Գլուխ 1

   
1․ Եւ եղեւ յամսեանն Քաղսեւ յամի քսաներորդի Արտաշէսի արքայի, ես էի ի Շաւշ ի մայր քաղաքացն Աբիրայ:

2․ եւ եկն առ իս յեղբարցն իմոց. նա` եւ արք Յուդայ, եւ հարցի ցնոսա վասն փրկելոցն որք ապրեցան եւ ելին ի գերութենէն` եւ վասն Երուսաղէմի:

3․ Եւ ասեն ցիս, զերծեալքն ի գերութենէն` են անդէն յաշխարհին իւրեանց ի մեծ նեղութիւն եւ ի նախատինս: եւ պարիսպքն Երուսաղէմի կան նոյնպէս քակեալ եւ աւերեալ, եւ դրունք նորա հրկիզեալ հրով:

4․ Եւ եղեւ յորժամ լուայ ես զբանս զայս` նստայ եւ լայի եւ սուգ առի զաւուրս, եւ պահեցի պահս, եւ կացի յաղաւթս առաջի տեառն Աստուծոյ երկնից.

5․ եւ ասեմ. Տէր Աստուած երկնի եւ երկրի` որ զաւրաւորդ ես եւ մեծ եւ ահարկու, պահես զուխտս եւ զողորմութիւնս ոյք սիրեն զքեզ, եւ ոյք առնեն զաւրէնս քո:

6․ եւ եղիցի ականջք քո ի լսել, եւ աչք քո ի տեսանել: Եւ արդ` լուր եւ տես զաղաւթս ծառայի քոյ զոր ես այսաւր մատուցանեմ առաջի քո, վասն որդւոցն Իսրայէլի ծառայից քոց, որք մատնեցաք ի նեղութիւն վասն մեղաց մերոց զոր մեղաքն` ես եւ տուն հաւր իմոյ մեղաք.

7․ վասն զի յանցանելով յանցեաք` եւ ոչ պահեցաք զաւրէնս եւ զհրամանս, եւ զդատաստանս քո զոր պատուիրեցեր մեզ ի ձեռն ծառային քոյ Մովսիսի:

8․ Յիշեա Տէր զբանն քո զոր պատուիրեցեր ծառային քոյ Մովսիսի եւ ասացեր. Եթէ դուք ոչ պահեսջիք զաւրէնս իմ, եւ ես ցրուեցից զձեզ ընդ հեթանոսս:

9․ եւ եթէ դարձջիք` եւ պահիցէք զաւրէնս իմ եւ արասջիք զնոսա. եւ եթէ իցէք ցրուեալք մինչչեւ ի ծագս երկրի, եւ անտի ժողովեցից եւ ածից զձեզ ի տեղին զոր ընտրեցից, եւ յորում բնակէ անուն իմ ի նմա:

10․ Եւ արդ` սոքա ծառայք քո եւ ժողովուրդք զորս փրկեցեր զաւրութեամբ քո մեծաւ` եւ բարձր բազկաւ.

11․ մի թողուր ի ձեռաց քոց, այլ եղիցին ականջք քո հայել յաղաւթս ծառայից քոց, եւ անսալ խնդրուածոց որոց երկնչին յանուանէ քումմէ. եւ յաջողեա զխնդրուածս ծառայի քոյ այսաւր. եւ տուր ինձ գտանել գթութիւնս առաջի առնս այսորիկ: Եւ ես էի տակառապետ թագաւորին: