Գլուխ 12

   

1․ Եւ այս են քահանայք եւ ղեւտացիք որ ելին ընդ Զորաբաբիլի Սաղաթիելեանց, եւ Յեսուայ Յովսեդեկեանց. Սարայիա, Երեմիա, Եզրա

2․ եւ Ամարիա, Մաղուք, Արտուս, Սեդեկիա:

3․ Այս են իշխանք քահանայիցն եւ եղբարք նոցա յաւուրս Յեսուայ:

8․ Եւ ղեւտացիք` Յեսու, Բանուի, Կադմիէղ, Սարաբիա, Յուդա, Մատթանիա, եւ եղբարք նոցա որ են կարգեալ աւր ըստ աւրէ: եւ Յովակիմա, Եղիասիբ. եւ Եղիասիբայ,

9․ Յովադէ. եւ Յովադայեայ, Յովնաթան. եւ Յովնաթանայ Յաադուս: Եւ յաւուրս Յովակիմայ եղբարք նորա էին իշխանք եւ քահանայք հայրապետացն. Սարիա, Եմարիա, Երեմիա, Անանիա, Ազարիա, Եզրա, Մեսուղամ, Ամարիա, Յովնան, Մաղուք:

22․ Եւ ղեւտացիք յաւուրս Եղիասիբ. Յովդա, եւ Յովա, եւ Յովնան, եւ Իդուա գրեալք իշխանք հայրապետացն: Եւ այս ամենայն քահանայք էին ի թագաւորութեանն Դարեհի.

23․ որդիք Ղեւեայ իշխանք հայրապետացն գրեալք ի գիրս բանից աւուրց համարոյն, մինչչեւ ցՈվնան` որդի Եղիասիբ: 24 Եւ իշխանք ղեւտացւոց Ասաբիա, եւ Արաբիա, եւ Յեսու. եւ որդիք Կադմէլ. եւ եղբարք նորա մաւտ առ նմա, աւրհնել եւ սաղմոս ասել, որպէս եւ հրամայեաց Դաւիթ այրն Աստուծոյ,

25․ աւր ըստ աւրէ զաւր հանապազ ի ժողովս իւրեանց հանդերձ դռնապանաւք:

26․ Սոքա էին յաւուրս Յովակիմայ յորդւոյ Յեսուայ, որդւոյ Յովսեդեկայ, եւ յաւուրս Նեեմայ, եւ Եզրայ քահանայի եւ գրչի աւրինաց Տեառն:

27․ Եւ ի նաւակատիս պարիսպին Երուսաղէմի, խնդրեցին զղեւտացիսն ի տեղիս իւրեանց` ածել զնոսա յԵրուսաղէմ, եւ առնել զնաւակատիս ուրախութեամբ հանդերձ` եւ գոհութեամբ եւ երգովք նուագարանաւք` ծնծղայիւք եւ թմբկաւք, եւ սաղմոսարանաւք ի ձայն եղջեր փողոյ:

28․ Եւ ժողովեցան ամենեքեան որք երգէին եւ սաղմոսէին շուրջանակի յամենայն կողմանց Երուսաղէմի,

29․ ի քաղաքաց եւ ի գիւղից եւ ի բնակութեանց իւրեանց, գալ ի սպաս պաշտամանն յԵրուսաղէմ:

30․ Եւ սրբեցան ամենայն քահանայքն եւ ղեւտացիքն, եւ սրբեցին զժողովուրդն` եւ զդռնապանս մեծի դրանց պարսպին:

31․ Եւ հանին ի վեր զիշխանս Յուդայ ի պարիսպն. եւ երթային զհետ նոցա երգովք նուագարանաւք երկու երկու,

32․ Յովսիա եւ Ոզիա` եւ կէս իշխանացն Յուդայ:

33․ Ազարիաս, Եզրա, եւ Մոսողամ:

34․ Յուդա եւ Բենիամին. եւ Սամէաս` եւ Երեմիաս:

35․ Եւ յորդւոց քահանայիցն էին որք հարկանէին զփողսն` Զաքարիաս որդի Յովնանայ. որդի Սամայի. որդի Մաթանիա. որդի Միքայ. որդի Զաքուր. որդի Ասափ:

36․ Եւ եղբարք նոցա Սամէիա եւ Եզրիէլ աւրհնէին զերգս եւ զսաղմոսս Դաւթի առն Աստուծոյ զորս նուագեաց: Եւ Եզրաս գրիչ երթայր առաջի նոցա ի վերայ դրանցն:

37․ եւ որք երգէին երթային ընդդէմ նորա: Եւ ելին յաստիճանս քաղաքին Դաւթի յելս պարսպին` ի վերոյ քան զապարանսն Դաւթի, մինչչեւ ի դուռն Ջրոյն Եփրեմի, եւ ընդ կողմն արեւելից.

39․ եւ ի դուռն Եքթերան. եւ յաշտարակն Անամայելի մինչչեւ ի դուռն Ջրբղխացն. եւ լսելի եղեւ ձայն երգոցն մինչչեւ յամենայն տեղիս. քանզի հրամայեաց Եզր կալ ի վերայ ամենայն դրանցն` եւ երգել:

43․ Եւ զոհեցին յաւուր յայնմիկ զոհս մեծամեծս, եւ ուրախ եղեն յոյժ. վասն զի Աստուած արար ուրախ զնոսա յուրախութիւն մեծ. եւ կանայք նոցա եւ որդիք նոցա ուրախ եղեն. եւ լսելի եղեւ ուրախութիւն նոցա յԵրուսաղէմէ մինչչեւ ի հեռաւոր տեղիս:

44․ Եւ կացուցին յաւուր յայնմիկ ի վերայ գանձանակի գանձուցն, եւ զառաջաւորացն, եւ տասանորդացն, եւ որ միանգամ ժողովեալ էր անդր յիշխանաց քաղաքին. որպէս հրամայեալ էր յաւրէնս Մովսիսի քահանայիցն եւ ղեւտացւոց. քանզի ուրախութիւն մեծ էր ի Յուդայ` եւ ի քահանայս եւ յղեւտացիս: եւ զգուշացան սրբութեանցն Աստուծոյ. եւ պահեցին զսրբութիւնն որ էին երգեցիկք սաղմոսասացքն: եւ դռնապանքն որպէս կարգեալ էր Դաւթի եւ որդւոյ նորա Սողոմոնի:

45․ Քանզի յաւուրս Դաւթի` Ասափ էր իշխան եւ առաջնորդ երգոց սաղմոսացն, որք նուագէին երգէին եւ փառաւոր առնէին զԱստուած:

46․ Եւ ամենայն Իսրայէլ յաւուրս Զորաբաբելի եւ յաւուրս Նեեմիայ` տային մասն եւ բաժին երգեցկացն եւ դռնապանացն` որպէս եւ կարգեալ էր աւր ըստ աւրէ. եւ առնէին սուրբ զղեւտացիսն, եւ ղեւտացիքն զորդիսն Ահարոնի: