Գլուխ 2

   
1. Եւ եղեւ յամսեանն Նիսան ի քսաներորդ ամի Արտաշէսի արքայի. եւ խնդրեաց յինէն գինի. եւ առեալ զգինին ետու թագաւորին, եւ էր թագաւորն միայն: եւ յորժամ արբ զգինին,

2. ասէ ցիս. Ընդէ՞ր տրտում եւ տխուր են երեսք քո. եւ ոչ ինչ են այսմ պատճառք, եթէ ոչ չարութիւն սրտի քոյ: Եւ ես երկեայ յոյժ,

3. եւ ասեմ ցթագաւորն. Արքայ` դու յաւիտեան կեաց. ընդէ՞ր ոչ տրտում եւ տխուր լինիցին երեսք իմ. զի քաղաքն եւ տուն հաւր իմոյ անապատ է, եւ դրունքն ապականեալ ի հրոյ:

4. Եւ ասէ ցիս թագաւորն. Վասն որո՞յ իրաց խնդրես դու զայս: եւ կացեալ իմ յաղաւթս եւ ամբարձեալ զմիտս իմ առ տէր Աստուած երկնից,

5. ասեմ ցթագաւորն. Եղիցի ի վերայ թագաւորութեանդ քում բարութիւն. եւ եթէ եգիտ ծառայ քո շնորհս առաջի երեսաց քոց, եւ կամիս` յղեա զիս ի Հրէաստան ի քաղաք յիշատակարանաց հարցն մերոց, եւ ես բանիւ հրամանի քոյ շինեցից զնա:

6. Եւ ասէ ցիս թագաւորն եւ հարճ նորա որ նստէր առ նմա. Յո՞րժամ ժամանեսցես դու, եւ կամ ե՞րբ դարձցիս: Եւ արար առ իս բարութիւն թագաւորն` եւ արձակեաց զիս. եւ ես կալայ առ նմա ժամանակ,

7. եւ ասացի ցթագաւորն. Եթէ գտի շնորհս առաջի քո` տուր ինձ թուղթս առ իշխանս կողմանց գետոյն, եւ տարցին զիս մինչչեւ երթայց ի Հրէաստան.

8. եւ թուղթ մի առ Ասափ, որ է պահապան դրախտին արքունի. զի տացէ ինձ փայտս ի կազմած դրանցն եւ պարսպաց քաղաքին, եւ տանն յոր ես մտից անդր: եւ ետ ինձ թագաւորն. վասն զի ձեռն Աստուծոյ իմոյ էր ընդ իս ի բարութիւն:

9. Եւ եկի առ իշխանս գետոյն, եւ ետու առ նոսա զթուղթս թագաւորին: եւ առաքեաց ընդ իս թագաւորն առաջնորդս զաւրաւորս` եւ ձիս:

10. Եւ լուան Սանաբաղատ իշխան. եւ Տուբիա ծառայ Ամոնի, եւ չար թուեցաւ առաջի նոցա. վասն զի խնդրեցի արս ի բարութիւնս եւ ի պէտս Իսրայէլի:

11. Եւ եկի յԵրուսաղէմ, եւ եղէ անդ աւուրս երիս.

12. եւ յարեայ ի գիշերի ես եւ սակաւ արք ընդ իս. եւ ոչ պատմեցի արանցն, եթէ զի՞նչ Աստուած արկ ի սիրտ իմ առնել վասն Իսրայէլի. եւ գրաստ ոչ էր ընդ իս, բայց միայն գրաստն յորոյ վերայ նստէի ես:

13. Եւ ելի ես ընդ դուռն հեղեղատին, եւ առ բերանով երկրի թզենւոյն` եւ մինչչեւ ի դուռն աղբերցն. եւ ճնշէի ի նեղութենէ անցիցն առ պարսպաւն Երուսաղէմի, զոր էին նոցա սրբեալ. եւ դրունք նորա ապականեալ էին ի հրոյ:

14. եւ անցի ընդ դուռն աղբերն առ ջրբղխաւք թագաւորին. եւ ոչ էր անդ տեղի գրաստու իմոյ` անցանել ընդ նա հեծեալ:

15. Եւ ելանէի ի վեր ի պարիսպն առ հեղեղատաւն գիշերի, եւ ի նեղութենէն էի ճնշեալ ի պարսպէն, եւ էի առ դրան ձորոյն. եւ դարձայ

16. եւ ոչ գիտացին  պահապանքն եթէ զի՞նչ էի երթեալ` եւ կամ զի՞նչ առնէի: եւ հրէիցն եւ քահանայիցն եւ պատուականացն եւ զաւրագլխաց, եւ այլոցն որք վճարէին զիրս գործոյն` մինչչեւ ցայն վայր ոչ պատմեալ էր նոցա:

17. Եւ ասացի ցնոսա. Դուք տեսէք զչարիսս յորում եմք այժմ. եւ զիարդ Երուսաղէմ անապատ է եւ դրունք սորա հրկէզ. եկայք եւ շինեսցուք զպարիսպս Երուսաղէմի, եւ ոչ եւս եղիցուք ի նախատինս:

18. Եւ պատմեցի նոցա զձեռն Տեառն որ էր ընդ իս բարութեամբ. եւ զբանս թագաւորին զոր ասաց ցիս. եւ ասեմ ցնոսա. Արդ եկայք` յարեսցուք եւ շինեսցուք. եւ զաւրացան ձեռք նոցա ի բարութիւն:

19. Եւ լուան Սանաբաղատ եւ Տուբիա ծառայ Ամոնի, եւ Գեսամ Արաբացի, եւ ծաղր առնէին զմեզ. եւ եկին առ մեզ եւ ասեն ցմեզ. Զի՞նչ են իրքդ այդ զոր դուքդ առնէք, եւ կամիք դուք ի թագաւորէն ապստամբել:

20. Եւ ետու պատասխանի նոցա` եւ ասեմ. Աստուած երկնից եւ երկրի յաջողեաց մեզ, եւ մեք ծառայք նորա եմք սուրբք, եւ շինեմք զքաղաքս. եւ ձեզ ոչ գոյ բաժին` եւ յիշատակ` եւ արդարութիւն յԵրուսաղէմ: