացւոց, համարձակութիւն լիցի ընդ քեզ երթալ յԵրուսաղէմ:
12․ եւ որպէս փափաքեն ցանկութեամբ հասանել ի Հրէաստան` եւ յԵրուսաղէմ. հրամայեցաք ես` եւ եւթն խորհրդակիցք իմ.
13․ զի երթեալ` ըստ աւրինացն կատարեսցեն զամենայն,
14․ եւ մատուսցեն զպատարագս տեառն Աստուծոյ Իսրայէլի. որպէս ուխտեցաք ես եւ սիրելիք իմ յԵրուսաղէմ. եւ զամենայն ոսկի եւ արծաթ` որչափ եւ գտցի յերկրիս բաբելացւոց, տեառն Աստուծոյ մատուսցեն պատարագս յԵրուսաղէմ:
15․ Եւ առեալ նպաստաւորութիւն յերկրէս բաբելացւոց քահանայից տեառն Աստուծոյ տարցին յԵրուսաղէմ, ոսկի եւ արծաթ, եւ զուարակս, խոյս եւ գառինս, եւ զայլ ամենայն զոհս նուիրացն
16․ մատուսցեն ի սեղան տեառն Աստուծոյ յԵրուսաղէմ:
17․ Եւ զամենայն ինչ` որպէս եւ կամիցիս հանդերձ եղբարբքդ քովք` արասցես, վասն ոսկւոյ եւ արծաթոյ հարկացն ըստ կամաց` տեառն Աստուծոյ քոյ կատարեսջիր:
18․ եւ զքահանայական զկահ, եւ զսպասն Տեառն տարեալ յԵրուսաղէմ
19․ արասջիր ըստ պիտոյից տաճարին տեառն Աստուծոյ. եւ եդեալ զամենայն առաջի տեառն Աստուծոյ քոյ յԵրուսաղէմ.
20․ եւ զայլ եւս աւելորդս եւ մնացուածս որ ինչ եւ իցեն ի պէտս տաճարին, դիցեն զայն ի տունս գանձից թագաւորաց:
21․ Եւ ես Արտաշէս թագաւոր հրամայեցի գանձաւորաց որ են յԱսորեստանի, եւ ի կողմանս քանանացւոց, որչափ եւ կամեսցի առնուլ Եզր քահանայ եւ պատմիչ աւրինաց տեառն Աստուծոյ բարձրելոյ, անխափան տաջիք նմա արծաթ` տաղանտս հարիւր. ըստ նմին աւրինակի
22․ եւ ցորեան քոռս հարիւր, եւ գինի եւ ձէթ` նոյնչափ.
23․ եւ զամենայն ըստ աւրինացն առեալ կատարեսցեն տեառն Աստուծոյ բարձրելոյ. զի մի լիցի ցասումն յԱստուծոյ ի վերայ թագաւորութեան իմոյ` եւ որդւոյ իմոյ:
24․ Եւ հրամայեալ վասն ձեր քահանայիցդ եւ ղեւտացւոց, եւ սաղմոսասաց պաշտաւնէիցդ, եւ դռնապանաց, եւ ծառայից քահանայից, եւ սպասաւորաց տան Տեառն.
25․ մի զհարկս ինչ` եւ մի զայլ ինչ` ոք ամենեւին իշխեսցէ ի դոցանէ պահանջել:
26․ Եւ դու` Եզր, ըստ իմաստութեան քում որ տուեալ է քեզ յԱստուծոյ, կացո վերակացուս եւ դատաւորս, որք դատեսցին զկողմանս ասորւոց եւ փիւնիկեցւոց. ամենեքեան որոց ուսեալ իցէ զաւրէնս տեառն Աստուծոյ քո:
27․ եւ որ ոչն գիտիցեն` ուսուսջիր. եւ ամենեքեան որ անցանիցեն զաւրինաւքն տեառն Աստուծոյ քո, եւ զաւրինաւք մեր թագաւորաց. տուեալ քեզ իշխանութիւն պատուհասել եւ խոշտանգել. եւ եթէ մահապարտ իցեն` սպանանել, կամ թէ պատուհասի արժանի` պատուհասել` եւ տուգանս պահանջել:
28․ Եւ ասէ Եզր գրիչ աւրինացն տեառն. Աւրհնեալ է տէր Աստուած հարցն մերոց, որ ետ զայս ամենայն ի սիրտս թագաւորի փառաւորել զտաճարն Տեառն որ յԵրուսաղէմ:
29․ եւ զիս մեծապէս պատուեաց առաջի թագաւորին, եւ առաջի ամենայն խորհրդականաց նորա, եւ սիրելեաց` եւ ամենայն մեծամեծաց նորա.
30․ եւ եղէ ես զուարճացեալ յոյժ աւգնութեամբք տեառն Աստուծոյ իմոյ: Եւ ժողովեաց զամենայն արս Իսրայէլի որք ելեալ էին ընդ նմա յԵրուսաղէմ:
31․ Եւ այս են իշխանք ըստ նահապետութեան հարցն իւրեանց. եւ ըստ բաժնից ցեղիցն իւրեանց որք ելին ընդ Եզրի ի Բաբելոնէ, ի թագաւորութեանն Արտաշիսի արքայի:
32․ Յորդւոցն Փենեէսի` Գերսոն. յորդւոցն ի Թամարայ` Գամայէլ. յորդւոցն Դաւթայ` Փարէս:
33․ յորդւոցն Փորոսեայ` Զաքարիաս, եւ որք ընդ նմա էին գերեալ արք հարիւր յիսուն:
34․ Յորդւոցն Փաաթ` Մովաբ, Եղիա, Ովնիաս, Զարեա, եւ ընդ նմա արք երկերիւր:
35․ Յորդւոցն Զաթսեսայ` Յեզոնիաս, Յեթեղեայ, եւ ընդ նմա արք երեք հարիւր:
36․ Յորդւոցն Ադինոբայ` Յովնաթանու, եւ ընդ նմա արք երեք հարիւր յիսուն. Յորդւոցն Եղամեսեայ` Գոդողիա, եւ ընդ նմա արք եւթանասուն:
37․ յորդւոցն Սափատիայ` Զաքարիաս Միքայելեանց, եւ ընդ նմա արք եւթանասուն:
38․ Յորդւոցն Յովաբայ` Աբադիսեր Եզելեանց, եւ ընդ նմա արք երկերիւր եւ երկոտասան:
39․ յորդւոցն Բանեայ` Ասաղիմովթ Յովսափեանց, եւ ընդ նմա արք հարիւր վաթսուն:
40․ Յորդւոցն Բէերայ` Զաքարիայ Բերեայ, եւ ընդ նմա արք քսան եւ ութ:
41․ յորդւոցն Աստաթայ` Յովհանէս Կատանայ, եւ ընդ նմա արք հարիւր տասն:
42․ Յորդւոցն Ադոնիկամայ` Էսփատայ: եւ այս անուանք նոցա. Եղիփաղատ. Գեւուէլ, Սամեաս, եւ ընդ նոսա արք եւթանասուն: յորդւոցն Բանեայ Ութիաստաւկ Ուրեանց, եւ ընդ նմա արք եւթանասուն:
43․ Եւ ժողովեալ զնոսա յեզր գետոյն, որ անուանի Թերա` եւ արարեալ աւթեւանս անդ աւուրս երիս. եւ արարեալ համար ամենեցուն.
44․ յորդւոցն քահանայից, եւ յորդւոցն ղեւտացւոց` ոչ ոք գտաւ առ նոսա:
45․ Եւ առաքեցի առ Եղիազար. եւ եկին առ իս Սամեաս, եւ Որիբոն, եւ Նաթան, Եննատան, Զաքարիա, եւ Մոսողաբոն: այս իշխանքն եւ վարդապետք աւրինացն:
46․ Եւ ասացի ցնոսա երթալ առ Ղոդէոն իշխան գանձաւորացն.
47․ եւ պատուիրեցի նոցա ասել ցՂոդէոն, եւ ցեղբարս նորա, եւ որ միանգամ են ի տեղւոջ գանձաւորացն, առաքել առ մեզ ի քահանայիցն տանն Տեառն:
48․ Եւ ածին առ մեզ արք որ էին զաւրաւորք ըստ բանի Տեառն. եւ գիտունք յաւրէնս Տեառն: որդւոցն Մոողեայ, որ ի Ղեւեայն, եւ յԻսրաէլէ, ասերեւան, եւ զորդիս նորա եւ զեղբարս ութեւտասն:
49․ եւ Ասեբիան, եւ Անունոն, եւ Ոսետան եղբայր: յորդւոցն Քանունեայ` եւ որդիք նորա արք քսան:
50․ եւ ի ծառայից քահանայիցն զորս ետ Դաւիթ իշխան ի գործ սպասաւորութեան ղեւտացւոց, որոց գրեցան անուանք նշանաւորացն քսան:
51․ Եւ քարոզեցաք անդ պահս, եւ մատուցաք աղաւթս առաջի տեառն Աստուծոյ մերոյ, խնդրել դիւրութիւն եւ յաջողութիւն մեզ եւ որդւոց մերոց. եւ ամենայն ինչ որ ընդ մեզ էր.
52․ վասն զի ծանրութիւն համարեցաք խնդրել ի թագաւորէն հետեւակս եւ հեծեալս յուղարկաւորս ընդ մեզ վասն զգուշութեան այնոցիկ որք ընդդիմանային մեզ.
53․ քանզի ասացաք ցթագաւորն այսպէս. թէ Զաւրութիւն տեառն Աստուծոյ մերոյ է ընդ մեզ, եւ ընդ ամենեսեան ոյք խնդրեն զնա:
54․ Եւ վասն այսր ամենայնի քարոզեալ պահս եւ խնդրուածս, զի Տէր պահեսցէ զմեզ, եւ յաջողեսցէ մեզ ի ճանապարհս խաղաղութեան:
55․ Եւ որոշեցաք զգլխաւորս ցեղից քահանայիցն` արս երկոտասան, եւ զԵսեբիան, եւ զԱսամիան, եւ ընդ նոսա յեղբարց նոցա արս տասն:
56․ Եւ կշռեցաք եւ տուաք ցնոսա զարծաթ եւ զոսկի, եւ զսպաս քահանայութեան կահու տանն Տեառն` զոր պարգեւեաց մեզ թագաւորն եւ խորհրդակիցք նորա, եւ իշխանք` եւ ամենայն Իսրայէլ:
57․ եւ կշռեալ ետու ցնոսա արծաթ` տաղանտս վեց հարիւր յիսուն. եւ սպաս արծաթոյ հարիւր տաղանտ. եւ ոսկւոյ տաղանտս հարիւր.
58․ եւ այլ կահ ոսկւոյ քսան. եւ կահ պղնձոյ սուրբ եւ մաքուր ոսկեգոյն` երկոտասան:
59․ Եւ ասացի ցնոսա. Եւ դուք սրբեալք Տեառն էք, եւ ամենայն սպասդ սուրբ` Տեառն է, եւ ոսկեղէնք եւ արծաթեղէնք. աղաւթս արարէք առ Տէր. եւ տէր Աստուած հարցն մերոց պահեսցէ եւ հասուսցէ խաղաղութեամբ ի տեղի սրբութեան իւրոյ:
60․ Արթուն կացէք եւ պահեցէք, մինչչեւ հասուցեալ տարջիք զդոսա ցգլխաւորս քահանայիցն եւ ղեւտացւոց` եւ ցիշխանս հայրապետաց Իսրայէլի որ են յԵրուսաղէմ:
61․ զոր առեալ պահապանաց տաճարին Տեառն, եւ քահանայապետիցն եւ ղեւտացւոց զարծաթ եւ զոսկի, եւ զկահ սպասուդ` տարցին ի տաճարն Տեառն որ է յԵրուսաղէմ:
62․ Եւ յարուցեալ չուեցաք ի գետոյն Թերայ, որ աւր երկոտասան էր ամսոյն առաջնոյ, եւ եկաք հասաք յԵրուսաղէմ. պահպանեալք բարձրացեալ եւ զաւրացեալ ձեռամբ Տեառն: եւ փրկեաց զմեզ տէր Աստուած մեր յամենայն թշնամեաց մերոց. եւ հասաք ողջամբ եւ խաղաղութեամբ յԵրուսաղէմ:
63․ Եւ յորժամ հանգեաք աւուրս երիս յԵրուսաղէմ, յաւուրն չորրորդի կշռեալ տուաք զարծաթն եւ զոսկի ի տուն տեառն Աստուծոյ մերոյ ցքահանայն Մարմոթի Ուրեանց, եւ որ ընդ նմա էին,
64․ Եղիազար Փենեէսեանց, եւ Յովսաբդոս Յեսովեան, եւ Մեթոր Սաբանեան. եւ այլ ղեւտացիք` ցորս տուաք կշռով եւ համարով:
65․ եւ գրեցաւ կշիռ համարոյն յաւուր յայնմիկ:
66․ Եւ որք ելեալն էին ընդ իս ի գերութենէն բաբելացւոց` մատուցին պատարագս տեառն Աստուծոյ Իսրայէլի. զուարակս երկոտասան վասն ամենայն Իսրայէլի, խոյս իննսուն,
67․ գառինս եւթանասուն եւ երկու, նոխազս վասն փրկութեան երկոտասան: զայս ամենայն զոհս մատուցին առաջի տեառն Աստուծոյ Իսրայէլի:
68․ Եւ ետուն զգիր հրամանի թագաւորին ցգործակալս թագաւորին, եւ ցիշխանս եւ ցգաւառապետս ասորւոց եւ փիւնիկեցւոց, եւ մեծաւ պատուով փառաւորեցաւ ազգն մեր` եւ տաճարն Տեառն:
69․ Եւ ի կատարել այսր ամենայնի, եկին առաջի իմ նահապետք եւ իշխանք որդւոցն Իսրայէլի` եւ ասեն. Անխտիր եղեւ ամենայն ազգ որդւոցն Իսրայէլի` եւ իշխանք նոցա, եւ քահանայքն եւ ղեւտացիք:
70․ Խառնակեցան ընդ հեթանոսս` եւ ընդ այլազգիս, եւ ընդ պղծութիւնս ամենայն անհաւատիցն. ընդ քանանացիսն, եւ ընդ քետացիսն, եւ ընդ փերեզացիսն, եւ ընդ յեբուսացիսն, եւ ընդ մովաբացիսն, եւ ընդ ամովնացիսն, եւ ընդ գերգեսացիսն, եւ ընդ եդոմայեցին.
71․ վասն զի ամուսնացան ընդ դստերս նոցա. ինքեանք եւ որդիք իւրեանց. եւ խառնեցաւ սերմն սրբութեան իւրեանց ընդ այլազգիս հեթանոսաց երկրին. եւ ընկալան իշխանք եւ մեծամեծք իւրաքանչիւր զանաւրէնութիւնս զայս յանձինս իւրեանց. քանզի նոքա եղեն առաջնորդք չար խառնակութեանս այսոցիկ:
72․ Եւ եղեւ յորժամ լուայ ես զբանս զայսոսիկ, պատառեցի զհանդերձս իմ. եւ ողբս առեալ փետէի զվարսս գլխոյ իմոյ, եւ զմաւրուաց իմոց, եւ նստայ ի սուգ մեծ տրտմեալ:
73․ Եւ ժողովեցան առ իս ամենեքեան իբրեւ լուան զողբսն իմ, որ էր վասն տեառն Աստուծոյ Իսրայէլի: եւ տեսեալ զիս զոր ինչ արարի ի վերայ անաւրէնութեան նոցա. քանզի նստայ այնպէս տրտմեալ մինչչեւ յերեկս, ի հասանել ժամու զոհից երեկորին,
74․ եւ յարուցեալ ի սգոյն այնպէս պատառեալ էին հանդերձք իմ, եւ հանդերձ ողբովք կորացեալ էի: եւ համբարձեալ զձեռս իմ առ տէր Աստուած աղաղակեցի,
75․ եւ ասեմ. Տէր` ամաչեմք եւ դողամք առաջի երեսաց քոց,
76․ քանզի մեղք մեր բազմացան առաւել քան զգլուխս մեր, եւ անաւրէնութիւնք մեր բարձրացան առաւել ի վերոյ քան զերկինս,
77․ յամաց եւ ի ժամանակաց հարցն մերոց, եւ եմք մեք ի մեղս մեծամեծս մինչչեւ ցայսաւր:
78․ Եւ վասն մեղաց մերոց` եւ յանցանաց հարցն մերոց մատնեցաք մեք ի գերութիւն հանդերձ եղբարբք մերովք, եւ թագաւորաւքն մերովք, եւ քահանայապետաւքն մերովք. եւ ամենայն թագաւորք երկրի արկեալ զմեզ ի սուր սուսերի` գերեցին զմեզ, եւ աւերեցին զտեղիս մեր, եւ եղեալք մեք ամաւթ` մինչչեւ ցայսաւր ժամանակի:
79․ Եւ այժմ որչափ եղեւ ի վերայ մեր ողորմութիւն քո Տէր, ի թողուլ արմատ եւ զաւակ, եւ անուն ի տեղւոջս յայսմ ի սրբութեան քում:
80․ եւ յայտնեցեր զլոյս ի տաճարի տեառն Աստուծոյ մերոյ. եւ ետուր մեզ կերակուր ի ժամանակս ծառայութեան մերոյ:
81․ եւ ի գերութեանն ոչ թողեր զմեզ ի ձեռաց` այլ եղեր մեզ Տէր աւգնական. եւ ետուր մեզ գտանել շնորհս առաջի թագաւորին Պարսից. եւ պատուեաց զմեզ, եւ դարմանեաց ամենայն կազմածով:
82․ եւ փառաւորեաց զտաճարն տեառն Աստուծոյ մերոյ. եւ կանգնեաց եւ շինեաց զանապատն Սիոն. եւ հաստատեաց զմեզ ի Հրէաստանի եւ յԵրուսաղէմ:
83․ Եւ այժմ զի՞նչ տացուք պատասխանի առաջի քո Տէր վասն այսր ամենայնի. քանզի անցաք զաւրինաւք եւ զհրամանաւք քովք Տէր, զոր ետուր ի ձեռն ծառայիցն քոց մարգարէից,
84․ ասելով այսպէս. Եթէ երկիրն զոր մտցես դու ժառանգել զնա, է երկիր պղծեալ ի պղծութեանցն ազգաց երկրին այնորիկ, եւ աղտեղութիւնքն իւրեանց լցին զնա:
85․ եւ արդ` մի առնուցուս դու ի դստերաց նոցա որդւոց քոց կանայս, եւ զդստերսն ձեր մի տայցէք որդւոց նոցա:
86․ եւ մի խնդրեսցես առնել խաղաղութիւն ընդ նոսա զամենայն ժամանակս. եւ եղիջիր դու զաւրաւոր ուտել զբարութիւնս երկրին. եւ ժառանգեսցեն որդիք քո զերկիրն զայն յաւիտեանս ժամանակաց:
87․ Եւ որ ինչ գամ մի անցք անցին ընդ մեզ վասն գործոց մերոց, եւ վասն չարութեան մեղաց մերոց:
88․ այլ դու Տէր բազմագութ թողեր զմեղս մեր, եւ ետուր մեզ այսպիսի զաւակ եւ արմատ. մեք դարձեալ խոտորեցաք անցանել զաւրինաւք քովք, եւ խառնակեցաք ընդ աղտեղութիւնս հեթանոսաց երկրիս:
89․ եւ ոչ բարկացար մեզ ի կորուսանել զմեզ, մինչչեւ ցայն վայր եթէ ոչ մնասցէ արմատ, եւ զաւակ, եւ անուն մեր:
90․ Տէր Աստուած Իսրայէլի, դու արդար եւ ճշմարիտ ես. ոչ սպառեցեր զզաւակ մեր, այլ մնացաք զաւակ եւ արմատ մինչչեւ ցայսաւր:
91․ Եւ արդ` աւասիկ եմք այսաւր առաջի քո յանաւրէնութիւնս մեր, եւ ոչ եւս կարեմք կալ առաջի երեսաց քոց. զի բազմացան անաւրէնութիւնք եւ չարիք մեր` առաւել քան զգլուխս մեր:
92 Եւ յորժամ եկաց յաղաւթս Եզր` հանդերձ խոստովանութեամբքս այսոքիւք, եւ ողբովք մեծամեծաւք. անկեալ էր ի վերայ երեսաց երկրի առաջի տաճարին Տեառն: ժողովեցան առ նա ամենայն որ էին յԵրուսաղէմ, ժողովուրդք բազումք` արք եւ կանայք, երիտասարդք եւ կուսանք. քանզի ողբք մեծամեծք էին ի բազմութեանն:
93․ Եւ կարդաց Յեքոնիա Իեղու յորդւոցն Իսրայէլի, եւ ասէ ցԵզր. Մեք մեղաք առ տէր Աստուած, եւ առաք կանայս յայլազգեաց երկրիս այսորիկ.
94․ եւ այժմ են այսաւր անաւրէնութիւնք ի միջի մերում. եկայք ամենեքեան` դիցուք երդմունս առաջի Տեառն, եւ հանցուք ի բաց զկանայս մեր զոր առաք յայլազգեաց, հանդերձ որդւովք իւրեանց.
95․ որպէս եւ հրամայէ յաւրէնս տեառն Աստուծոյ մերոյ: Արի վաղվաղակի` եւ կատարեա.
96․ զի առ քեզ են ամենայն իրք մեր, եւ մեք ընդ քեզ. զինչ եւ հրամայեսցես` արասցուք:
97․ Եւ յարուցեալ Եզր` երդմնեցոյց զիշխանս ցեղից քահանայիցն եւ ղեւտացւոց. եւ զամենայն Իսրայէլի առնել ըստ այսմ աւրինակի. եւ երդուան:
Հաղորդում կայքում սխալի վերաբերյալ
Տվյալ հատվածում առկա է սխալ: