1. Որդւոյ Դաւթի թագաւորի Իսրայէլի յԵրուսաղէմ. Եկկլէսիաստէս:
2. Ունայնութիւն ունայնութեանց ասաց ժողովաւղն: Ունայնութիւն ունայնութեանց` ամենայն ինչ ընդ ունայն է:
3. Զի՞նչ աւելի է մարդոյ յամենայն վաստակս իւր զոր տաժանի ընդ արեգակամբ:
4. Ազգ երթայ եւ ազգ գայ` եւ երկիրս յաւիտեան կայ:
5. Ծագէ արեգակն` եւ մտանէ արեգակն եւ ի տեղի իւր ձգի:
6. Ի ծագել իւրում ելանէ ընդ հարաւ, եւ պատի ընդ հիւսւսիւ, պատելով պատի: գնայ հողմ, եւ ի շրջանս իւր դառնայ հողմ:
7. Ամենայն ուխք ի ծով գնան, եւ ծով ոչ լնու: ի տեղի յոր ուխք գնան` անդ նոքին դառնան ի գնալ:
8. Ամենայն բան ջանիւ, եւ ոչ կարասցէ այր խաւսել: ոչ յագեսցի ակն տեսանելով, եւ ոչ լցցի ունկն լսելով:
9. Զի՞նչ է որ եղեւն, նոյն ինքն որ լինելոցն է. եւ զի՞նչ է որ արարաւն` նոյն ինքն որ առնելոցն է:
10. Եւ ոչ է ամենայն առժամայն ընդ արեգակամբ. զի զոր խաւսիցի ոք` եւ ասիցէ` ահաւասիկ այն նոր է, վաղ իսկ եղեալ է ի յաւիտենից եղելոցն նախ քան զմեզ:
11 Ոչ գոյ յիշատակ առաջնոցն. նա եւ ոչ վերջնոցն որ լինելոց են. ոչ գոյ յիշատակ նոցա ընդ լինելոցսն ի վախճանի:
12. Ես Եկլէսիաստէս թագաւոր ի վերայ Իսրայէլի յԵրուսաղէմ.
13. եւ ետու զսիրտ իմ խնդրել եւ խորհել իմաստութեամբ վասն ամենայնի որ եղեալ են ընդ արեգակամբ: Զի զբազումն չար ետ Աստուած որդւոց մարդկան զբաղել ընդ արեգակամբ:
14.Տեսի ես զամենայն արարեալս որ արարեալ են ի ներքոյ արեգական. եւ ահա ամենայն ինչ ընդ ունայնութիւն է եւ յաւժարութիւն ոգւոյ:
15. Թիւրեալն` ոչ կարասցէ զարդարել, եւ պակասեալն` ոչ կարասցէ ի թիւ անկանել:
16.Խաւսեցայ ի սրտի իմում թէ առաւել ես մեծացայ քան զամենեսեան որ էին յառաջ քան զիս յԵրուսաղէմ: Եւ ետու զսիրտ իմ գիտել զիմաստութիւն եւ զգիտութիւն. եւ յաւելի յիմաստութիւն քան զամենեսեան, որ յառաջ եղեն քան զիս յԵրուսաղէմ:
17.Եւ սիրտ իմ ետես բազում իմաստութիւն` եւ գիտութիւն. զառակս եւ զիմաստութիւն գիտացի ես. զի սակայն եւ այս յաւժարութիւն ոգւոյ է:
18.Զի բազմութիւն իմաստութեան բազմութիւն գիտութեան. եւ որ յոլովեաց ի գիտութիւն յաւելցէ ի ցաւս:
Հաղորդում կայքում սխալի վերաբերյալ
Տվյալ հատվածում առկա է սխալ: